Te hoê manu himene nehenehe mau ra e to ˈna ahu uteute

Ua faaara-ê-na-hia anei outou e te hoê manu himene nehenehe mau ra e ahu uteute to ˈna? Mai te peu e te ora ra outou i Marite Apatoerau, peneiaˈe paha te vai ra ta outou teie “faaara-poipoi” navenave mau. Inaha, tei reira te hoê o te mau manu himene matau-roa ˈˈe-hia, oia hoi te karadino, i te faaearaa. E taotia te oni i to ˈna vahi na roto i te hioraa i te hoê pehe navenave maitai. E nehenehe hoi ta ˈna e hio maoro e ma te aravihi rahi, inaha, teie ta te buka parau paari ra Te ao o te mau manu i parau: “Te parauhia ra e e piti ahuru ma vau himene taa ê ta te hoê karadino oni, tei anoi mai i te mau pehe rii huru rau.”

E huruhuru manu uteute to teie manu unauna ra fatata e 20 tenetimetera i te roa, e ua haaatihia to ˈna utu i te hoê toretore ereere. Area te ufa ra, e huruhuru manu maereere marau rii to ˈna e tei roto o ˈna i te pǔpǔ iti haihai o te mau manu ufa o te nehenehe atoa e himene.

Noa ˈtu e eaha te vahi o ta outou e faaea ra, ia faaroo noa ˈtu outou i te himene navenave o te hoê manu, a haamauruuru i te Poiete no to ˈna paari rahi e to ˈna aravihi faito ore. Ua riro te mau manu himene ei mau ǒ o ta ˈna e horoa maira no to tatou mata e to tatou tariˈa. — Salamo 148:7-10.