Huaai no te ati

MAI te aha te huru o te hoê taata tei horo ê i to ˈna fenua? A tamata na i te feruri e te ora ra outou ma te hau, e ma te tupu taue noa, e taui to outou oraraa taatoa. Mai te amoraa mata ra, e riro mai te feia tei ora noa na i pihai iho ia outou ei mau enemi. E haere mai te mau faehau e eiâ e e tutui i to outou fare i te auahi. Hoê ahuru minuti to outou no te puohu i to outou otaa e no te horo e imi i te ora. E otaa nainai noa, no te mea e amo outou i te reira e rave rahi kilometera i te atea. Eaha ta outou e puohu?

E faarue outou i te fare i ropu i te mau paainaraa o te topita e te pupuhi. E apiti atu outou i te feia e horo atoa ra. E mairi te mau mahana; e peretete haere outou ma te poia, te poihâ, e te rohirohi rahi. No te ora, e tia ia outou ia haavî i to outou tino tei paruparu roa. E taoto outou i nia i te repo. E heru outou i te repo o te tahi faaapu no te imi i te maa.

E piri atu outou i te hoê fenua atâta ore, eita râ te mau mutoi otia e faatia ia outou ia tomo. E paheru ratou i ta outou pute e e rave ratou i te mau tauihaa faufaa atoa. E tapae outou i te tahi atu vahi hiˈopoaraa e e faatiahia outou ia tomo. E afaihia outou i roto i te hoê aua reporepo e farii i te feia i horo ê i to ratou fenua, tei haaatihia i te niuniu taratara. Noa ˈtu e tei rotopu outou i te tahi atu feia tei roohia i te hoê â ati, te moemoe nei e te ahoaho nei outou.

Te mihi ra outou i to outou mau fetii e to outou mau hoa. Aita hoi ta outou e ravea maoti râ te tiaturiraa i te tauturu a vetahi ê. Aita e ohipa e aita hoê aˈe mea ta outou e nehenehe e rave. Te tutava ra outou eiaha e haaparuparu, e hepohepo, e e riri. Te peapea nei outou i te ohipa e tupu a muri aˈe inaha, ua ite outou e eita outou e faaea maoro mai i roto i teie aua. E ere hoi teie aua i to outou fare—e au ra e e vahi tiairaa noa râ aore ra e vahi haapueraa i te taata tei ore i hinaarohia. E aniani outou e e faahepohia anei outou ia hoˈi i te vahi no reira mai outou.

O te tupuraa ïa e faaruruhia nei e te mau mirioni taata i teie mahana. Ia au i te piha Tomitera Teitei a te mau Nunaa Amui no te Feia i horo ê i to ratou fenua (o UNHCR te mau reta haapoto o te iˈoa Beretane), e 27 mirioni taata na te ao nei o tei horo ê i te tamaˈi aore ra i te hamani-ino-raa. E 23 mirioni taata ˈtu â tei hopoi-ê-hia i roto i to ratou iho fenua. Ia taio-pauroa-hia, 1 i nia i te 115 taata atoa i nia i te fenua nei tei faahepohia ia horo. E mau vahine e e mau tamarii te rahiraa. Ei huaai no te tamaˈi e te ati, te painu haere nei teie feia i horo, i roto i te hoê ao tei ore i hinaaro ia ratou, te hoê ao e patoi nei ia ratou, eiaha no to ratou tiaraa taata, no to ratou râ tiaraa feia ěê.

Ua riro ratou ei tapao no te tauiraa rahi e tupu ra na te ao nei. Te na ô ra te UNHCR e: “O te feia i horo ê i to ratou fenua, te tapao faaiteraa hopea i te topatariraa i te pae totiale. O ratou te reni hopea rahi roa ˈˈe e naeahia, i roto i te anairaa o te mau tumu e te mau faahopearaa, o te haapapu i te faito toparaa o te hoê fenua i te pae totiale e i te pae politita. Ia hiˈohia ratou paatoa, na ratou e faaite mai i te huru mau o te totaiete taata.”

Te na ô ra te feia aravihi e aita teie fifi i naeahia aˈenei i teie faito e te ino noa ˈtura e aita e itehia ra te hopea. Eaha te tumu o teie huru tupuraa? Te vai ra anei te ravea? Na te mau tumu parau i muri nei e tuatapapa i teie mau uiraa.

[Faaiteraa i te fatu o te hohoˈa i te api 3]

Boy on left: UN PHOTO 159243/J. Isaac

U.S. Navy photo