Te faatereraa nazi e ta ˈna mau hopearaa
Te faaite nei o William Shirer, i roto i ta ˈna buka, Te maraaraa e te toparaa o te IIIraa o te Reich (beretane), e eaha te auraa o te faatereraa nazi no te mau fenua i haruhia, oia ïa te eiâraa, te faatîtîraa e ua hau atu â. Ua papai oia e: “Ua riro te mau ati Iuda e te mau Slaves ei mau Untermenschen, maori ra e ere ratou i te taata. Ia au ia Hitler, aita to ratou e tiaraa no te ora. E nehenehe râ e faaohipahia vetahi mau Slaves mai te mau tîtî no te faaapuraa aore ra i te vahi eruraa arahu (...). Ia faaore-roa-hia te mau peu a to Russia, Polonia e to te mau Slaves. Eiaha ratou e fariihia ia haapii noa ˈˈe.”
I muri aˈe i te faahitiraa i te mau faufaa rahi o ta te mau nazis i haru i roto i te mau fenua i haruhia e ratou, te haapapu nei râ o Shirer e e haamanaˈo-maoro-hia te faatereraa poto a te nazi, ‘eiaha no te eiâraa i te mau taoˈa maitatai no te mau taparahiraa taata râ’. Ua parau oia e: “I reira, ua topa te huru viivii o te mau nazi i te hoê faito i ore â i naeahia e te taata nei. Ua haahepohia te mau mirioni tane e vahine maitai e hara ore na roto i te mau ohipa teimaha; e e mau mirioni tane e vahine o tei hamani-ino-hia e taparahi-haere-hia i roto i te aua hamani-ino-raa, e vetahi ra mau mirioni ua haapohe-roa-hia ïa, aore ra ua vaiiho-noa-hia ia pohe maite noa na roto i te poia.” Ua faaoti o Shirer e: “Eita mau teie nei aamu riaria faito ore e tiaturihia ahiri aita te feia iho i rave na i teie nei ohipa i ore i faatia e i haapapu roa i te reira.” Ua faatia atoa te feia i ora mai roto mai i taua hamani-ino-raa ra.
Ua tia mau atura to te Bibilia parauraa no te mau faatereraa a te taata nei e: “Pinepine e faahepo te taata i te tahi taata e ei ino no ˈna iho.” E: “Ua ite hoi au, e Iehova, e ere tei te taata iho to ˈna haerea; e ere tei taua taata e haere ra i te haapao i to ˈna taahiraa. E aˈo mai oe ia ˈu, e Iehova.” Mea faufaa aˈera teie nei aˈoraa: “Eiaha e tiaturi i te huiarii, e te taata atoa aita hoi o ˈna e ora.” — Koheleta 8:9; V.C.J.S.; Ieremia 10:23, 24; Salamo 146:3.