Te hoê po i te Hautiraa taata ora himenehia
Na te taata papai vea a te A ara mai na! i Italia
UA FAAEA taue atura te taˈi anoi o te hoê pǔpǔ hauti upaupa o te faaineine ra, e tupohehia ˈtura te mau mori. Te haere maira te taata faatere, o tei farii-popou-hia, i nia i te tahua, ma te haamauruuru i te feia i putuputu mai ma te piˈo te upoo i raro. I muri iho, ma te maniania ore roa, afai atura oia i to ˈna rima i nia e faatere atura ma te aparaa rima rahi i te pǔpǔ hauti upaupa no te hoê omuaraa pehepehe. Ua ite aˈena anei outou i teie huru tupuraa peepee, te haamataraa o te hoê hautiraa taata ora himenehia? E hinaaro anei outou? Eaha mau na te hoê hautiraa taata ora himenehia, e nohea mai te reira?
O te hoê ïa hautiraa o te hoê darama (hautiraa aai) aore ra o te hoê hautiraa arearea (tauaparauraa tamau-aau-hia no te faaataata) apitihia e te upaupa e tei vahihia na roto hoê aore ra e rave rahi paeau, aore ra te mau tuhaa; e hauti mai te mau taata i ta ratou mau tuhaa ma te himene. E rave rahi ohipa te hinaarohia no te hoê hautiraa taata ora himenehia: te aamu o te darama, aore ra te buka nainai, (te ohipa a te hoê taata papai aore ra rohipehe); te upaupa papaihia e te hoê taata; te himene; te oriraa; te tahua; e te mau ahu. Hoê â huru rii te mau hohoˈa taviri himene e te mau hautiraa taata ora himenehia, e mea rahi aˈe râ tei titauhia no te mau hautiraa taata ora himenehia. Peneiaˈe, ua ite aˈena outou i te mau hohoˈa tavirihia, mai West Side Story aore ra Oklahoma, e himene te feia hauti i te tahi mau taime maoti râ i te paraparau.
Ua rau te huru hautiraa taata ora himenehia: Ta Wolfgang Amadeus Mozart e Gioacchino Rossini tei faataahia ei mea faahiahia; ta Giuseppe Verdi, ei mea itoito e te putapû; ta Richard Wagner, mea fifi, mǎrû, e te etaeta; ta Georges Bizet, e mea rahi te peni e te oraora; ta Giacomo Puccini, no te here.
Te tuea ra te omuaraa o te upaupa e te himene e te haamataraa o te aamu o te taata nei. (Genese 4:21; 31:27) E rave rahi mau tauihaa faataˈi upaupa tei hamanihia i te roaraa o te oraraa o te huitaata nei, e i te senekele 11 o to tatou nei tau, ua haamauhia te hoê faanahoraa no te papai i te upaupa. Te parauhia ra i roto i te mau buka faahororaa e ua haamata te hautiraa taata ora himenehia i Florence, Italia, i te hopea o te senekele 16 o to tatou nei tau. Ua faaohipahia e rave rahi mau parau Italia i roto e rave rahi atu â mau reo tei faataa i te mau tuhaa o teie huru hautiraa (opera, libretto, soprano, tenor), o te haapapu ra i te mau vahi tumu o te hautiraa taata ora himenehia. I te mea hoi e ua parare te hautiraa taata ora himenehia na te mau tuhaa e rave rau i Europa, e rave rahi taime to ˈna tauiuiraahia. I teie mahana, e itehia te mau fare hautiraa taata ora himenehia na te ao nei.
No te ite hau atu, e ite tatou i te hoê tauaparauraa i rotopu ia Antonello, o te faaea ra i Milan, e to ˈna hoa Max, na Helevetia mai nei oia i te ratereraa mai. Tei roto o Antonello e o Max i te fare hautiraa taata ora La Scala, i Milan, i te hoê po otahi e te putapû, hoê o te mau fare hautiraa tuiroo roa ˈˈe.
I te fare hautiraa taata ora himenehia
Max: Ua taio vau i roto i te buka ta oe i horoa mai e ua avarihia te fare La Scala i te matahiti 1778, e i muri iho ua ino roa i roto i te hoê topitaraa i te piti o te Tamaˈi Rahi, ua patu-faahou-hia e ua avarihia i te matahiti 1946. Te parau-atoa-hia ra i roto i te buka e ô hau atu e 2 000 taata.
