Ua vaiiho te Atua ia ite mâua ia ˈna

I TO te arii ra o Davida ineineraa i te tufa i te tiaraa arii i ta ˈna ra tamaiti o Solomona, ua horoa oia i teie aˈoraa ia ˈna e: “Ia ite hua oe i te Atua o to metua nei, a haamori ai ia ˈna ma te aau mau, e ma te tia roa: e imi hoi Iehova i te mau aau atoa ra, e te ite ra oia i te mau manaˈo atoa. Ia imi oe ia ˈna ra, e itea ˈtu oia e oe; a faarue râ oe ia ˈna, e faarue roa mai oia ia oe.”—Paraleipomeno 1, 28:9.

Ua tupu mau â te reira i nia iho ia mâua. Ua imi mâua i te Atua, e ua iteahia oia e mâua—i muri noa ˈˈe râ i te raveraa e rave rahi mau eˈa hape. Te tiaturi nei râ mâua e ua ite Iehova e ua niu-puai-hia to mâua mau manaˈo i nia ia ˈna e i ta ˈna taviniraa, e ua vaiiho oia e ia iteahia oia e mâua. O ta te aamu ïa i muri nei e faatia ra.

E maha taeae matou, o tei paari i Floride, i Marite. E tabula ohipa teiaha ta to matou metua tane, e taata tunu maa oia no te faaamu i te utuafare, na Mama e haapao i te fare, e e itea na ia matou, na tamaroa e maha, i te ohipa mai te tâpûraa aihere, te opereraa i te mau vea—te mau ohipa atoa e nehenehe e turu i te imiraa no te utuafare. E katolika o Mama, e e baptiste o Papa. Ua tiaturi matou paatoa i te Atua e te Bibilia, aita râ matou i ohipa noa ˈˈe ia au i te reira, e mea varavara matou i te haere i te pureraa. I te omuaraa o te mau matahiti 1970 te rooraahia te parau no te hau, te piripou patiti avae elephani, te rouru roroa, e te upaupa rock. Ua ohipa teie mau mea atoa i nia i to matou oraraa.

I te matahiti 1982 noa to e piti o matou, o Scott e o Steve—24 e 17 matahiti to raua tataitahi—anaanatae-mau-raa i te Bibilia e te haapeapea-rahi-raa no nia i te mau huru tupuraa iino o te ao nei. Na Scott iho ta ˈna ohipa hamani fare. Mea hoona mau, e ua haere mâua toopiti e faaea i roto i te hoê piha rahi. Ua taahoa roa mâua i te haere-noa-raa i roto i te mau fare inuinuraa e i taua huru oraraa ra e ua ite mâua e te vai ra te hoê huru oraraa faahiahia aˈe i te tahi atu vahi. Ua haamata mâua i te hiaai i te mau mea i te pae varua. Ua tauturu te taio-tamau-raa i te Bibilia ia mâua ia hinaaro hau atu â i te ite e te maramarama no nia i te Parau a te Atua.

Ua haamata mâua i te haere i roto e rave rahi mau ekalesia i te mau sabati. Ua haere mâua i roto i taua mau ekalesia ra i pihai iho noa mai i to mâua fare i Lake Worth, i Floride, e horoahia na i te oreroraa parau sabati e 25 minuti no nia i te horoaraa i te moni. “A horoa rahi mai, a horoa ma te rahi mau,” o te parau ïa a te orometua a piˈo noa ˈi oia na mua mai i te pupiti. E faahaere pinepine na ratou i te mereti moni e toru taime i te putuputuraa hoê, e hoˈi na te rahiraa i te pae hopea e aita ta ratou e moni faahou. Ua haere mâua i roto e rave rahi mau ekalesia, ua itehia ia mâua e te faahaere atoa ra ratou i te mau mereti haaputuraa moni e te faatupu ra ratou i te tahi mau amuimuiraa e te mau hoa.

Faaarahia no nia i te mau Ite no Iehova

Ua tiaturi roa mâua i te mau haapiiraa o ta mâua i manaˈo e no roto mai te reira i te Bibilia, e ua farii mâua i te reira no te mea e feia tuatapapa faaroo aravihi te mau orometua. Ua horoahia te hoê o te mau haapiiraa no nia i te mau haamoriraa i Marite, e o te mau Ite no Iehova to nia roa i te tabula. Ua faaarahia matou e aita ratou e tiaturi nei ia Iesu, e Bibilia iho â ta ratou, eita ratou e haere i nia i te raˈi, e te tiaturi nei ratou e aita e po auahi. Papu maitai, ua turai teie mau parau atoa ia faaoti mâua e mea hape te mau Ite.

