Te hoê ravea ati aˈe te ao nei—E itehia mai anei?
TE FARII nei te feia aravihi e ua riro te maˈi tutoo ei fifi ati aˈe te ao nei o tei titau i te hoê ravea ati aˈe te ao nei. Aita e fenua o te nehenehe e haavî i te tutoo o ˈna anaˈe iho, no te mea, i te mau hebedoma atoa, te ratere nei te mau mirioni taata i tera e tera fenua.
E rave rahi te tiaturi nei e, ia tahoê te mau nunaa atoa, e titauhia ïa ia tauturu atu te mau nunaa ona i te mau nunaa veve, o ratou hoi te tairi-rahi-hia i te maˈi tutoo. Mai ta te Taote Arata Kochi e parau ra, “no te maitai iho o te mau nunaa ona e tia ˈi ia ratou ia tauturu atu i te mau fenua ravai ore ia aro i te maˈi tutoo, hou to ratou iho mau fenua e roohia ˈi i teie maˈi.”
Tera râ, aita te mau nunaa ona i ohipa oioi no te tauturu atu i te mau nunaa veve, no te mea te haapao nei ratou i te mau fa e te mau fifi faufaa aˈe no ratou. E pinepine vetahi mau fenua veve iho i te haapao ore i te parau no te rapaauraa, te horoa nei râ ratou i te mau tino moni rarahi no te haaputu i te mau mauhaa tamaˈi. I te afaraa o te matahiti 1996, 10 % anaˈe o te feia maˈi tutoo na te ao nei o tei rapaauhia na roto i te porotarama DOTS, mea iti roa ïa no te tapea i te maˈi ia parare roa ˈtu â.
Te na ô ra te OMS e: “Te vai nei te ite e te mau raau mâmâ roa no te rapaau i te tutoo mai te mau ahuru matahiti mai â. Te mea râ ta te ao nei e hinaaro ra i teie nei, o te tutavaraa rahi ïa a te mau taata tei ia ratou ra te puai, te mana e te aroha no te haapao e te faaohipa-maitai-hia ra teie mau raau na roto i te ao atoa nei.”
Te upootiaraa e fatata maira
E nehenehe mau anei tatou e tiaturi e na te mau taata tei ia ratou ra te puai e te mana, e faatitiaifaro i te fifi? Ua papai te papai salamo Bibilia i faauruahia mai e: “Eiaha e tiaturi i te hui arii, e te taata atoa, aita hoi o ˈna e ora.” O vai ïa ta tatou e nehenehe e tiaturi? Te na ô te irava i muri iho e: “E ao to ˈna tei te Atua o Iakoba te tauturu ia ˈna; e tei to ˈna Atua, tei ia Iehova to ˈna tiaturiraa! O tei hamani i te mau raˈi e te fenua, te tai, e te mau mea atoa i roto ra.”—Salamo 146:3, 5, 6.
O Iehova te Atua i opua e te Poiete o te fenua nei, e tei ia ˈna ra te puai e te paari no te faaore i te maˈi. E aroha mai anei oia? Na roto i ta ˈna peropheta i faaurua mai, ua tǎpǔ o Iehova e: “E faaite au i te aroha i nia i [to ˈu nunaa], mai te taata e faaite i te aroha i nia i ta ˈna tamaiti e tavini ra ia ˈna.”—Malaki 3:17, MN.
Te faataa ra te pene hopea o te Bibilia i te hoê orama i horoahia ˈtu i te aposetolo Ioane ra. Ua ite oia i “te raau ora . . . hoê ahuru ma piti huru o te huero, hoê marama hoê hoturaa.” Te faahohoˈa ra teie mau tumu raau taipe e to ratou hotu i te mau faanahoraa a te Atua ia nehenehe te mau taata auraro e ora e a muri noa ˈtu i nia i te fenua nei.—Apokalupo 22:2.
Ua papai â o Ioane e: “Te rau o taua raau ra, ei faaora ïa i te mau fenua.” Te faahohoˈa ra te mau rau taipe i te mau haamaitairaa no ǒ mai i te Atua e noaa mai na roto i te faaoraraahia te huitaata nei, i te pae varua e i te pae tino atoa. No reira, e nehenehe tatou e tiaturi e i roto i te ao apî parau-tia i raro aˈe i te faatereraa a te Atua, e haamou-roa-hia te maˈi tutoo e a muri noa ˈtu.—Apokalupo 21:3, 4.
[Hohoˈa i te api 8, 9]
Ua tǎpǔ te Atua e faaora i te huitaata nei e a muri noa ˈtu