Ua faataui anei te Atua i te huru o te mau mea no te poiete i te rauraa o te mau mea ora?
Te pahonoraa a te Bibilia
Aita. Te haapapu maitai ra te Bibilia e ua poiete te Atua i te taata e oia atoa te animara e te raau tupu “i to ratou huru.”a (Genese 1:12, 21, 25, 27; Apokalupo 4:11) Te na ô atoa ra te Bibilia e no roto mai te huitaata atoa ia Adamu raua Eva, to tatou na metua matamua. (Genese 3:20; 4:1) Aita te Bibilia e turu ra i te manaˈo e ua faataui te Atua i te huru o te mau mea no te poiete i te rauraa o te mau mea ora. Tera râ, aita hoê parau i roto i te Bibilia e patoi ra i te maimiraa a te mau aivanaa: e nehenehe te hoê mea ora e taui rii, ia au noa râ i to ˈna huru.
Ua faataui noa anei te Atua i te huru o te mau mea ora?
Ua rau te manaˈo o te feia e tiaturi ra e ua faataui te Atua i te huru o te mau mea no te poiete i te mau mea ora. Ia au i te Encyclopædia Britannica, te manaˈo ra vetahi e te faanaho ra te Atua i te natura ma te vaiiho i te mau animara e te mau raau tupu o te nehenehe e ora mai i te vahi tei reira ratou ia ora ˈtu â e ia aere.
Teie atoa ta ratou e tiaturi ra:
No roto mai te mau animara atoa, na reira atoa te mau raau tupu, i te hoê â mea ora tumu i tahito roa.
E nehenehe te huru o te hoê animara e taui a riro roa mai ai ei animara ê roa.
O te Atua iho â te tumu o teie mau tauiraa.
Tera anei ta te Bibilia e haapii ra?
Te manaˈo ra te feia e tiaturi ra e ua faataui te Atua i te huru o te mau mea ora e aita i tano roa te faatiaraa a te Bibilia i roto i te Genese no nia i te poieteraa. Tera râ, ua haapapu Iesu e ua tupu mau iho â mai ta te Genese e faatia ra. (Genese 1:26, 27; 2:18-24; Mataio 19:4-6) Te parau ra te Bibilia e hou Iesu a haere mai ai i te fenua nei, i ora na oia e te Atua i nia i te raˈi e ua tauturu oia i te Atua ia hamani i “te mau mea atoa.” (Ioane 1:3) No reira, te manaˈo e ua faataui te Atua i te huru o te mau mea no te poiete i te rauraa o te mau mea ora, aita ïa e tuati ra i ta te Bibilia e haapii ra.
No te aha e nehenehe ai te raau tupu e te animara e taui rii i to ratou huru no te ora mai i te vahi tei reira ratou?
Aita te Bibilia e faataa ra e nafea te huru o te hoê mea ora e nehenehe ai e taui. Aita râ te reira e patoi ra i te manaˈo e e nehenehe te mau animara rau e te mau raau tupu ta te Atua i poiete e aere e e ora mai i te vahi tei reira ratou. Noa ˈtu no vetahi te turu ra te reira i to ratou manaˈo, aita râ te reira i riro mai ei mea ora apî.
a Pinepine ia parau te mau aivanaa e ua taui te huru o te hoê mea ora, aita te reira i riro ei mea ora apî, ua taui rii noa râ te reira ia au noa râ i to ˈna huru, mai tei faahitihia i roto i te Genese.