“E ore roa te here e mou”—Te na reira ra anei oe?

EAHA te here? Na te ao nei, te vai ra te mau parau paari o te faateniteni ra i te here mau. Te na ô ra te hoê parau paari Zoulou e, “Eita te here e maiti i te rauere o te aihere i reira oia e mairi ai.” I Philipino e parau te taata e, “E tamiti te here i te oraraa.” Te na ô ra te hoê parau paari Lebanona e, “Eita te here e tâuˈa ˈtu i te mau paruparu tera râ e faahanahana te feii i te mau hape rii.” Hoê â huru no te parau Irelane e, “E tapoˈi te here i te mea au ore.” E parau te taata no te fenua no Galles e, “E mea puai aˈe te here i te hoê taata rarahi.” E parau to Norevetia e, “E vai nehenehe noa o tei herehia ra.” E parau paha te hoê Beretane e, “E mea faufaa aˈe maa here i te teiaha o te ture.” I Paniora, e na ôhia e, “E vai te here mau e tae roa ˈtu i te pohe.”

Ma te feaa ore, e au-rahi-hia te here mau na te mau vahi atoa. Te here o te nehenehe e faatupu i te hoê taa-ê-raa mau i roto i te oraraa, ua faataahia ïa i roto i te Bibilia e te taata papai ra o Paulo: “E faaoromairaa roa to te [here], e te hamani maitai; e ore te [here] e feii: e ore te [here] e faarahi, e ore hoi e faaahaaha. Eita e rave i te mea au ore, eita e imi i te maitai no ˈna iho, eita e riri vave, eita e manaˈo ino ia vetahi ê; eita e oaoa i te parau-tia ore, e oaoa râ i te parau mau; e tapoˈi i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra. E ore roa te [here] e mou.”—Korinetia 1, 13:4-8.

Oia mau, “e ore roa te [here] e mou.” E faaora te here. E faatahoê te here. Eita noa te here e faaitehia na roto i te parau na roto atoa râ i te mau ohipa miimii ore. E mau manaˈo putapû viivii ore to te here. No reira o Paulo i papai atoa ˈi: “Ia horoa noâ vau i ta ˈu mau taoˈa atoa ei faaamu i te taata rii, e ia tuu noa ˈtu vau i tau tino ia tahuhia i te auahi, e aita o ˈu [here], aita roa a ˈu e faufaa i reira.” Ia faatupu anaˈe tatou i te mau tusia aore ra ia horoa anaˈe tatou i te mau ô ia itehia ïa e vera ma, e mea faufaa ore te reira i te hiˈoraa o te Atua.—Korinetia 1, 13:3.

Ua na reira o Iesu e: “Ia horoa râ oe i ta oe taoˈa aroha, eiaha e na mua i te faaoto i te pu, mai ta te feia haavare . . . ia haamaitaihia ratou e te taata. Oia mau ta ˈu e parau atu ia outou na, Ua noaa ta ratou utua. Area oe, ia horoa i ta oe taoˈa aroha, eiaha to rima aui ia ite i ta to rima atau e rave ra.” Oia mau, eita te here e faaoru aore ra e faaahaaha.—Mataio 6:2, 3.

Eita te here haavare ore e imi i to ˈna iho maitai. E faahaumǎrû te here mau i te taata e haafatata mai. (Mataio 11:28-30) E faahaamanaˈo te parau i muri nei, aita i itehia te iˈoa o te taata papai, i te huru o te here o ta tatou e faaite atu ia vetahi ê: “Te parau-tia e aita e here e huru fati ore ïa to tatou. Te faaroo e aita e here e huru paieti ino ïa to tatou. Te puai e aita e here e huru taehae ïa to tatou. Te tiaraa morare e aita e here e huru mârô ïa to tatou. Te nahonaho e aita e here e huru etaeta ïa to tatou.”

Te feia e ora noa na nia i te mau ture e nehenehe ratou e topa i roto i te marei o te ereraa i te here. E riro tatou paatoa i te faaitoito atu ia ora anaˈe tatou ia au i te aˈoraa a Paulo: “[A ahu ia outou iho i te] aroha noa, e te hamani maitai, e te haehaa, e te mǎrû, e te faaoromai rahi, . . . e faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai [ta Iehova] atoa i faaore i ta outou na, e na reira atoa outou: [Hau atu râ i taua mau mea atoa nei, a ahu ia outou iho i te here, no te mea e taai tia roa teie no te tahoêraa].”—Kolosa 3:12-14; MN.

[Hohoˈa i te api 15]

E faaite te mau Kerisetiano mau i te here ia au i ta Iesu i haapii atu