Hitler: mou aita râ i moehia

MAHANA PAE 26 no setepa, 1980, e mahana veavea e te maitai hoi i Heremani apatoa. I te 15 minuti no te hora 10 i te po mea haumarû, e te haere ra te hoê nahoa taata i rapae i te mau fare ie rarahi, hamanihia no te oroa o te pia i Munich. Maramarama tauê noa maira i mua i te hoê o te mau opani rarahi, apeehia mai e te hoê harururaa puai, ua iteahia e 200 taata tei pepe e 13 tei pohe roa.

I muri aˈe, ua faaite mai te hoê titorotororaa e te taata i rave i taua ohipa ra, ua amuimui na oia e te mau pupu néo-nazis. E vau hebedoma na mua ˈˈe, ua hau atu i te 80 taata tei pohe roa na roto i te mau faahuehueraa a te pae atau i te vahi tapearaa pereoo auahi no Bologne, i Italia. I te hoê â taime, ua tupu i Farani te hoê hamani-ino-raa rahi uˈana i nia i te mau ati Iuda o tei ore â i itehia ˈˈenei e a ˈna mai te Piti o te Tamaˈi Rahi o te ao nei.

No te rahiraa o te mau taata, hoê â auraa te faatereraa nazi e néo-nazis e o Hitler. Ua faaora teie mau ati ta tatou i faahiti i nia nei ia Hitler na roto i te roaraa o te mau matahiti, i roto iho â râ i te mau vea. E ua tupu teie mau taparahiraa o te nazi, e aitâ hoi i moe atura tei tupu na. Te haapapu nei te vea heremani ra Nürnberger Nachrichten e i te avae titema 1983 ra e 35 taata e i rotopu ia ratou 10 haava e auvaha ture o “te amui haere ra e te afai ra i te fare haavaraa te mau parau atoa no nia i te mau taparahiraa nazi [o tei ravehia i te tau o Hitler]”. Hau atu i te 1 700 pariraa o te haava-noa-hia ra e 129 aitâ ïa.

Noa ˈtu e aita ïa te mau taata atoa e ite ra i te tereraa o te reira ohipa, ua faahaamanaˈo râ te tahi atu â mau ohipa i te faatereraa nazi o ta te mau mirioni tane e vahine i tamata na i te haamoe. Rave anaˈe mai na te hohoˈa ra Holocauste tei patahia na roto i te tele, tau matahiti i teie nei, aore ra i te parauraahia e ua iteahia te mau buka ta Hitler iho i papai e te hoê vea tuiroo heremani i te matahiti 1983 ra. Ua farii vetahi pae i teie parau apî ma te feaa, e ua parare roa ˈtu â i te itearaahia e mau parau haavare anaˈe. Ua parau te hoê taata heremani ma te mauruuru ore e te inoino hoi e: “Eita anei o Hitler e faaea i te haamaamaa ia tatou?”

E ere atura ïa i te mea maere to te vea ra Toronto Star no Canada papairaa e: “Tei roto noâ tatou i te riaria, teie râ te anaanatae rahi nei tatou i te mau ohipa i ravehia e te Führer e te Hau o ta ˈna i faatere na.” I au i te hoê vea heremani, “a mahemo noa ˈi te tau, te rahi noa ˈtura te mau papai no te tau o Hitler. Hau atu te 20 000 buka i piahia no ˈna, o tei ore hoi i taio-pauroa-hia e te feia aravihi”.

No te aha teie nei anaanatae rahi o te ao nei no nia ia Hitler e o te IIIraa o ta ˈna Reich? Ia au i te vea ra Der Spiegel, ua apitihia taua tupuraa ra i te hoê “ohipa-faahou-raa” a te mau pupu néo-nazis, e e tapao anei te reira no te hoê tataipitiraa o te Aamu nei? Te faatiatia nei te tahi mau vea e buka néo-nazis e e ere ratou i “te mau toetoea o tera ra tau, o ratou râ to mua roa no ananahi”. No te reira te rahi noa ˈtura te feia e uiui nei: ‘Te faatereraa nazi — E ite-faahou-hia anei?’