Tae roa ˈtu i taua taime ra e itoito puai to mâua, aita râ i tuea i te ite papu. (Roma 10:2) Ua ite mâua i te parau o ta Iesu i faahiti i roto i te Mataio 28:19, 20—e tia ia mâua ia poro i te parau apî maitai e ia faariro i te mau taata ei pǐpǐ. I taua taime ra e apiti na mâua i te hoê ekalesia e 2000 melo piihia Oire Bibilia, tei roto hoi mâua i te hoê pǔpǔ ui apî tau 100 taata i rotopu i te mau matahiti 17 e 30. Ua tamata o Scott i te horoa i te tahi huru pororaa ia ratou—aita râ i manuïa.

No reira ua haamata mâua i ta mâua iho pororaa. Ua noaa ia Scott i te manaˈo e haamau i te hoê vahi iti i te hoo-pâte-raa tauihaa o taua oire ra e e pûpû i te mau api parau iti e te mau Bibilia. O te ohipa ïa o ta mâua i rave. Ua haere mâua i roto i te hoê fare hooraa buka “kerisetiano” no taua vahi ra e ua hoo mai mâua e rave rahi mau api parau iti e te mau Bibilia, ua haere mâua i te hoê vahi hoo-pâte-raa tauihaa, ua rave mâua e piti avae raau, ua tuu mâua i te hoê iri na nia iho ei airaa maa, ua vauvau mâua i ta mâua mau api parau iti e te mau Bibilia, e ua tamata mâua ia riro ei ‘feia rave i te parau, eiaha ei feia faaroo noa.’—Iakobo 1:22.

A mairi noa ˈi te mau hebedoma, ua maraa te mau taviniraa i te vahi hoo-pâte-raa tauihaa mai tei piihia na, e te pûpûraa i te mau papai na roto i te reo beretane e te reo paniora atoa. E Bibilia atoa ta mâua, e 30 huru api parau iti taa ê, e e pine no te taupoo atoa o te na ô ra “Te here ra te Atua ia oe.” Maa taime i muri iho, ua hoo mai o Scott i te hoê matini neneiraa hohoˈa no te peni i te mau poroi iti bibilia i nia i te mau piriaro—o te na ô ra e: “Ua taio anei oe i ta oe Bibilia i teie mahana?,” “Te aniani ra anei oe e no te aha vau e ata ˈi? Tei roto o Iesu i to ˈu mafatu,” e te vai atu â. Te na ô ra te hoê poroi “Apokalupo” e te hoê hohoˈa o na taata faahoro puaahorofenua e maha.

Ua manaˈo mâua e, na roto i te omonoraa i te mau piriaro na te mau vahi atoa, te horoa ra mâua i te hoê faaiteraa muhu ore. I te mau mahana maa e te mau sabati atoa, mai te hora 8 i te poipoi e tae atu i te hora 1 i te avatea, e ite-maitai-hia na te mau taviniraa i te vahi hoo-pâte-raa tauihaa. Ia hahaere outou na te hoê tapearaa pereoo e ia ite outou i te mau api parau iti i nia i te mau pereoo—ua haere ïa mâua na reira. E horoahia na te mau papai atoa ei ô, noa ˈtu e mea iti roa te moni o te horoahia mai. I te hoê matahiti ua numera mâua i ta mâua haamâuˈaraa, e ua hau atu i te 10 000 dala.

Ua farerei mâua i te hoê Ite no Iehova

I te hoê taime, a au noa ˈi mâua i te hoê o te mau vahi tahatai i Bonita Springs, ua piri mai te hoê taata paari ia mâua e ua parau mai oia e ua ite o ˈna i te mau poroi tei tapirihia i nia i to mâua pereoo e to mâua atoa mau piriaro. Ua haamata o ˈna i te paraparau no nia i te Bibilia e i te haaferuri ia au i te mau Papai. Ua tatara oia i te manaˈo i roto i te Ohipa 2:31, ma te ani e: “Ahiri e te vai ra te hoê po auahi ura e ahiri e o te feia iino noa o te haere atu i reira, no te aha ïa te Bibilia e parau ai e tei roto atoa o Iesu?” Ua tamau â oia i te paraparau, no nia atoa e rave rahi atu â mau irava. I te pae hopea, ua na ô atura o Scott e: “Eita e ore e Ite no Iehova oe.” Ua pahono mai oia e: “E, o vau nei ïa.” Ua parau o Scott i muri iho e: “Aita outou e tiaturi nei ia Iesu.” E 20 minuti i muri iho, ua aparau te Ite no nia ia Iesu, aita râ te reira i haaputapû noa ˈˈe ia mâua.