Antonello: Te reira iho â. Mai ta oe e ite ra, ua patuhia te fare mai te maiuu o te puaahorofenua te hohoˈa, mai te rahiraa o te fare hautiraa taata ora patuhia i te mau senekele 17 e tae atu i te 19. Te vai ra e ono tahua o te mau piha iti no te mataitairaa i roto i te fare; to mua te vahi o te pǔpǔ hauti upaupa. E ere La Scala te fare tahito roa ˈˈe, e ere atoa i te fare hautiraa taata ora himenehia rahi roa ˈˈe na te ao nei. Te tui nei to ˈna roo no te mea ua ravehia te mau faaineineraa hautiraa matamua o te mau hautiraa taata ora himenehia e rave rau i reira, e ua faaaravihihia e rave rahi feia faatere e te feia himene tuiroo i reira. O Arturo Toscanini te hoê o ratou, te hoê taata faatere tuiroo o te nehenehe e hauti aita e parau himene papaihia. Ua parauhia e mea tano maitai te mau taˈiraa reo, e mea faufaa roa te reira no te hoê fare hautiraa taata ora himenehia no te mea, aita e mau taoˈa haapuai reo e te mau matini haapuroro no te haaparare i te upaupa aore ra te mau reo i reira.
Max: E nehenehe anei oe e parau mai no nia i te feia himene?
Antonello: Te vai ra e ono huru reo. Toru reo tane—basse, baryton, e te tenor—e toru reo vahine—contralto, mezzo-soprano, e te soprano. Te basse e te contralto e mea hohonu roa ˈˈe, area râ te tenor e te soprano mea teitei roa ˈˈe i roto i te pǔpǔ taitahi. Te baryton e te mezzo-soprano o te mau reo arai ïa.
No te riro mai ei taata himene maitai no te hautiraa taata ora himenehia, na mua roa e titauhia ia ˈna i te hoê reo navenave roa e ia haapii oia e rave rahi mau matahiti i te hoê fare haapiiraa taa ê. Mai te peu e aita teie huru haapiiraa, o te haapii i te taata nafea ia faaohipa taatoa i te mau huru aravihi o to ˈna reo, eita oia e nehenehe e riro mai ei taata himene hautiraa taata ora himenehia. E ite oioi oe i te mau taata himene. Te ite ra oe e noa ˈtu e i te tahi mau taime, te hauti ra ratou i te tiaraa o te mau taurearea tamaroa e tamahine here, e feia paari te rahiraa o ratou e te pautuutu atoa. Ua ite anei oe e no te aha?
Max: Aita, te hinaaro nei au e ite.
Antonello: No te mea ia naeahia ia ratou te faito teitei o to ratou toroa, ua tae ratou i to ratou paariraa e e titauhia i te hoê tino pautuutu no te himene i te hautiraa taata ora himenehia. E ere i te mea ohie ia titau tamau i te mau nota puai teitei i te roaraa o te hoê area taime maoro. Ua parauhia e ua ino te roo o te vahine himene soprano ra o Maria Callas, tei himene pinepine i ǒ nei i La Scala i te roaraa o te matahiti 50, i muri iho i to ˈna haapaeraa i te maa no te haapararai ia ˈna. No reira, Max, maoti râ i te haapao noa i te hohoˈa tino o te feia himene, e tia râ ia oe ia haafaahiahia i to ratou mau reo. A hiˈo! Te haere mai ra te taata faatere. A rave i te hiˈo hautiraa taata ora e ite maitai ïa oe i te feia himene e te taatoaraa o te tereraa. Hoê noa râ aˈoraa: Ia taa maitai ia oe te hautiraa taata ora, a haamau i to oe feruriraa i nia i te upaupa e te himene mai ta tâua i na reira i te tupuraa matamua.
Eaha te ravehia ra i muri mai?
Max: Auê ïa haapopouraa roa e! E mea nehenehe mau te reo o te feia himene. I teie nei, ehia maororaa te faafaaearaa?
Antonello: Tau 20 minuti. Ua ite râ anei oe i te ohipa e tupu ra i muri mai i te roaraa o te taime faafaaearaa?
