Ta tatou e haapii mai ra i te hiˈoraa o te mau vahine o te Bibilia

Te pahonoraa a te Bibilia

I roto i te Bibilia, e nehenehe tatou e huti i te mau haapiiraa no nia i te aamu o e rave rahi vahine. (Roma 15:4; Timoteo 2, 3:16, 17) Te faahiti poto nei teie tumu parau i te aamu o te tahi mau vahine itehia i roto i te Bibilia. E hiˈoraa maitai to e rave rahi o ratou. Te vai ra râ te tahi atu mau hiˈoraa o ta tatou e ore e hinaaro e pee.—Korinetia 1, 10:11; Hebera 6:12.

Abigaila

O vai o Abigaila? E vahine o ˈna a te hoê tane taoˈa rahi e te ino, o Nabala to ˈna iˈoa. Tera râ, e vahine haroˈaroˈa e te haehaa o Abigaila. E vahine nehenehe mau o ˈna o te faaroo ia Iehova.—Samuela 1, 25:3.

Eaha ta ˈna i rave? Ua haa Abigaila ma te paari e te haroˈaroˈa ia ore te ati e tupu i nia i to ˈna utuafare. I ora na Abigaila e Nabala i te hoê tuhaa fenua i reira Davida i horo ê ai e i tapuni ai. O Davida hoi te riro ei arii o Iseraela. I to Davida e to ˈna mau taata oraraa i tera vahi, ua paruru ratou i te nǎnǎ mamoe a Nabala i te feia eiâ. Ua tono râ Davida i te tahi mau taata ia Nabala ra no te ani i te maa. Ua patoi Nabala i tera aniraa ma te tura ore. Riri aˈera o Davida. Opua atura o ˈna e to ˈna mau taata i te haapohe ia Nabala e i te mau tane atoa i to ˈna fare.—Samuela 1, 25:10-12, 22.

I to ˈna faarooraa i te ohipa ta Nabala i rave, oioi Abigaila i te rave i te faanahoraa. Ua horoa o ˈna i te maa i ta ˈna mau tavini no te afai atu ia Davida e to ˈna mau taata. Ua apee atoa o ˈna i ta ˈna mau tavini no te taparu ia Davida ia faaite i te aroha hamani maitai. (Samuela 1, 25:14-19, 24-31) Ua ite Davida i te ô horoahia e te haehaa o Abigaila. Ua faaroo atoa o ˈna i ta Abigaila aˈoraa î i te paari. Ua taa atura ia ˈna e na te Atua i faaohipa ia Abigaila ia ore o ˈna e haapohe ia Nabala e to ˈna mau taata. (Samuela 1, 25:32, 33) I muri iti aˈe, ua pohe o Nabala e ua riro Abigaila ei vahine na Davida.—Samuela 1, 25:37-41.

Eaha ta tatou e haapii ra i te hiˈoraa o Abigaila? E vahine haviti mau o ˈna e te taoˈa rahi. Aita râ o ˈna i manaˈo e mea faufaa aˈe o ˈna i te tahi atu. Ia vai noa te hau, ua tae roa o ˈna i te ani i te tatarahapa no te hoê ohipa e ere na ˈna te hape. Ua faaruru o ˈna i te hoê tupuraa fifi mau ma te mǎrû, te tura, te itoito e te paari.

▸ No te ite atu â no nia ia Abigaila, a hiˈo i te tumu parau “Ua haa oia ma te feruriraa maitai.”

Debora

O vai o Debora? E peropheta vahine o ˈna ta Iehova, te Atua o Iseraela, i faaohipa no te faaite i to ˈna hinaaro i to ˈna nunaa. Ua faaohipa atoa te Atua ia ˈna no te faaafaro i te tahi mau fifi i rotopu i to Iseraela.—Te mau tavana 4:4, 5.

Eaha ta ˈna i rave? Ma te itoito, ua turu te peropheta vahine o Debora i te mau tavini a te Atua. I raro aˈe i ta te Atua aratairaa, ua faaue o ˈna ia Baraka ia faatere i te pǔpǔ faehau Iseraela no te aro i te enemi no Kanaana. (Te mau tavana 4:6, 7) I ta Baraka aniraa ia Debora ia apee ia ˈna, aita o ˈna i riaria aˈe. Ua farii râ o ˈna i te aniraa ma te aau tae.—Te mau tavana 4:8, 9.