Ua tamau noa mâua i te rave i te mau taviniraa i te vahi hoo-pâte-raa tauihaa i te mau hopea hebedoma. Ua rave mâua i te reira a toru matahiti—ma te tiaturi noa e tei ia mâua ra te parau mau e te rave ra mâua i te ohipa tia. Ua apiti noâ mâua i te mau ekalesia, hoê ekalesia i te mau po sabati atoa, e aita mâua i mauruuru noa ˈˈe i te mau ekalesia o ta mâua i haere. Ua pau te mau ekalesia atoa ia mâua, no reira i te hoê po ua faaoti aˈera mâua e haere i roto i te hoê o te “mau ekalesia a te mau Ite no Iehova,” mai ta mâua i pii na. E haere mâua e poro ia ratou no nia ia Iesu. Ua itea ia mâua i te vahi nohoraa i roto i te buka niuniu e ua haere atu mâua i te hoê po sabati. I to mâua iteraa e aita ta ratou e putuputuraa i te po sabati mai te tahi atu mau ekalesia atoa, ua faaoti aˈera mâua e aita mau ratou e tiaturi ra ia Iesu. Ua ite mâua i te haapiiraa buka i te po monire i nia i te iri e papaihia ˈi te mau hora putuputuraa. Ua hoˈi faahou â mâua ma te afai i ta mâua mau Bibilia e ma te oomo i to mâua mau piriaro. Te haamanaˈo ra mâua i te mau minuti o ta mâua i rave no te faaoti eaha te piriaro o ta mâua e oomo—eaha te piriaro o te riro ei faaiteraa maitai. Ua tapae oioi atu mâua i reira, e ua haafatata mai te tahi mau taeae ia mâua. E mau taata mahanahana e te maitai ratou. Ua tauaparau tia roa ˈtu mâua ma te hohonu no nia i te Apokalupo. Ua ani mai ratou ia mâua ia faaea no te putuputuraa. Ua horoa ratou na mâua i te buka Tahoêhia i roto i te haamoriraa, e ua parahi atura mâua.a Ua haamata te hoê taeae i te haapiiraa na roto i te pure.

Ua faaroo maite mâua. I te pae hopea, ua parau oia e: “Na roto i te iˈoa o Iesu. Amene.” Ua hiˈo mâua ia mâua iho ma te maere rahi. “Ua faaroo maitai anei tâua ia ˈna? Ua pure oia na roto i te iˈoa o Iesu!” I taua taime ra mai te huru ra e ua araara to mâua mata e ua topa te hoê poa iˈa. Mai te peu e e mafatu tia to mâua, tera te taime no te faaroo. Ua ani te taeae ia matou paatoa ia huri i te pene 21 o te buka ra Tahoêhia i roto i te haamoriraa, no nia ïa ia Iesu e e ere oia i to teie nei ao. Aita ˈtu e haapiiraa maitai aˈe. No nia ïa i te oraraa e te taviniraa a Iesu, te mau mahana hopea, e te tiaraa amui ore. Ua faaroo mâua i te feia apî ia pahono i nia e rave rahi mau manaˈo o ta mâua i ore i ite aˈenei. I muri iho faahou, ei faaotiraa i te putuputuraa, ua pure te taeae na roto i te iˈoa o Iesu!

Ua faatamaahia mâua i te pae varua

Ua haere mâua i roto i te piha ma te hiaai i te parau mau, e to reira oia, aita i atea roa. Ua ite atura mâua e ua faatamaahia mâua i te pae varua, e eita mâua e hoˈi faahou i roto i te hoê ekalesia. I te po i muri iho, a pua ˈi mâua i te ahu i roto i te hoê fare puaraa ahu, ua ite mâua i te hoê apǎpǎraa vea Te Pare Tiairaa eA ara mai na! i nia i te matini opereraa soda—e 150 paha. Aita mâua i taio aˈenei i te reira na mua ˈˈe, i teie nei râ ua ohi mâua i te reira, no te mea ua anaanatae mâua i te mau tumu parau e rave rahi i roto.

