Ua faaite te mau Ite no Iehova i te mǎrû i mua i te hoê perepitero tei riri

Ua haere o Artur, te hoê tiaau haaati i Aramenia, e farerei i te hoê amuiraa. Ua ite o ˈna aita te amuiraa i apiti noa ˈˈe i te pororaa i te vahi taata, ma te faaohipa i te vairaa papai afaifai. No te faanaho i teie huru taviniraa, ua haere Artur e ta ˈna vahine o Anna e te tahi atu Ite o Jirayr te iˈoa, i te hoê oire iti no te tuu i te vairaa papai afaifai. Ua maiti ratou i te hoê vahi mea taata roa.

Ua haamata oioi te taata i te faaite i te anaanatae e ua rave i te mau papai. Ua tapao atoa râ te feia patoi i teie faanahoraa apî. Ua tapiri mai e piti perepitero e ua tue hoê o raua i te vairaa papai afaifai tei marua i raro. I muri iho, ua pâˈi oia ia Artur e ua topa to ˈna titia mata i raro. Ua tamata Artur, Anna e Jirayr i te tamǎrû i na perepitero e piti, aita râ i manuïa. Ua taataahi raua i te vairaa papai afaifai e ua haapurara i te mau papai. I muri iho, ua parau ino e ua haamǎtaˈu raua i te mau Ite no Iehova e ua vaiiho mai raua ia ratou.

Ua haere Artur, Anna e Jirayr i te aua mutoi no te faataa ˈtu i tei tupu a paraparau poto atu ai no nia i te Bibilia ia ratou e te feia e ohipa ra i ǒ. I muri iho, ua arataihia na e toru Ite no Iehova i te piha ohipa a te tomitera mutoi. I te omuaraa, ua hinaaro noa oia e ite i tei tupu. I to ˈna râ iteraa aita o Artur, te hoê taata pautuutu maitai, i poara ˈtu, ua faaea oia i te uiui no nia i tei tupu e ua haamata i te ani no nia i te tiaturiraa a te mau Ite no Iehova. Ua paraparau ïa ratou e maha hora! Ua maere roa te mutoi i ta ˈna i faaroo e ua parau: “Aita ˈtu ai tera haapaoraa! Hinaaro atoa vau e haere i roto!”

I te mahana i muri iho, i to Artur hoˈiraa e poro i te hoê â vahi, ua tapiri mai te hoê taata ia ˈna o tei ite i tei tupu i te mahana na mua ˈtu. Ua haapopou tera taata ia Artur no to ˈna faaiteraa i te mǎrû e no to ˈna oreraa e moto i te perepitero. Ua parau atoa o ˈna, no ta ˈna i ite, aita o ˈna e faatura faahou i te mau perepitero.

I taua po ra, ua niuniu te mutoi ia Artur ia hoˈi mai i te aua mutoi, eiaha no te paraparau no nia i tei tupu, no te paraparau râ no nia i te Bibilia. E ua apiti mai e piti atu â mutoi i te aparauraa.

I te mahana i muri iho, ua hoˈi faahou Artur e farerei i te mutoi, e i tera taime ua faaite o ˈna i te mau video niuhia i nia i te Bibilia. E ua pii te mutoi i te tahi atu mau mutoi ia haere mai e mataitai i teie mau video.

AI muri aˈe i tei tupu e te perepitero, e rave rahi mutoi a tahi ra ratou i porohia ˈi. E ua horoa te reira i te hiˈoraa maitai no te mau Ite no Iehova.