A haapuai i to oe manaˈo turai

“Te faaauraa i te hoê parau o te ohipa faufaa roa ta te feia puhipuhi i te avaava e nehenehe e rave no te faaea i te avaava.”—“Stop Smoking Now!”

EI HAAPOTORAA, ia hinaaro oe e faaea i te avaava, e tia ia oe ia haapuai i to oe manaˈo turai no te na reira. Nafea oe e haapuai ai i to oe manaˈo turai? A tahi, a hiˈo eaha te haamaitairaa e noaa mai ia faaea oe i te avaava.

E faaherehere oe i te moni. Hoê puohu avaava i te mahana e tausani moni ïa i te matahiti. “Aita vau i haapao aˈenei ehia moni ta ˈu i haapau no te avaava.”—Gyanu, Nepal.

E rahi atu â to oe oaoa. “Ua maitai mai to ˈu oraraa i to ˈu faaearaa i te avaava e mea maitai roa.” (Regina, Afirika apatoa) Ia faaea te taata i te avaava, e maitai mai to ratou tamataraa e te hauˈaraa e e pautuutu â ratou e maitai roa ˈtu â to ratou huru rapaeau.

E maitai atu â to oe ea. “E maitai atu â te ea ia faaea i te avaava no te mau tane e vahine noa ˈtu eaha te faito matahiti.”—The U.S. Centers for Disease Control and Prevention.

E noaa mai ia oe te tahi tiaturiraa. “Ua faaea vau i te avaava no te mea aita vau i hinaaro e riro ei tîtî no te avaava. Ua hinaaro vau e riro ei fatu no to ˈu iho tino.”—Henning, Danemata.

E maitai atu â to oe utuafare e to oe mau hoa. “E faaino . . . te avaava i te feia ati aˈe ia oe. . . . Ua faaite te mau maimiraa, no te hauˈa auahi a te feia puhipuhi avaava e tausani taata e pohe nei i te mau matahiti atoa i te mariri ai taata o te mahaha e te maˈi mafatu.”—American Cancer Society.

E faaoaoa oe i to oe Poiete. “Taeae here ma, . . . e tamâ anaˈe ia tatou iho i te mau viivii atoa o te tino.” (Korinetia 2, 7:1) “Ia pûpû atu i to outou tino . . . moˈa e te au i te Atua.”—Roma 12:1.

“I to ˈu taaraa mea au ore na te Atua i te mau mea o te haaviivii i te tino, ua faaoti au i te faaea i te avaava.”—Sylvia, Paniora.

E pinepine râ, eita e navai noa te manaˈo turai. E titauhia atoa i te tauturu o vetahi oia hoi te utuafare e te mau hoa. Eaha ta ratou e nehenehe e rave?