Ieremia 11:11: “Teie au a hopoi mai i te ino i nia ia ratou”

Auraa o te Ieremia 11:11

Te paraparau ra te Atua i te mau ati Iuda o tei ora i te tau o te peropheta Ieremia. I te mea ua haafaufaa ore te nunaa i te mau ture tia a Iehovaa e te aˈoraa î i te here horoahia na roto i te mau peropheta, eita te Atua e paruru ia ratou i te mau faahopearaa o to ratou mau haerea ino.—Maseli 1:24-32.

“Teie ïa ta Iehova e parau ra.” Na roto i te parau “teie ïa,” te faatuatihia ra teie irava e te mau irava na mua ˈtu. I te Ieremia 11:1-10, ua parau Iehova i to ˈna nunaa ua ofati ratou i te faufaa ta to ratou mau tupuna i faaau e o ˈna. (Exodo 24:7) Aita te mau ati Iuda i haamori i to ratou Atua poiete, ua fariu râ i nia i te mau idolo. A taiva ˈi ratou i te Atua, e rave rahi atu â ohipa ino ta ratou i rave mai te taninaraa i ta ratou mau tamarii!—Ieremia 7:31.

“Teie au e faatae nei i nia ia ratou i te tahi ati.” Pinepine te Bibilia i te parau ia rave te Atua i te tahi ohipa, te auraa ïa ua vaiiho oia ia tupu te reira. Mea nafea te haapapuraahia i roto i teie tupuraa? Ma te fariu i nia i te mau atua hape e ma te haafaufaa ore i ta Iehova mau faaueraa maitatai, ua hopoi mai te reira i te mauiui rahi i nia i te nunaa. E ua ere ratou i te parururaa a te Atua! Ei faahopearaa, ua haruhia Ierusalema e te hoê enemi puai, oia hoi te arii o Babulonia, e ua afai-tîtî-hia te nunaa. Aita te mau atua hape ta ratou i tiaturi i nehenehe e faaora ia ratou!—Ieremia 11:12; 25:8, 9.

Ma te vaiiho ia tupu teie mau ati i nia i to ˈna nunaa, e ere Iehova i te hoê Atua ino! Te na ô ra te Iakobo 1:13: “Eita hoi te Atua e hema i te mau mea iino, eita atoa oia e faahema i te taata.” Te parau ra te huriraa o Te Bibilia Moˈa ra e hopoi mai te Atua i “te ino i nia [te mau ati Iuda].” Tera râ i roto i te reo tumu,b te parau “ino” i roto i te Ieremia 11:11, e nehenehe atoa e hurihia ei “ati.” Ua tano maitai na parau e piti no te faataa i te mauiui rahi tei tupu i nia i te mau ati Iuda.

“Ia pii mai ratou ia ˈu ia tauturu ia ratou, eita vau e faaroo atu.” Eita Iehova e faaroo i te pure a te feia ua î to ratou “rima i te toto” aore ra a te feia o te imi i te faaoraraa i te mau atua hape. (Isaia 1:15; 42:17) E faaroo râ Iehova i te pure a te feia o te tatarahapa mau ma te faarue i to ratou mau haerea ino e o te hoˈi mai ma te haehaa ia ˈna ra.—Isaia 1:16-19; 55:6, 7.

Irava tapiri o te Ieremia 11:11

I te matahiti 647 hou te tau o Iesu, ua maiti Iehova ia Ieremia ei peropheta. No te hoê maororaa 40 matahiti, ua faaara Ieremia i te nunaa ati Iuda no nia i ta te Atua mau haavaraa. Aita râ ratou i hinaaro e faaroo. I tera taime to te peropheta papairaa i te mau parau e itehia i roto i te Ieremia 11:11. I te hopearaa, i te matahiti 607 hou te tau o Iesu, ua tupu ta ˈna i tohu i te taime a haamou ai to Babulonia ia Ierusalema.—Ieremia 6:6-8; 39:1, 2, 8, 9.

Te horoa atoa ra te buka Ieremia i te hoê tiaturiraa. Ua parau Iehova: “Ua hope anaˈe e 70 matahiti i Babulonia, . . . e faatupu vau i ta ˈu parau fafau a faahoˈi mai ai ia outou i teie vahi [te fenua tumu o te ati Iuda].” (Ieremia 29:10) Ua faatupu Iehova i tera parau fafau i te matahiti 537 hou te tau o Iesu, i muri aˈe i te haruraahia Babulonia e to Medai e Peresia. Noa ˈtu ua purara haere to ˈna nunaa na te mau vahi i faaterehia na e to Babulonia, ua vaiiho Iehova i to ˈna nunaa ia hoˈi i to ratou fenua tumu no te haamau faahou i te haamoriraa mau.—Paraleipomeno 2, 36:22, 23; Ieremia 29:14.

A mataitai i teie video poto o te faaite mai i te tahi mau tuhaa o te buka Ieremia.