Te papai mai nei te feia taio

Te pohe e ati no te taatoaraa I te matahiti i mairi, ua pohe to ˈu teina i roto i te hoê ati purumu, e 18 noa hoi matahiti to ˈna. Ua papu ia outou i to ˈu mauruuru rahi i te mau tumu parau “Te pohe e ati no te taatoaraa.” (8 no tiurai 1992) Ua mauruuru roa vau i te manaˈo e ere te taata o te ore e faaite i te oto rahi i te mea toetoe e te aroha ore. No to ˈu huru itoito, eita vau e faaite tahaa noa i to ˈu mauiui. E mea hape te faaotiraa a te rahiraa i nia ia ˈu. Noa ˈtu e te vai ra te tiaturiraa no te tia-faahou-raa, e titau iho â te mau kerisetiano ia faaite mai te feia tapiri i te here ma te taa i to te tahi huru.

L. R., Italia

Ia taa ê i te rahiraa Te hinaaro mau nei au e haamauruuru ia outou no te tumu parau “Nafea e noaa ˈi ia ˈu te itotito e tia ˈi ia taa ê au i te rahiraa?” (8 no tiunu 1992) Te tamarii haapii i roto i ta ˈu piha haapiiraa e arearea noa ratou e e ananatae rahi noa ratou i te mau faito ahu apî. E mea ino mau no ˈu ia amuimui atu ia ratou. No to ˈu hepohepo rahi aita i noaa ia ˈu te itoito e tia ˈi no te pahono atu. Na teie tumu parau i tauturu ia ˈu ia haapaˈuma i to ˈu mǎtaˈu. Auaˈe te tauturu a Iehova, i te tahi atu taime, ua nehenehe ia ˈu e faaite i to ˈu manaˈo ia ratou. I teie nei ua moe ê to ˈu hepohepo. Mauruuru roa.

M. E., Heremani

E tumu parau tano maitai teie no matou te tamarii haere haapiiraa. E mea maoro to ˈu tutava-noa-raa ia ore vau e fifihia, ma te ore e taa ê i te rahiraa. E rave rahi mau tamatamataraa, e aita vau i nehenehe e faataa i to ˈu tiaraa. I te omuaraa râ o te pitiraa o te matahiti i te haapiiraa tuarua, ua parau vau i mua i ta ˈu piha haapiiraa: “E Ite no Iehova vau. Mea au roa na ˈu te haapiiraa i te Bibilia.” I to ˈu parauraa ˈtu i te reira, eita ïa vau e nehenehe faahou e parau e aore ra e rave i te tahi mea tano ore. E mea fifi roa no ˈu ia faaite i te parau mau i to ˈu mau hoa haere haapiiraa e mea riri roa na ˈu ia taa ê i te rahiraa. I te hoê râ mahana ua parau mai te hoê tamahine e nounou o ˈna i to ˈu huru oraraa e ta ˈu mau tiaturiraa. Mea na reira to ˈu feruriraa i te tauiraa. I teie nei ua papu ia ˈu e ere vau i te mea taa ê—o ratou râ tei taa ê. Te taviniraa i te Atua tera te mea mau!

M. A., Tapone

Pereraa moni Mea maramarama roa e ua tano maitai ta outou mau tumu parau “Te pereraa moni—E onahia anei tatou?” (8 no tiunu 1992), teie râ, aita outou i faahiti noa ˈˈe i te mau parieraa i nia i te mau ohipa taaro. Taa ê atu i te hautiraa pere, te mau taviriraa, te mau matini moni, e vetahi atu â, e nehenehe te parieraa i nia i te mau ohipa taaro e ravehia i te mau taime atoa, i te ao aore ra i te po. Aita i titauhia ia faarue i ta oe vahi raveraa ohipa. Te manaˈo nei au e ua parare atu â teie huru pereraa moni i te hautiraa e vauvauhia ra i roto i ta outou mau tumu parau. Eita noa te parieraa i nia i te mau ohipa taaro e haamâuˈa i te moni, i te taime faufaa atoa râ o te nehenehe e horoahia na te utuafare fetii. Te faaohipahia nei teie taime no te tapao i te mau re e te faahopearaa o te mau hautiraa. Ua riro ïa te pereraa i nia i te mau ohipa taaro ei faahitiraa peapea no nia i teie faanahoraa o te mau mea.

C. Y., Hau amui no Marite

Mauruuru no te haamaramaramaraa mai ia matou no nia i te taata hauti moni mâha ore. Ua faaruru au i te mauiui o te paariraa e te hoê metua hauti moni mâha ore. O Mama anaˈe te metua e e pae tamarii. E hauti hoi oia i te bingo e ono po i te hebedoma, i te mau hebedoma atoa, e te tamau noa nei oia e tae roa mai i teie mahana. O te pereraa moni tei nia i te parahiraa matamua. E taparu na matou ia ˈna ia faaea rii ia matou ra, ia tunu i te tahi maa na matou, aita râ i manuïa. Ua haapae oia i ta ˈna mau tamarii no te bingo. Mauruuru no te tautururaa mai ia ˈu ia taa maitai aˈe i te tumu oia i na reira ˈi.

R. E., Hau amui no Marite