Te papai mai nei te feia taio

Haamâha-oioi-raa i te hinaaro Mauruuru roa no ta outou mau tumu parau “E hinaaro vau I TEIE NEI!” (8 no tenuare 1991) E au ra e tera te pahonoraa i ta ˈu mau pure ma te aau rotahi e ua haaferuri rahi te reira ia ˈu. Ua faahiahia roa vau i te tano-maitai-raa o ta outou mau uiraa. E haapapu mai ratou i to ratou faufaa mai te peu e e turaihia vau ia pee i te eˈa o te haamâha-oioi-raa i te hinaaro.

P. D., Marite

Ravea parururaa o te tino Ua manaˈo vau e ua taa ia ˈu i te mau parau a te Salamo 139:14 e na ô ra e: “E haamaitai au ia oe [te Atua], ua taa ê hoi to ˈu hamaniraahia.” Teie râ, mauruuru no ta outou mau tumu parau maramarama e te papu no nia i te parau “Te ravea parururaa o te tino—Te hoê semeio o te poieteraa” (8 no novema 1990), ua ite au i teie nei i te puai rahi o taua irava bibilia ra! Mea mǎtaˈu mau te ao o te mau taoˈa tahi ora i roto ia tatou. Mea faahiahia mau te mau ohipa a to tatou Poiete. Mauruuru no ta outou maimiraa tuutuu ore no nia i taua mau huru tumu parau ra. E haapaari taua mau tumu parau ra i te faaroo.

D. J., Marite

Mea au roa te mau tumu parau e ua riro ei haapiiraa. A taio ai vau, aita vau i nehenehe e tapea i te manaˈo faahiahia no nia ia Iehova i to ˈna hamaniraa ia tatou. Mea fifi ia tiaturi e te manaˈo ra te tahi mau taata e mea tupu noa mai te reira.

Y. S., Marite

Aita vau i ite e nafea ia haamauruuru ia outou no taua mau tumu parau faahiahia. Aitâ vau i faaroo aore ra i taio aˈenei i te hoê faataaraa ohie roa, haapapu-maitai-hia râ. Te roo nei au i te hoê o te mau maˈi ta outou i faahiti, te taa maitai ra ia ˈu i te mau faataaraa a to ˈu taote e te nehenehe nei ïa vau e haapao maitai i to ˈu maˈi.

M. R. O., Beresilia

Te hinaaro nei au e parau ia outou e e mea faahiahia roa te mau tumu parau no nia i te ravea parururaa o te tino ia au i te maimiraa i te pae rapaauraa (8 no novema 1990). Te ohipa nei au i roto i te pu hiˈopoaraa i te toto e te mariri ai taata e ua au roa vau i te huru aravihi e te papu-maitai-raa o te tumu parau. Ua opere vau i te tahi mau vea o taua numera ra na te mau taote e te mau utuutu maˈi hoê â ta matou ohipa.

G. T., Marite

E orometua haapii vau i te pae o te ite aravihi, e ua tano maitai ta matou tauaparauraa no nia i te ravea parururaa i roto i te piha haapiiraa a neneihia ˈi teie tumu parau o te A ara mai na!. Ua opere vau hoê vea na te taata haapii tataitahi, e ua tupu te hoê aparauraa hohonu i nia i taua vea ra.

R. I., Marite

Europa Hitia o te râ Mai te haamataraa o te mau tauiraa i Europa Hitia o te râ aita i maoro aˈenei, ua hinaaro vau e ite i te parau o te mau Ite no Iehova e ora ra i taua vahi ra o te fenua. Mea iti roa te mau haamaramaramaraa i itehia i roto i ta matou mau vea. E nehenehe ïa outou e feruri i to ˈu mauruuru a tae mai ai te vea no te 8 no tenuare 1991, e te tumu parau ra “Te mau Ite no Iehova i Europa Hitia o te râ.” Te tiaturi nei au e e tamau noâ outou i te faaite mai i te parau no nia i te haereraa i mua o te ohipa pororaa i roto i taua tuhaa ra o te ao.

E. S. L., Beresilia

Raau taero I to ˈu taioraa i te tumu parau “Te raveraa i te raau taero, o te faahoaraa ˈtu ïa i te Diabolo!” (8 no novema 1990), ua putapû roa ˈˈera vau. Mea peapea te faatiaraa parau tera râ, e faaitoito atoa mai. Te haapapu maitai ra te tumu parau e eita tatou e huti i te hoê maitai ia taui ia Iehova i te tahi atu mea ta teie ao tahito e nehenehe e pûpû mai.

M. C. P., Beresilia