Luka 2:14: “Ei hau to teie nei ao e ia ite auhia mai i te taata nei”

“Ia faahanahanahia te Atua i te raˈi teitei e ia tupu te hau i te fenua nei no te taata ta te Atua e farii.”—Luka 2:14, Huriraa o te ao apî.

“Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei.”—Luka 2:14, Te Bibilia Moˈa ra.

Auraa o te Luka 2:14

Na te mau melahi i faahiti i teie mau parau arueraa i te taime a fanauhia ˈi Iesu. E faaite te reira, ia tuu te feia i to ratou faaroo ia Iesu, e nehenehe ratou e fanaˈo i te farii maitai a te Atua e e ite i te hau.

“Ia faahanahanahia te Atua i te raˈi teitei.” Na roto i teie parau, te haafaufaa ra te mau melahi e ua tano ia faahanahanahia te Atua. Te faaite atoa ra te reira, e faahanahana te mahana fanauraa o Iesu e ta ˈna taviniraa i te fenua i te Atua ra o Iehova.a Ei hiˈoraa, ua faahanahana noa Iesu i te Atua na roto i ta ˈna i haapii ma te parau: “E ere na ˈu iho ta ˈu e haapii nei, na tei tono mai râ ia ˈu.” (Ioane 7:16-18) I to Iesu raveraa i te mau semeio, pinepine te feia tei ite i te reira i te ‘faahanahana i te Atua.’ (Luka 5:18, 24-26; Ioane 5:19) Ua faahanahana atoa te pohe o Iesu i te Atua. Maoti te reira i naea ˈi te opuaraa a te Atua, oia hoi te faaîraa i te fenua i te feia parau-tia e te hau.—Genese 1:28.

“Ia tupu te hau i te fenua nei.” Teie hau, ua hau atu ïa i te ore-noa-raa te tamaˈi. Te vai ra te hau aore ra te hau o roto, o ta te hoê taata ta te Atua e farii e nehenehe e ite. Maoti Iesu e nehenehe te taata e fanaˈo i teie auhoaraa hau e te Atua. (Iakobo 4:8) E ei Arii o te Faatereraa arii a te Atua, e hopoi mai Iesu i te hau mure ore i nia i te fenua taatoa.—Salamo 37:11; Luka 1:32, 33.

“Te taata ta te Atua e farii.” No te feia o te fanaˈo ra i te hamani maitai aore ra farii maitai a te Atua teie parau, no to ratou hoi faaroo mau ia Iehova e ia Iesu. E ere teie hamani maitai a te Atua no te taata atoa noa ˈtu to ratou haerea e ohipa. Te turu ra te mau papai Heleni tahito roa faaturahia i te Huriraa o te ao apî e te tahi atu mau huriraa o te faahiti ra i te manaˈo o te hau i rotopu i te mau taata o ta te Atua e farii ra.—A hiˈo i te “Luka 2:14 i roto i te tahi atu mau huriraa.”

Irava tapiri o te Luka 2:14

Ua faataa te Luka pene 2 i te mau matahiti matamua o to Iesu oraraa ei taata. Tau taime i muri aˈe i to ˈna fanauraahia mai, ua fa mai te hoê melahi i te mau tiai mamoe “e parahi ra i rapae e e haapao ra i ta ratou mau nǎnǎ i te po taatoa.”b (Luka 2:4-8) Ua faaite te melahi “i te tahi parau apî oaoa e oaoa roa ˈi” te mau tiai mamoe, ma te parau: ‘I teie mahana i te oire o Davida, ua fanauhia mai te hoê faaora, oia hoi te Mesia ra te Fatu.’ (Luka 2:9-11) Ua parauhia i te mau tiai mamoe te vahi i reira ratou e ite ai i te aiû, e i muri iho ua ite mata roa ratou i to te mau melahi arueraa i te Atua. I to ratou taeraa ˈtu i Betelehema, ua ite te mau tiai mamoe ia Maria, Iosepha e te aiû ra o Iesu. (Luka 2:12-16) Ua faaite ïa ratou i ta ratou i ite, e i muri iho ua hoˈi te mau tiai mamoe e tiai i ta ratou mau nǎnǎ “a faahanahana ˈi e a arue ai i te Atua no ta ratou i faaroo e i ite.”—Luka 2:17-20.

Luka 2:14 i roto i te tahi atu mau huriraa

“Ei hanahana i te Atua i te raˈi teitei ra, ei hau, i te fenua nei, i te taata i herehia e ana.”—Luka 2:14, Te Faufaa Api.

“Ia faahanahana hia te Atua i te rai teitei roa ra; e i te ao nei ei hau to te taata hinaaro tia mau.”—Luka 2:14, Te Bibilia Moˈa V.C.J.S. (1976).

A mataitai i teie video o te faataa poto noa i te buka a Luka.