Eaha te mea e itehia ra i roto i te ao o te ohipa faaetaetaraa tino?
Na to matou papai vea i Italia
TE FAATAA ra anei te mau papai i nia i te api i pihai iho mai, i te orureraa hau hopea nei i tupu i Marite latino aore ra te hoê totovaraa i roto i te hoê fenua no Europa? Eita. Te faaite maira teie mau api o te vea e te tahi atu i te ohipa ta te hoê vea no taua tuhaa nei i parau e “te hoê mahana matauhia i te pae faaetaetaraa tino”.
I to tatou nei mau mahana, mai te huru ra e eita e nehenehe e faataa ê i te ohipa faaetaetaraa tino e te hamani ino. Ei hiˈoraa, o vai tei ore e haamanaˈo ra i te po no te 29 no me 1985 — te po hautiraa hopea no te aua no Europa no te tueraa popo o te mau pǔpǔ aito — i reira e 39 taata tei pohe e e 200 tei pepe i muri aˈe i te mau taputôraa i roto i te feia mataitai?
Teie râ, noa ˈtu e e tupu te reira i rotopu i te feia hauti aore ra i te feia mataitai, eita teie mau ohipa hamani ino raa e itehia i roto anaˈe i te hoê ohipa faaetaetaraa tino, ei hiˈoraa, te tueraa popo; tera râ, te tupu ra te reira i roto i te mau huru ohipa faaetaetaraa tino atoa, mai te base-ball e tae atu i te motoraa, e oia atoa te hockey i nia i te pape paari toetoe.
‘Ia upootia te aito’ aore ra ‘Te mea faufaa roa ˈˈe, o te hautiraa ïa’, e mau parau faufaa ore anaˈe i teie nei. No te aha te mau taata hauti e te feia mataitai e faaite tahaa roa ˈi i to ratou mau huru hairiiri roa ˈˈe? No te aha teie iria mâha ore? Eaha ta teie hamani-ino-raa uˈana i te pae faaetaetaraa tino e huna ra? Eaha te inoraa o teie fifi?