E nehenehe anei e tiaturi ia vetahi ê?

“Tei roto o ˈna i te feia varavara roa i rapaeau i te utuafare ta to ˈu mau metua i tiaturi taatoa. . . . Ua riro oia ei taata maitai e te aupuru o te ore roa e rave i te hoê noa ˈˈe mea no te haamauiui ia matou. . . . Tei roto oia i te feia varavara roa i roto i to ˈu oraraa o ta ˈu i tiaturi taatoa.”

MEA na reira to te hoê vahine apî faataaraa i te tiaturi o ta ˈna i tuu i nia i to ˈna taote fetii. Te vahi peapea râ, ua hape roa oia i te tiaturiraa ia ˈna. Mai te 16raa mai â o to ˈna matahiti, ua hamani ino teie taote ia ˈna i te pae taatiraa. “Ua haavare oia ia ˈu e ua maheahea roa vau,” o ta ˈna ïa i parau i te mau tia o te tiribuna, o tei faaoti i te haavaraa.—The Toronto Star.

Ua ore roa te tiaturi na te mau vahi atoa

E ohie roa te tiaturi, e au oia i te hoê tiare haviti e te paruparu atoa râ, i te hutihutihia e te taataahihia. Te faahuˈahuˈahia nei oia na te mau vahi atoa! Ua parau o Michael Gaine, e papai parau oia na mua ˈˈe no te hoê karadino e te hoê arii epikopo i te fenua Beretane, e: “I mutaa ihora, e tiaturi na te mau taata atoa i te perepitero. E tuu atu te mau utuafare i ta ratou mau tamarii i roto i to ˈna rima. E ere mai te reira faahou i teie nei. Ua ere-roa-hia matou i taua tiaturi ra e a muri noa ˈtu.”—The Guardian Weekend.

Te taviri nei te feia tapihoo i te tahi atu feia tapihoo. Te haavare nei te feia haapuroro poroi faatiani aravihi e te monihia nei ratou i nia i te tua o te feia hoo taoˈa. Ua eiâ te hoê tia taiâ ore i te faufaa turuutaa a ta ˈna iho mau taiete, ma te faaere i ta ˈna mau rave ohipa i te tuhaa moni haaputuhia no ratou. Te eiâ tamau nei te mau rave ohipa i to ratou mau paoti ohipa. Ei hiˈoraa, ua tapao te hoê tabula e “tau 20 miria dala marite i te matahiti e pau nei i te mau taiete tapihoo no Kanada na roto i te mau eiâraa a te feia no roto i te taiete.”—Canadian Business.

E ere te taatoaraa o te feia politita te ore e nehenehe e tiaturihia. Tera râ, mea iti roa te taata e hitimahuta nei i te mau tabula mai teie te huru: “E piti hebedoma i muri aˈe i te taparahi-pohe-raahia te hoê o te mau vahine politita aimârô-roa ˈˈe-hia no Farani, te hohora tahaa ra te mau mutoi i te mau taviriraa politita e te mau opuaraa taparahi taata o tei tapoˈi maoro noa na i te mau ohipa huru ê a te hau faatere i nia i te pae miti Mediteranea.”—The Sunday Times, Lonedona.

Mea pinepine, te tiaturi i rotopu i te feia piri roa i te ofatihia. Te taiva nei te mau tane e te mau vahine i to ratou hoa faaipoipo. Te hamani ino nei te mau metua i ta ratou mau tamarii. Maheahea roa te mau metua, ta ratou mau tamarii te tumu. I te matararaa te mau pueraa parau tahito a te Stasi, te pu mutoi huna no Helemani Hitia o te râ tahito, ua itehia mai te hoê “faanahoraa haavare rahi” i ravehia e te feia tei manaˈohia e e hoa. Te na ô ra te hoê tabula e, maoti te hoê faanahoraa haavareraa, “e mau matahuna ta te Stasi i roto roa i te piha fare haapiiraa, te purupiti, te piha taotoraa, e tae noa ˈtu te piha faˈiraa hara.”—Time.

I Irelane, ua papai te hoê papai vea e: “Ua haavarehia matou, ua aratai-hape-hia matou e ua faaohipahia matou e ua hamani-ino-hia matou e ua haavahavahahia e te feia o ta matou iho i tuu i nia i te tiaraa mana.” (The Kerryman) No te mea ua haavare-pinepine-hia ratou, e rave rahi mau taata o te ore e tiaturi faahou nei ia vetahi ê. Eaha ta tatou e nehenehe e rave ia papu ia tatou e aita to tatou tiaturi i niu-hape-hia? Na te mau tumu parau e piti i muri nei e tuatapapa i teie uiraa.