I to te Atua horoaraa i te upootiaraa i to Iseraela, ua himene o ˈna e o Baraka no te faatia i tei tupu. Na ˈna iho â i faahiti i ta ˈna tuhaa himene. I roto i tera himene, ua faahiti o ˈna i te ohipa a Iaela, te tahi atu vahine itoito, oia hoi ta ˈna i rave ia upootia Iseraela i nia ia Kanaana.—Te mau tavana pene 5.

Eaha ta tatou e haapii ra i te hiˈoraa o Debora? E feruriraa haapae to Debora e mea itoito o ˈna. Ua faaitoito o ˈna ia vetahi ê ia rave i te mea maitai i te aro o te Atua. I to ratou raveraa i te mea maitai, ua haapopou o ˈna ia ratou.

▸ No te ite atu â no nia ia Debora, a hiˈo i te tumu parau ‘Itehia maira vau ei metua i Iseraela nei.’

Delila

O vai o Delila? E vahine o ˈna ta te tavana Iseraela o Samasona i here.—Te mau tavana 16:4, 5.

Eaha ta ˈna i rave? Ua farii teie vahine i te hoê tino moni ta te mau tavana Philiseti i horoa ˈtu no te taiva ia Samasona, te taata ta te Atua i faaohipa no te faaora i te mau Iseraela i te rima o te mau Philiseti. Mea fifi hoi no te mau Philiseti ia upootia i nia ia Samasona no te mea ua fanaˈo semeio mai o ˈna i te hoê puai rahi. (Te mau tavana 13:5) Ua tapiri atu ïa ratou ia Delila no te ani i ta ˈna tauturu.

Ua peta to Philiseti ia Delila ia ite ia ˈna nohea mai te puai o Samasona. Ua farii o Delila i te moni. E rave rahi taime o ˈna i te onoonoraa ia Samasona no te ite no te aha mea puai o ˈna. Faaite atura Samasona i ta Delila i hinaaro. (Te mau tavana 16:15-17) Ua faaite atura Delila i te reira i te mau Philiseti e ua haru ratou ia Samasona no te tapea ia ˈna.—Te mau tavana 16:18-21.

Eaha ta tatou e haapii ra i te hiˈoraa o Delila? Ua riro te hiˈoraa o Delila ei faaararaa no tatou. E vahine nounou moni o ˈna. Ua taviri, ua taiva e ua haa o ˈna ma te miimii i nia i te hoê tavini a te Atua ra o Iehova.

Esetera

O vai o Esetera? E vahine ati Iuda o Esetera. Ua maiti te arii Ahasueru no Peresia ia ˈna ei arii vahine na ˈna.

Eaha ta ˈna i rave? Ua faaohipa te arii vahine Esetera i to ˈna tiaraa no te faaora i to ˈna iho nunaa. Ua ite ia Esetera e ua haamanahia te hoê ture e faaite ra i te taio mahana e haapohehia ˈi te taatoaraa o te ati Iuda e ora ra i te hau emepera Peresia. No ǒ mai tera faaotiraa ino mau i te faatere hau nui o Hamana to ˈna iˈoa. (Esetera 3:13-15; 4:1, 5) Maoti te tauturu a to ˈna tuaane Moredekai, ua faaite Esetera i ta ˈna tane te arii Ahasueru i te tupu i nia i to ˈna nunaa, noa ˈtu ua nehenehe o ˈna e pohe a paraparau ai i te arii. (Esetera 4:10-16; 7:1-10) Faatia ˈtura Ahasueru ia Esetera raua Moredekai ia haamau i te hoê ture apî e faatia ra i te ati Iuda ia paruru ia ratou. Ua upootia te mau ati Iuda i nia i to ratou mau enemi.—Esetera 8:5-11; 9:16, 17.

Eaha ta tatou e haapii ra i te hiˈoraa o Esetera? Ua riro te arii vahine ra o Esetera ei hiˈoraa faahiahia roa o te itoito, te haehaa e te aau faahaihai. (Salamo 31:24; Philipi 2:3) Noa ˈtu to ˈna haviti e to ˈna tiaraa, ua ani o ˈna i te aratairaa e te tauturu. Ua paraparau o ˈna i ta ˈna tane ma te papu, te tura e te itoito rahi. I te taime a faaruru ai te ati Iuda i te fifi rahi, ua faaite roa o ˈna ma te itoito e e ati Iuda atoa o ˈna.

