Te haaparare nei o A ara mai na! i te parau apî maitai

Te faaite nei teie hohoˈa i na Ite no Iehova e piti o te faaohipa nei i te vea ra A ara mai na! no te poro i te parau apî maitai o te Basileia o te Atua i Auteteria. Hoê â ohipa pororaa teie e ravehia nei i roto hau atu i te 200 fenua e motu na te ao taatoa nei. Ua hau i te toru milioni mau Ite teie e rave nei i te reira. No te aha râ?

No te mea ia faaauhia te mau parau tohu a te Bibilia i te mau tupuraa na te ao taatoa nei, e itehia e mai te tamaˈi rahi matamua mai â, te ora nei tatou i te taime faufaa roa ˈˈe o te oraraa taata nei, oia hoi te hopea o te faanahonahoraa o te mau mea atoa nei. Ua haamauhia te Basileia o te Atua o te faaterehia e Iesu Mesia, i nia i te raˈi, e fatata roa oia i te rave i te mau ohipa o te fenua nei e faaore ai oia i te ino e e haapapu ai i nia i te fenua taatoa nei, i te hoê faanahonahoraa i reira e itehia ˈi te hau e te ino ore. — Daniela 2:44; Mataio 6:9, 10; 24:3-35.

Ua hau i te 60 matahiti i teie nei, ua faaohipahia te A ara mai na! i roto i teie ohipa pororaa i raro aˈe i te iˈoa ra L’Age d’or. Hoê ahuru matahiti i muri aˈe i to ˈna haamataraahia, ua operehia hau atu i te 75 000 vea i te numera tataitahi. Ua hau i te 70 matahiti to ˈna i teie nei, e e hau to ˈna neneiraa i te ahuru milioni vea na roto e 53 reo.

Mai te Pare Tiairaa, e faataa te tahi atu vea a te Taiete Watchtower, te A ara mai na! i te poroi faufaa roa ˈˈe no teie nei tau. Ia haere faahou mai te mau Ite no Iehova e patoto i to outou opani, a titau atu ia ratou ia tomo mai i roto i to outou fare e a vaiiho atu ia ratou ia faataa mai ia outou no nia i te mau haamaitairaa ta teie poroi e nehenehe e afai mai na outou, outou e to outou utuafare fetii.