Ua ani te hoê o te mau tumu parau e, “Te tiaturi ra anei outou i te Toru Tahi?” Te tahi atu uiraa, “Te vai mau ra anei te hoê po auahi?” I roto i te hoê A ara mai na! te vai ra te hoê tumu parau no nia i te mau hohoˈa. I taua po ra ua taio o Steve i te vea no nia i te Toru Tahi, ua rave oia e rave rahi maimiraa, ua hiˈo oia i te mau irava atoa, e ua faaara oia ia Scott i te hora 12 e te afa i te poipoi no te mau mea o ta ˈna i haapii. I te mahana i muri iho, i te mahana toru, i muri aˈe i te ohipa, ua taio o Steve i te tumu parau no nia i te po auahi. Ua haaferurihia oia i nia i te Ioane 11:11, i reira Iesu i te parauraa e te taoto ra o Lazaro. I to Steve iteraa ia Scott, ua parau atu oia e: “Aita ta ˈu Bibilia e haapii ra e te vai ra te hoê po auahi ura.” I muri aˈe i te taioraa i teA ara mai na! no nia i te mau hohoˈa e te mau huru taa ê o te satauro, ua faarue mâua i ta mâua mau satauro i nia i te hoê pereoo ohiraa pehu a hiˈo noa ˈi i te faautaraahia te reira. Ua hiˈo mâua ia mâua tataitahi, ua tairiiri mâua i to mâua upoo, e ua ata mâua. Ua ite mâua e ua itea ia mâua i te tahi mea taa ê—te parau mau.

Hoê mahana i muri iho ua tae mai e piti afata. E 5 000 api parau iti to roto o te na ô ra e mai te peu e aita oe i tatarahapa, e haere oe i roto i te po auahi. Ua ite mâua i teie nei e aita te rahiraa o teie mau api parau iti i tuea i te haapiiraa a te Bibilia. Ma te haama rii, ua apiti faahou mâua i te haapiiraa buka i te po monire e ua afai atu mâua e rave rahi mau api parau iti ta mâua. Ua ani aˈera mâua e, “Mea tano anei teie api parau iti?” I te hoê po ua hiˈopoa mâua i te mau api parau iti atoa. Fatata hoê anairaa api parau iti to raro i te tahua; aita hoê aˈe o ratou i tuea i te haapiiraa a te Bibilia. Ua faarue pauroa mâua i te reira. Ua ite mâua e mea faufaa to mâua faaroo ite-apî-hia mai no to mâua iho ora e to te feia o ta mâua i poro. Ua hinaaro mâua e reva no te haapii i te Bibilia ma te ore e haafifi-noa ˈˈe-hia.

Ua haere atura mâua i Alaska. I ta mâua putuputuraa matamua i reira, ua ani mâua i te hoê matahiapo e e haapii anei o ˈna ia mâua i te mau mahana atoa. Te manaˈo ra vau e ua faaroo te taatoaraa i ta mâua aniraa. Ua haere maitai mâua i mua, ua oti te buka E ora e a muri noa ˈtu, e ua hinaaro mâua e bapetizo i te hoê o te mau tairururaa e piti mahana.* Ua tia râ ia mâua ia tiai maa taime rii. Ta mâua tapao oia hoi te riroraa ei pionie. Ma te manaˈo-ore-hia, ua maˈihia to mâua metua tane, e ua tia ia mâua ia hoˈi atu i Floride no te tauturu ia ˈna.

Ua naea ia mâua i te paari i te pae varua

I Floride ua haere maitai mâua i mua, ua oti te buka ra Tahoêhia i roto i te haamoriraa, e i muri iho ua bapetizohia mâua i te matahiti 1987. E 11 avaˈe te maoro mai te taime i haamata ˈi mâua. I reira iho, ua riro mai mâua ei mau pionie tauturu no e ono avaˈe e i muri iho, ei mau pionie tamau. Hoê matahiti e te afa noa i muri iho, ua nominohia mâua toopiti ei mau tavini tauturu. E piti matahiti i muri aˈe i te bapetizoraa, ua tavini mâua i te Betela no Brooklyn, te tavini noâ ra o Scott i reira i teie mahana e ua haapii oia i te reo tinito e piti matahiti. Te tavini ra o Steve i teie nei i Moscou, i Rusia, ei pionie tamau. Ua itea ia mâua toopiti i te parau mau e ua tano mau te maimiraa i te reira i te faataaraa a te Maseli 2:1-5: “E tau tamaiti, ia farii mai oe i ta ˈu nei parau, e ia vaiiho maite i ta ˈu parau i pihaiiho ia oe; ia fariu mai i to tariˈa i te paari; e ia imi to aau i te ite ra; ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.”