Max: Aita roa ˈtu.
Antonello: Te hoê atuatu rahi! Arataihia e te hoê taata faatere tahua, e tatara te feia aravihi no te tahua, te feia haapao matini, te feia tamau uira, te feia tamuta, e te tahi atu mau taata rave ohipa i te faaneheneheraa o te tahua ma te tano maitai e e taui faahou te faaneheneheraa o te tahua. I teie mahana, te vai ra i roto i te mau fare hautiraa taata ora himenehia te mau ravea aravihi no te taui oioi noa i te faaneheneheraa o te tahua, i te tahi mau taime noa ˈtu e te tere noa ra te hautiraa. Te faaohipahia ra te hoê ravea o te pape no te faateretere i te tahua, e te mau piha utaraa taoˈa, e te tahi atu mau matini no te faateitei e e tuu i raro te mau tuhaa o te tahua. Te vai ra i roto i te mau fare hautiraa taata ora himenehia atoa te mau taoˈa taa ê aore ra ohipa maere i nia i te tahua—te mau tauihaa o te faatupu i te rupehu aore ra te ata pape, te mau au auahi, te taˈi o te ûa aore ra te mataˈi, aore ra te patiri atoa. E mea maere atoa te mau faahopearaa e te mau ihi o te mau mori ua rau te ito, e te peni o te mori.
Max: A parahi mai, e ite e e faaroo tâua i te hautiraa taata ora himenehia. Eaha râ te ravehia i muri mai i te tahua i te roaraa o te hautiraa?
Antonello: E manaˈo anaanatae te reira, Max. A fanaˈo noa ˈi tâua i te hautiraa, te rave ra te hoê pǔpǔ iti faanaho-maitai-hia i te ohipa i muri mai e i te hiti o te tahua. A feruri na eaha te tupu mai te peu e aita te taata himene, te pǔpǔ himene, aore ra te feia ori i haere i mua i te taime tano. I muri mai i te tahua, e apee te apiti o te taata faatere tahua aore ra te feia i reira i te pǔpǔ hauti upaupa na roto i te parau himene papaihia e e horoa i te feia himene te tapao no te haere i nia i te tahua i te taime tano. E na reira atoa te raatira o te pǔpǔ himene i nia i te feia himene.
Te vai ra te taata pupuhi i te mau parau i ropu i te tahua, faatapunihia i taua vahi ra. Te apee ra oia i te mau aparaa o te taata faatere i te pǔpǔ hauti upaupa i nia i te afata teata hunahia, e na roto i ta ˈna buka nainai, e faahiti te taata pupuhi parau i te mau reni na mua noa mai i te feia himene e ia moe-anaˈe-hia i te taata himene i te hoê reni.
I muri iho, e hiˈopoa te taata faatere i te mau tauiraa o te tahua e te haereraa o te feia hauti e rave rahi i nia i te tahua e e ara atoa oia i nia i te feia tamau uira ia faatano-maitai-hia te mau ihi o te mau mori peni i nia i te mau tuhaa tano o te tahua e i te taime tano. Te vai ra i roto i te fare La Scala e piti tahua faaohu aore ra faahaere i nia, mai te tahi atu mau fare hautiraa taata ora himenehia no te faaohie i te faaineineraa o te tahua e e nehenehe atoa e faatupu hau atu hoê hautiraa i te hoê â taime.
Max: Pauroa teie mau taata e teie mau ohipa no te hoê noa ïa hautiraa taata ora! E mea maere mau!
Antonello: E! I roto i te mau fare hautiraa taata ora himenehia rarahi te vai noa ra te pǔpǔ hauti upaupa, te pǔpǔ himene, e te pǔpǔ ori—tau hanere feia hauti. Te vai ra atu â mai te peu e e taio oe i te feia faatupu i te hautiraa, te feia faaahu, te feia tatai tiaa, te mau tamuta, te feia faanehenehe i te feia hauti, te feia tamau uira, e te taata aore ra hau atu o te hamani i te hohoˈa e te peni i te tahua. Hau atu i te reira, e hinaarohia te feia rave ohipa no te tuhaa parururaa, a te hau, e no te tahi atu mau tuhaa ohipa.