▸ No te ite atu â no nia ia Esetera, a hiˈo i te tumu parau “Ua turu oia i te nunaa o te Atua” e “Ua haa oia ma te paari, te itoito e te miimii ore.”

Eva

O vai o Eva? O Eva te vahine poiete-matamua-hia e te vahine matamua faahitihia i roto i te Bibilia.

Eaha ta ˈna i rave? Ua faaroo ore o Eva i te hoê faaueraa papu no ǒ mai i te Atua. Mai ta ˈna tane, Adamu, ua poietehia o Eva e ei taata tia roa, ua fanaˈo o ˈna i te tiamâraa e maiti e te neheneheraa e faatupu i te mau huru maitatai o te Atua, mai te here e te paari. (Genese 1:27) Ua ite maitai o Eva eaha ta te Atua i parau ia Adamu, oia hoi ia amu noa ˈtu raua i to te hoê tumu raau taa maitai, e pohe raua. Tera râ, ua haavare Satani ia Eva ma te parau e eita o ˈna e pohe. Ua turaihia o ˈna ia manaˈo mea oaoa aˈe to ˈna oraraa mai te peu e faaroo ore o ˈna i te Atua. Ua amu atura Eva i te maa hotu e i muri iho, ua horoa ˈtu o ˈna i te reira i ta ˈna tane e amu atura o ˈna.—Genese 3:1-6; Timoteo 1, 2:14.

Eaha ta tatou e haapii ra i te hiˈoraa o Eva? Na roto i te hiˈoraa o Eva, e faaarahia tatou eaha te tupu ia tiatonu tatou i nia i te mau hinaaro tano ore. Noa ˈtu te faaueraa papu a te Atua, ua faatupu o Eva i te hinaaro puai e eiâ.—Genese 3:6; Ioane 1, 2:16.

Hana

O vai o Hana? E vahine faaipoipo o ˈna na Elikana e e metua vahine o Samuela o tei riro ei peropheta tuiroo i te tau o Iseraela.—Samuela 1, 1:1, 2, 4-7.

Eaha ta ˈna i rave? I te mea aita Hana i nehenehe aˈe e fanau i te tamarii, ua imi o ˈna i te tamahanahanaraa i te Atua. E piti vahine ta Elikana, ta ˈna hoi tane. O Penina te tahi atu vahine e e tamarii ta ˈna. No Hana râ, e rave rahi matahiti i muri aˈe i to ˈna faaipoiporaa, aitâ ta ˈna e tamarii. Mea ino mau o Penina i nia ia Hana. Ua pure râ Hana i te Atua ia tamahanahana mai. Na roto i te pure, ua euhe Hana i te Atua ma te parau e ia horoa noa ˈtu te Atua ia ˈna i te hoê tamaiti, e pûpû o ˈna ia ˈna no te tavini i te sekene, te hoê tiahapa afaifai faaohipahia e to Iseraela no te haamori i te Atua.—Samuela 1, 1:11.

Ua pahono te Atua i ta Hana pure e ua fanau ihora o ˈna ia Samuela. Ua rave Hana mai ta ˈna i euhe e ua aratai o ˈna ia Samuela no te tavini i te sekene i to ˈna tamariiraa. (Samuela 1, 1:27, 28) Pauroa te mau matahiti, e hamani o Hana i te hoê ahu aita e rima ahu e e afai o ˈna i te reira i ta ˈna tamaiti. Ua haamaitai te Atua ia Hana e ua fanau o ˈna e pae â tamarii: E toru tamaroa e e piti tamahine.—Samuela 1, 2:18-21.

Eaha ta tatou e haapii ra i te hiˈoraa o Hana? Ua tauturu ta Hana pure haavare ore ia ˈna ia faaruru i to ˈna mau fifi. E itehia te pure haamauruururaa a Hana i roto i te Samuela 1, 2:1-10. Te faaite ra te reira i to ˈna faaroo puai i te Atua.

▸ No te ite atu â no nia ia Hana, a hiˈo i te tumu parau “Ua haamahora oia i to ˈna aau i te Atua.”
▸ No te ite no te aha te Atua i vaiiho ai ia faaipoipo hoê tane i e rave rahi vahine i te tau o Iseraela i tahito, a hiˈo i te tumu parau “Te faaipoiporaa i te vahine rau, e farii anei te Atua?”