Mea nafea o Steve i te taeraa i Moscou

I to ˈu faaearaa i New York, i reira mea anaanatae aˈe te ohipa pororaa ia ite anaˈe i te tahi atu reo—e ma te manaˈo e peneiaˈe fatata roa Iehova i te iriti i te uputa i Rusia—ua faaoti au e haapii i te reo rusia. I taua tau ra, a tavini noa ˈi au i te Betela no Brooklyn, ua haamata vau i te apiti atu i te haapiiraa buka na roto i te reo rusia. Hoê anaˈe haapiiraa buka na roto i te reo rusia i te mau mahana pae. A mairi ai te taime, ua haamata vau i te faaô hau atu â i roto i te pǔpǔ rusia. Ua apiti au ia ratou i roto i te ohipa pororaa, e mea oaoa roa hoi no te haerea mahanahana o te feia no Rusia. Ua papai au i te Pu taviniraa no te ani e ia tauihia vau i roto i te pǔpǔ rusia. Ua oaoa roa vau i to ratou fariiraa i teie aniraa.

I te hoê mahana i te haamoriraa poipoi i te Betela, ua parau Milton G. Henschel, te peretiteni a te Watch Tower Bible and Tract Society, i te fetii e e horoahia te hoê tabula taa ê. I muri iho ua faaite oia e ua faatiahia te mau Ite no Iehova i mua i te ture i Rusia e te fanaˈo ra to matou mau taeae i teie nei i te tiamâraa i te pae no te haamoriraa. Eita vau e manaˈo e e haamoe te mau melo atoa o te Betela i taua poipoi ra i to matou oaoa i te faarooraa i taua mau parau apî faahiahia ra. Ua manaˈo vau i tera taime e e haamaitairaa taa ê mau te ôraa ˈtu i roto i taua tuhaa fenua apî ra e te rahi.

Ua haamata vau i te papai i te hoê taeae rusia o Volodeya te iˈoa, e faaea ra i Krasnodar, i Rusia. Ua titau manihini mai oia ia ˈu ia haere mataitai ia Rusia. No reira i te avaˈe tiunu 1992, ua faanaho vau i ta ˈu afata tauihaa e ua tere atu vau i Moscou. I to ˈu tapaeraa ˈtu, ua oaoa roa vau i te iteraa i te taeae Volodeya e tiai noa ra i te tauraa manureva. Ua faaea vau i ǒ te taeae Stephan Levinski—45 matahiti i roto i te parau mau. O ˈna te Ite matamua o ta ˈu i farerei i Moscou, e ua faaea oia e rave rahi matahiti i roto i te fare auri no to ˈna tiaraa no te parau mau. Mea faahiahia mau â te farii popou o te mau taeae.

Tei Moscou ïa vau, mea iti roa hoi to ˈu ite i te reo. I taua tau ra, e maha noa amuiraa, e e au ra e ua matau matou i te mau taeae atoa. Mai reira mai, na roto i te tamata-pinepine-raa, ua haamaoro vau i ta ˈu mau parau faatia no te tomo i roto i te fenua. Ua nehenehe au e rave i te ohipa i te tahi mau taime no te aufau i ta ˈu iho mau haamâuˈaraa. To ˈu fifi rahi roa ˈˈe, o te haapiiraa ïa i te reo rusia no te paraparau e no te fanaˈo i te pae varua i te mau putuputuraa. Ua ô rii mǎrû noa mai, e papu maitai, te na reira noa nei â vau.