Te mau hautiraa taata ora himenehia niuhia i nia i te Bibilia
Max: Aita anei e vai ra te mau hautiraa taata ora himenehia hutihia mai roto mai i te Bibilia?
Antonello: Oia, e mea rahi. No roto mai i te mau tuhaa atoa te mau tumu parau o te hautiraa taata ora himenehia—te aamu o te mau taata no mutaa ihora, te tuatapaparaa no nia i te mau aamu haavare, te mau aai o te Anotau no Ropu, te mau papai a William Shakespeare e te tahi atu feia papai. Te faahiti ra i roto i te Nabucco, te haapotoraa no te iˈoa “Nebukanesa,” papaihia e te taata papai himene Italia ra o Giuseppe Verdi, no nia i te mau ati Iuda no Ierusalema tei hopoi-tîtî-hia i Babulonia. Ua papai atoa o Gioacchino Rossini, te tahi atu taata papai himene Italia, ia Mosè (Mose) e ua papai te taata faataˈi upaupa no Farani ra o Charles-Camille Saint-Saëns ia Samson et Dalila (Samasona e o Delila). Aita te mau aamu o teie mau darama e tuea maitai ra i te Bibilia, e mea anaanatae ra ia ite e te vai ra i roto i teie na hautiraa taata ora e toru, te iˈoa o te Atua ra Iehova.
Max: Eaha ïa? Ua ite au e ua faahitihia te reira i roto i te mau ohipa a Handel e o Bach, aita râ vau i ite e te vai atoa nei i roto i te mau parau o te hautiraa taata ora himenehia.
Antonello: I te hopea o te Nabucco, te parauhia ra i roto i te himene tahoê no nia ia ‘Iehova Rahi,’ e te faahiti nei te tahuˈa rahi ra o Zekaria i te iˈoa o te Atua. I roto i te hautiraa taata ora himenehia a Rossini, te faahiti ra o Mose ia ‘Iehova,’ e e rave rahi taime te faaiteraahia te iˈoa ‘Iehova’ aore ra ‘Jehova’ i roto i te hautiraa Samson et Dalila.
Max: E mea anaanatae roa.
Antonello: Te vai ra atu â te mau hautiraa taata ora himenehia hutihia mai roto mai i te Bibilia. I rotopu ia ratou, te vai ra Salome na Richard Strauss, Moses und Aron (Mose e o Aarona) na Arnold Schönberg e Debora e Jaele (Debora e o Iaela), na Ildebrando Pizzetti. A hiˈo na râ! E fatata te haamataraa o te tupuraa hopea.
Te hoê po faahiahia roa
Antonello: Ua au anei oe i te hautiraa taata ora himenehia?
Max: Oia mau, no te mea iho â râ, maoti oe i parau mai ia ˈu ia taio i te buka nainai e ua nehenehe vau e apee i te tereraa. Ahani râ aita, e mea fifi ïa.
Antonello: Oia mau, eita iho â e taahia te mau parau atoa e himenehia ra e te feia himene e te pǔpǔ taata, no te mea i te tahi taime, e mea puai aˈe te upaupa i te mau reo, e eita e taahia te mau nota teitei o te mau parau. I roto e rave rahi mau fare hautiraa taata ora himenehia i teie nei, te horoa nei ratou i te mau upoo parau iti aore ra mau nota tei hurihia ia nehenehe te feia e putuputu mai e apee maitai i te hautiraa.
Max: E faanahoraa faahiahia roa te reira, Antonello. Te turai nei te upaupa navenave e te himene ia tatou ia haamauruuru i te Poiete, o tei horoa i te taata te ô o te reo e te aravihi ia papai, ia hauti, e ia haafaufaa i te upaupa. Mauruuru i to oe faafanaˈoraa ia ˈu i teie po putapû.
[Hohoˈa i te api 26]
Te mau parahiraa i roto i te fare La Scala
[Faaiteraa i te tumu]
Lelli & Masotti/Teatro alla Scala
[Hohoˈa i te api 27]
La Scala, Milan, Italia
[Faaiteraa i te tumu]
Lelli & Masotti/Teatro alla Scala
[Hohoˈa i te api 28]
I nia: Te hoê hohoˈa o te hautiraa taata ora himenehia “Samson et Dalila”
[Faaiteraa i te tumu]
Winnie Klotz