Iaela

O vai o Iaela? E vahine faaipoipo o ˈna no Hebere, e ere o ˈna i te vahine Iseraela. Ma te itoito, ua turu o ˈna i te nunaa a te Atua.

Eaha ta ˈna i rave? Ua haa oioi Iaela a tae ai Sisera, te raatira o te nuu Kanaana, i to tera vahine puhapa. Ua pau Sisera i to ˈna aroraa ia Iseraela e ua imi o ˈna i te tahi vahi tapuniraa. Ua titau manihini ihora Iaela ia ˈna ia tomo i roto i to ˈna fare ie. A taoto ai Sisera, ua haapohe Iaela ia ˈna.—Te mau tavana 4:17-21.

Na roto i ta Iaela ohipa, ua tupu teie parau tohu ta Debora i faahiti: “I te rima hoi o te tahi vahine e tuu ai Iehova ia Sisera.” (Te mau tavana 4:9) Ua haapopouhia ïa o Iaela e ua parauhia “o ˈna te vahine haamaitai-rahi-hia.”—Te mau tavana 5:24.

Eaha ta tatou e haapii ra i te hiˈoraa o Iaela? Ua haa Iaela ma te papu e te itoito. Te faaite nei to ˈna aamu e nehenehe te Atua e aratai i te mau ohipa ia tupu ta ˈna mau parau tohu.

Iezebela

O vai o Iezebela? E vahine faaipoipo o ˈna a te arii Iseraela, o Ahaba to ˈna iˈoa. E ere o ˈna i te Iseraela. Aita o ˈna i haamori ia Iehova, ua haamori râ ia Baala, hoê atua Kanaana.

Eaha ta ˈna i rave? E arii vahine ino mau o Iezebela. Ua turu oia i te haamoriraa ia Baala e te mau peu taotoraa tia ore o tera haamoriraa. Ua tamata atoa oia i te faaore i te haamoriraa i te Atua mau ra, o Iehova.—Te mau arii 1, 18:4, 13; 19:1-3.

Ia noaa mai ta ˈna i hinaaro, ua tae roa Iezebela i te pari haavare e i te haapohe i te taata. (Te mau arii 1, 21:8-16) Mai ta te Atua i tohu, ua roohia ia ˈna te hoê pohe mauiui mau e aita o ˈna i hunahia.—Te mau arii 1, 21: 23; Te mau arii 2, 9:10, 32-37.

Eaha ta tatou e haapii ra i te hiˈoraa o Iezebela? Ua riro te aamu o Iezebela ei faaararaa no tatou. Aita roa ˈtu o ˈna i rave i te mea maitai e ua ineine o ˈna i te rave i te mau mea atoa no te haamâha i to ˈna mau hinaaro. No reira e faaohipahia ˈi to ˈna iˈoa no te hoê vahine teoteo o te rave i te ohipa ino mau e te hairiiri.

Lea

O vai o Lea? O ˈna te vahine matamua a te patereareha Iakoba. O Rahela to ˈna tuahine apî aˈe e te tahi atu vahine a Iakoba.—Genese 29:20-29.

Eaha ta ˈna i rave? O Lea te metua vahine o ono tamaroa a Iakoba. (Ruta 4:11) Ua opua Iakoba i te faaipoipo ia Rahela, eiaha râ ia Lea. Tera râ, ua faaau Labana, te metua tane o na tamahine, ia faaipoipo Iakoba ia Lea, eiaha râ ia Rahela. Ite atura Iakoba e ua tavirihia oia i to ˈna faaipoiporaa ia Lea, ua ani oia ia Labana ia faaite i te tumu o tera tupuraa. Ua haapapu Labana e ere i te peu matauhia ia faaipoipo na mua roa te tamahine apî aˈe. Hoê hebedoma i muri iho, ua faaipoipo Iakoba ia Rahela.—Genese 29:26-28.

Ua here Iakoba ia Rahela hau aˈe ia Lea. (Genese 29:30) Ei faahopearaa, ua pohehae Lea i to ˈna tuahine e ua imi o ˈna i te ravea ia tâuˈa noa Iakoba ia ˈna. Ua ite te Atua i to Lea huru e ua haamaitai o ˈna ia ˈna inaha ua fanau Lea e hitu tamarii: Ono tamaroa e hoê tamahine.—Genese 29:31.

