Ieremia 33:3: “A pii mai ia ˈu, e e pahono atu vau ia oe”

“A pii mai ia ˈu, e e pahono atu vau ia oe e e faaite atu iho â vau ia oe i te mau mea faahiahia e te taa ore aita oe i ite.”—Ieremia 33:3, Huriraa o te ao apî.

“E tiaoro mai ia ˈu, e na ˈu e parau atu ia oe, e e parau rahi ta ˈu e faaite atu ia oe, e te mea moe aore i itea e oe ra.”—Ieremia 33:3, Te Bibilia Moˈa ra.

Auraa o te Ieremia 33:3

E titauraa teie na te Atua i te taata ia pure ia ˈna. Ia na reira ratou, mai ta ˈna e titau mai ra, e faaite mai ïa o ˈna eaha te tupu a muri aˈe.

“A pii mai ia ˈu, e e pahono atu vau ia oe.” Te auraa o te parau “a pii mai ia ˈu,” e ere te tiaororaa aore ra te tuôraa i te iˈoa o te Atua. O te aniraa râ i ta ˈna tauturu e ta ˈna aratairaa na roto i te pure.—Salamo 4:1; Ieremia 29:12.

No te nunaa Iseraela i tahito ra teie titauraa. I taiva na hoi ratou ia Iehova, e e haruhia ratou e te nuu Babulonia. (Ieremia 32:1, 2) No reira Iehovaa i titau ai i to ˈna nunaa ia hoˈi ia ˈna ra.

“E faaite atu iho â vau ia oe i te mau mea faahiahia e te taa ore aita oe i ite.” E parau “taa ore” ta te Atua i fafau e faaite mai, te auraa eita roa ˈtu te taata e taa. E nehenehe atoa e huri i te parau “taa ore” ei “hunahia.”

Eaha teie mau mea “hunahia” ta te Atua e faaite mai? Te haamouraa ïa e te vai-ano-raa o te oire o Ierusalema, e te patu-faahou-raahia te oire a muri aˈe. (Ieremia 30:1-3; 33:4, 7, 8) Teie râ, ua fafau atoa te Atua e ore to ˈna nunaa e mou.—Ieremia 32:36-38.

Irava tapiri o te Ieremia 33:3

Ua faatae Iehova i teie poroi i ta ˈna peropheta Ieremia i te matahiti 608 hou te tau o Iesu, i te ahururaa o te matahiti faatereraa a te arii Zedekia. Ua tohu Ieremia e haruhia Ierusalema e e hopoi-ê-hia Zedekia. Aita râ te arii i au i tera poroi. Ua faaue o ˈna ia tapeahia Ieremia.—Ieremia 32:1-5; 33:1; 37:21.

No reira te Atua i faatae ai i ta ˈna i titau i roto i te Ieremia 33:3. Aita râ te arii Zedekia e te rahiraa o te nunaa i hinaaro e faaroo. (Ieremia 7:26; 25:4) Aita ratou i pure i te Atua no te ani i ta ˈna aratairaa. Hoê matahiti i muri iho, ua ere Zedekia i to ˈna tiaraa arii, ua mou Ierusalema, e ua haruhia e ua hopoi-ê-hia tei ora mai i Babulonia.—Ieremia 39:1-7.

E haamanaˈoraa te Ieremia 33:3 no te feia taio i teie mahana, e horoa te Atua i “te ite mau o to ˈna hinaaro” e “te hohonuraa o [to ˈna] paari” i te feia e pure ia ˈna e e haapii i ta ˈna Parau te Bibilia. (Kolosa 1:9; Korinetia 1, 2:10) E faaite atoa mai oia i ta ˈna i fafau e rave a muri aˈe.—Apokalupo 21:3, 4.

A mataitai i teie video o te faataa poto noa i te buka Ieremia.