Ua fanaˈo vau i te haamaitairaa taa ê e apiti atu i roto e rave rahi tairururaa e e ite i te rahiraa maere mau o te feia i bapetizo. Ua riro te iteraa i te itoito rahi o to matou mau taeae i ǒ nei ei tupuraa o te haapaari rahi mau i te faaroo. Eita vau e taui noa ˈtu i te reira e te tahi atu mea. Te tavini nei te rahiraa o te mau taeae e mau tuahine o ta ˈu i farerei, o te haapii noa ra aore ra no bapetizo-noa-hia aˈenei i to ˈu tereraa ˈtu i reira, i teie nei ei mau pionie ma te taime taatoa aore ra ei mau tavini tauturu aore ra ei mau melo no te Betela i Solnechnoye, i pihai iho ia St. Pétersbourg, i Rusia.

Te amuiraa o ta ˈu e haere nei, e 530 rahiraa taata ïa o te putuputu mai nei i te mau sabati atoa, e i te mau avaˈe atoa, te naeahia nei ia matou te faito au noa e 12 feia poro bapetizo-ore-hia apî. Teie te mau numera hopea nei no ta matou amuiraa, oia hoi e 380 taata poro, e 3 matahiapo, e e 7 tavini tauturu. Te faatere nei ta matou amuiraa hau atu i te 486 haapiiraa bibilia i roto i te utuafare. I te avaˈe febuare 1995, ua fanaˈo vau i te haamaitairaa taa ê e haere atu i roto i na haapiiraa buka e 29 a te amuiraa no te horoa i te hoê oreroraa parau no te taviniraa. Ua tere au i roto e maha pǔpǔ i te hebedoma. Mea rahi roa atoa ta matou ohipa na mua ˈˈe i te tairururaa tataitahi e te mau uiraa no te feia e bapetizo. I te avaˈe me 1995, ua faatupu matou i te hoê mahana tairururaa taa ê i reira e 30 o tei bapetizohia i roto i ta matou amuiraa. I te taatoaraa, e 607 o tei bapetizo e tau 10 000 o tei putuputu mai. I te tairururaa mataeinaa i te tau veavea, e 24 no ta matou amuiraa i roto i na 877 taata o tei bapetizohia! E 13 pionie i roto i ta matou amuiraa e e 3 pionie taa ê. Te faatere nei ratou paatoa tau 110 haapiiraa! I teie nei, e 132 taata poro bapetizo-ore-hia ta matou.

I ta matou oroa Haamanaˈoraa i te matahiti 1995 ra, 1 012 taata o tei putuputu mai! Ua tono mai te Taiete i te hoê taeae polonia, o Mateysh, i roto i ta matou amuiraa. Ua faatuitehia oia i roto i te Haapiiraa faaineineraa no te taviniraa e e riro oia ei tauturu rahi no matou. E toru matahiapo to matou i teie nei. E haamauhia ïa te hoê amuiraa apî, e e vahihia ta matou tuhaa fenua—piri roa i te hoê mirioni taata—i roto e piti tuhaa. E 200 ra taata poro i roto i na amuiraa tataitahi e piti. E piti matahiapo i roto i te hoê amuiraa, e hoê noa ïa i roto i te tahi. Te fatata maira te tahi atu tairururaa ta matou, no reira i teie nei te hiˈopoa ra matou i te mau uiraa e e 44 taata o te ineine ïa no te bapetizoraa i reira. Mau faahopearaa maere mau! E paradaiso pae varua mau â! Auê te faahiahia e! Te ohipa mau ra te rima o Iehova. E au ra e te tere oioi ra to ˈna pereoo i Rusia i teie nei taime. Mai te avaˈe atopa 1995 ra, tau 40 amuiraa i Moscou. E ohie noa i te taipiti ahiri e mea navai te matahiapo.

E parau tahito te mau mahana o ta mâua mau taviniraa i te vahi hoo-pâte-raa tauihaa. Tei te Betela no Brooklyn o Scott, te tavini ra o Steve ei matahiapo i roto i te hoê o te mau amuiraa no Moscou—auê mâua toopiti i te mauruuru i te Atua i te vaiihoraa e ia iteahia oia e mâua. Te pure nei mâua e ia imi â te mau mirioni taata ia ˈna e e vaiiho te Atua e ia iteahia oia e ratou.—Faatiahia e Scott e Steve Davis.

[Nota i raro i te api]

[Hohoˈa i te api 20]

Scott

[Hohoˈa i te api 21]

Steve

[Hohoˈa i te api 23]

Hau atu i te 530 taata e putuputu nei i roto i te hoê amuiraa no Moscou i te mau sabati atoa