Salamo 37:4: “E haapopou atu hoi oe ia Iehova”

“Ia oaoa roa oe ia Iehova, e e horoa mai oia i ta to aau e hinaaro ra.”—Salamo 37:4, Huriraa o te ao apî.

“E haapopou atu hoi oe ia Iehova, e na ˈna e horoa mai i ta to aau e hinaaro ra.”—Salamo 37:4, Te Bibilia Moˈa ra.

Auraa o te Salamo 37:4

Te faaitoito ra te papai Salamo i te mau tavini a te Atua ia oaoa no to ratou auhoaraa e te Atua. E nehenehe te feia atoa tei riro ei hoa no Iehovaa e tiaturi e horoa mai oia i ta ratou e hinaaro mau ra.

“Ia oaoa roa oe ia Iehova.” E nehenehe atoa e hurihia teie pereota ei “ia au roa oe e tavini i te Fatu” aore ra “ia mauruuru oe i ta te Fatu i fafau no oe.” Te manaˈo i ǒ nei, “ia oaoa roa [tatou]” i te haamori i te Atua mau. (Salamo 37:4) No te aha?

E pee te mau tavini a Iehova i ta ˈna huru hiˈoraa mai tei faahitihia i roto i te Bibilia. Ua ite ratou o vai te Atua e e haerea paari atoa ia auraro ia ˈna. E manaˈo haava maitai ïa to ratou e eita ratou e rave i te faaotiraa tano ore. (Maseli 3:5, 6) Ei hiˈoraa, eita ratou e inoino aore ra e pohehae i te feia ino, ia hiˈohia ˈtu ua manuïa to ratou oraraa. (Salamo 37:1, 7-9) Te oaoa nei ratou ia ite e fatata Iehova i te faaore roa i te mau mea tano ore atoa e i te haamaitai i ta ˈna mau tavini taiva ore no to ratou haerea maitai. (Salamo 37:34) E rahi atu â to ratou oaoa i te iteraa e te mauruuru nei to ratou Metua i te raˈi ia ratou.—Salamo 5:12; Maseli 27:11.

“E horoa mai oia i ta to aau e hinaaro ra.” E huri-atoa-hia teie pereota “e pahono oia i ta oe mau pure” aore ra “e horoa mai oia i ta oe e hinaaro roa ra.” Parau mau, eita Iehova e pahono i te mau huru aniraa atoa. Mai te hoê metua, ua ite Iehova eaha te mea maitai roa ˈˈe no ta ˈna mau tamarii. Hau atu, e titauhia ia tuati ta tatou mau pure e to tatou huru oraraa i ta ˈna mau ture aveia e i to ˈna hinaaro. (Maseli 28:9; Iakobo 4:3; Ioane 1, 5:14) Ma te na reira, e nehenehe tatou e faafatata ˈtu i “Tei faaroo i te pure” ma te tiaturi papu e faaroo o ˈna ia tatou.—Salamo 65:2; Mataio 21:22.

Irava tapiri o te Salamo 37:4

Na te arii o Iseraela, o Davida i papai i te Salamo 37. Ua papai oia i teie Salamo ia au i te piapa Hebera.b

Mea rahi te ohipa tano ore ta Davida i faaruru. Ua aˈuaˈuhia o ˈna e te arii Saula e te tahi atu tei hinaaro e haapohe ia ˈna. (Samuela 2, 22:1) Ua tiaturi noa râ Davida i to ˈna Atua. Ua ite atoa o ˈna e faautua iho â Iehova i te feia ino. (Salamo 37:10, 11) Noa ˈtu e au ra e te ruperupe noa ra ratou “mai te matie apî,” i te pae hopea, e mou ratou.—Salamo 37:2, 20, 35, 36.

Te faataa ra te Salamo 37 eaha te tupu no te feia auraro i te mau ture aveia a te Atua e no te feia o te haafaufaa ore ra i te reira. (Salamo 37:16, 17, 21, 22, 27, 28) E tauturu mai teie Salamo ia fanaˈo i te paari e ia riro ei taata e faaoaoa ra i te Atua.

A mataitai i teie video o te faataa poto noa i te buka Salamo.