No hea mai te peni ninami o te raˈi?

Mea poiri roa te mau vahi aano o te reva. Inaha, te mea o ta tatou e parau ra te raˈi, o te reva mataˈi noa ïa e haaati ra i te fenua nei, te area o te reva teitei e itehia e te mata taata nei. Ia hiˈo ratou i teie area aano mau, te aniani nei te mau taata e nohea mai te peni ninamu o te raˈi. Oia mau, no te aha te peni ninamu, eiaha râ te peni vareau, matie, rearea, anani aore ra uteute, te tahi atu mau peni tumu o te anairaa peni e itehia e to tatou nei mata?

I roto i te maramarama o te mahana, te vai ra te mau hihi faito taa ê e e itehia ratou na roto i te mau peni taa ê o te anairaa peni. E tano te peni uteute i te mau aru maramarama roa roa ˈˈe, e te peni ninamu aore ra vareau i te mau aru poto aˈe. Mea ohie aˈe na te mau huˈa iti mǎhu e vai ra i roto i te reva mataˈi ia haaparare i te mau aru poto (te mau aru ninamu) i te mau aru roa (te mau aru uteute), no reira mai te peu e mea maramarama maitai te raˈi, mea ninamu ïa. Maoti to ˈna mau tuhaa iti paari e rave rau e tautau noa ra, mai te repo puehu, e ohipa te mataˈi e haaati ra i te fenua nei mai te hoê hiˈo na roto i te haaparareraa i te maramarama.

Teie râ, mai te peu e tei raro roa te mahana i nia i te iriatai, mea roa aˈe na te maramarama ia ratere mai na roto i te reva mataˈi, e no te mea e mea puai aˈe te mau aru roa no te ô atu i te mau aru poto, e taui ïa te raˈi e e rave oia i te peni anani e te uteute. E haapuai te mau taoˈa iti e tautau noa ra i te peni uteute. Oia atoa, ia î anaˈe te raˈi i te auauahi aore ra i te ata, o te taatoaraa ïa o te mau aru maramarama o te haapararehia, no reira ïa te raˈi e faarumaruma ˈi.

Te haapapu ra teie anairaa maramarama faahiahia mau i faanahohia e te Atua i roto i te reva mataˈi i teie mau parau a te papai salamo e na ô ra e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!” — Salamo 19:1.