Te “pataraa” i te hohoˈa o te hoê pepe

UA TAMATA anei outou i te pata i te hoê pepe? Ua riro te reira ei ohipa fifi roa e ei tamataraa i to outou faaoromai. E maurere haere noa ratou mai te mea ra e te imi noa ra ratou i te maa e te inu, e mea varavara roa te taime e nehenehe ai outou e pata ia ratou. E tau atu ratou e e iriti ratou i to ratou pererau, e ia tamata anaˈe outou i te faatano i ta outou pata hohoˈa, e tapiri ïa taua pepe haviti mau ra i to ˈna pererau a rere atu ai!

Ua taa iho â ïa ia outou i to ˈu huru i to te hoê hoa no Sydney, i Auteralia, parauraa mai e: “Mai, haere tâua i te Fare Pepe i Mittagong.” I reira ïa vau e ite ai i te mau pepe ma te tapiri roa ˈtu i pihai iho e peneiaˈe e nehenehe vau e pata i te mau hohoˈa i roto i teie vahi faahiahia roa.

I to mâua tomoraa ˈtu i roto i teie vahi i reira te mau pepe e ora tiama ˈi, ua ite atura mâua e tei roto mâua i te hoê vahi o tei hiˈopoahia te ahuarai, tei faataa-ê-hia i te mau tauiraa o te anuvera no rapaeau. Mea faufaa roa te reira ia ora te mau pepe. Na te hiti ia mâua nei, te rere noa ra teie mau animala haihai roa na nia i te mau raau. I to mâua tomoraa ˈtu, ite atura mâua i te hoê pepe peni anani nehenehe mau [parauhia monarque] e ofaa ra i nia i te hoê tumu anani. I Auteralia ua piihia teie pepe te ori haere. Ua tae mai oia i nia i teie motu mai te pae Marite Apatoerau i te matahiti 1870 e i teie nei te vai ra oia i te mau vahi hitia o te râ e tooa o te râ e tae noa ˈtu i pihai iho ia Perth i te hiti tooa o te râ.

Ua faataa mai o Kerry, te vahine aratai, ia mâua e mea nafea teie mau pepe ia apiti na roto i te faatuatiraa to te tahi e to te tahi pae. Teie râ te vahi anaanatae—mai te peu e e riaria taue noa te oni, e maue oia, ma te amo atoa ˈtu i te ufa i nia ia ˈna! A feruri na, te amoraa i te tahi taata hoê â to orua teiaha, e a rere atu ai! I reira, ma to mâua maere rahi, ua ite atura mâua i teie ohipa i te tupuraa—e te rere ra te hoê pepe oni na roto i te mau raau e te ufa i nia ia ˈna.

Oia mau, ua tui te roo o te pepe parauhia monarque na te ao atoa nei no to ˈna mau tere atea. Te na ô ra te buka Nohea mai te ora—Mea tupu noa mai aore ra mea poietehia?a e: “E ora te mau pepe monarque i Kanada i te tau auhune, e e rave rahi o te haere atu i Kalifonia aore ra i Mexico i te tau toetoe. E hau vetahi mau tere i te 3200 kilometera; ua rere te hoê pepe e 130 kilometera i te hoê mahana.” Teie râ te tahi vahi faahiahia: “Te mau pepe o te pou atu i te pae apatoa i te tau auhune, e mau pepe apî ïa o tei ore aˈenei i ite i te mau vahi faaearaa o te tau toetoe. Te mea e aratai ra ia ratou ia ite i teie mau vahi, o te hoê ïa o te mau miterio rahi a te Natura.”—The Story of Pollination.

Ua manuïa anei mâua i te pata i te hohoˈa o teie mau animala maue haere noa? Oia! E au ra e ua matau roa ratou i te taata e hahaere noa ra na roto i to ratou ao haumi e e tau ohie noa ratou i nia i te mau raau e tae noa ˈtu i nia i te upoo o te mau taata! No reira, e mahana maitai roa teie no te feia pata hohoˈa, te feia taviri hohoˈa video iho â râ. Auê te oaoa ia ite i muri aˈe i teie mau hohoˈa hautiuti i te afata teata na roto i te arai o te hoê matini ripene video.

Te tahi atu mau pepe no Auteralia o ta mâua i ite, o te pepe pererau ereere, e te mau patapata uouo toretore vareau i nia i to ˈna pererau. Te tahi atu pepe haviti, o te toretore ninamu ïa, tei faaunaunahia e te mau patapata uouo e te mau ofirifiri i te hiti o to ˈna mau pererau e te mau toretore ninamu i roto ra. Te vai ra to ˈna mau fetii i Niu Guinea, i Moluccas, e i te mau motu Solomona.

Mea maoro to ˈu anaanataeraa i te mau pepe. Te tauiraa o te hoê toe iti o te riro mai ei hê, e i te pae hopea ei semeio o te rere haere, o te haapapuraa ïa, eiaha no te tahi mau puai matapo o te natura e te tupu-noa-raa o te mau mea, no te hoê râ Poiete aivanaa, o tei hamani i te mau mea faahiahia atoa ia au i to ratou huru.—Na te tahi taata taio.

[Nota i raro i te api]

[Hohoˈa i te api 16, 17]

Api 16: monarque; 1. pepe no Auteralia; 2. hê; 3. ulysses; 4. pepe no Auteralia; 5. apitiraa; 6. pepe peni anani

[Faaiteraa i te tumu]

No ǒ mai te mau pepe atoa i te: Fare Pepe, Mittagong, Australia