Eaha ta tatou e haapii ra i te hiˈoraa o Lea? Ua turui Lea i nia i te Atua ma te pure ia ˈna. Noa ˈtu e ere i te mea ohie no ˈna e to ˈna utuafare, ua faaite noa o ˈna i te mauruuru i te Atua. (Genese 29:32-35; 30:20) Te faaite ra to ˈna aamu no te aha mea tano ore ia faaipoipo e rave rau vahine, noa ˈtu aita te Atua i patoi i tera faanahoraa i tera ra tau. Ta te Atua e farii ra, ia faaipoipo te hoê tane i te hoê noa vahine.—Mataio 19:4-6.

▸ No te ite atu â no nia ia Lea, a hiˈo i te tumu parau “Deux sœurs tourmentées qui ont ‘bâti la maison d’Israël.’”
▸ No te ite no te aha te Atua i vaiiho ai ia faaipoipo hoê tane i e rave rahi vahine i te tau o Iseraela i tahito, a hiˈo i te tumu parau “Te faaipoiporaa i te vahine rau, e farii anei te Atua?”

Mareta

O vai o Mareta? E tuahine o ˈna no Lazaro e Maria. I ora na ratou tootoru i te oire iti o Betania, i pihai iho ia Ierusalema.

Eaha ta ˈna i rave? E hoa piri o Mareta ia Iesu, “mea here hoi na Iesu ia Mareta, ia Maria e ia Lazaro.” (Ioane 11:5) E vahine farii maitai o Mareta. I te hoê tere o Iesu, ua maiti Maria i te faaroo ia Iesu, o Mareta râ, ua haapao i te ohipa o te fare. Ua amuamu Mareta ia Iesu a parau ai e aita Maria i tauturu ia ˈna. Ma te mǎrû, ua faaafaro Iesu i to Mareta huru feruriraa.—Luka 10:38-42.

I te hoê mahana, ua maˈihia o Lazaro. Ua ani Mareta e to ˈna tuahine ia Iesu ia haere mai, ma te tiaturi papu e nehenehe o ˈna e faaora i to raua taeae. (Ioane 11:3, 21) Ua pohe râ Lazaro. Ua faaite te tauaparauraa i rotopu ia Mareta raua Iesu e ua tiaturi papu o ˈna e tupu te parau fafau Bibilia o te tia-faahou-raa, oia atoa e mana to Iesu no te faaora ia Lazaro mai te pohe mai.—Ioane 11:20-27.

Eaha ta tatou e haapii ra i te hiˈoraa o Mareta? Ua haa rahi Mareta no te faaite i te farii maitai. Ua farii o ˈna i te aˈoraa ma te aau tae. Ua faaite papu o ˈna i to ˈna mau huru aau e i to ˈna faaroo.

▸ No te ite atu â no nia ia Mareta, a hiˈo i te tumu parau “Ua tiaturi oia.”

Maria (metua vahine o Iesu)

O vai o Maria? E vahine apî o ˈna, e ati Iuda e aita o ˈna i taoto aˈenei i te hoê tane i te taime i fanau ai oia ia Iesu, te tamaiti a te Atua. Ua tupu hoi te hoê semeio.

Eaha ta ˈna i rave? Ma te haehaa, ua rave Maria i to te Atua hinaaro. Ua momoˈahia o ˈna ia Iosepha i to te hoê melahi faraa ˈtu ia ˈna no te faaite e fanau o ˈna i te Mesia fafauhia. (Luka 1:26-33) Ma te aau tae, ua farii o ˈna i te amo i tera hopoia. I muri aˈe i te fanauraa o Iesu, ua riro Maria raua Iosepha ei metua no e maha â tamaroa e e piti paha tamahine. E ere ïa o Maria i te hoê paretenia. (Mataio 13:55, 56) E fanaˈoraa taa ê tei horoahia ia ˈna. Noa ˈtu râ, aita roa ˈtu o ˈna i hinaaro ia aruehia o ˈna e aita hoê aˈe taata tei haamori ia ˈna i te tau taviniraa o Iesu aore ra i roto i te amuiraa Kerisetiano matamua.

Eaha ta tatou e haapii ra i te hiˈoraa o Maria? E vahine faaroo o Maria tei farii ma te aau tae i te hoê hopoia rahi. Mea ite roa o ˈna i te Parau a te Atua. A parau ai i tei papaihia i roto i te Luka 1:46-55, e au ra e 20 faahitiraa Bibilia ta Maria i faaohipa.

▸ No te ite atu â no nia ia Maria, a hiˈo i te tumu parau “Ta te hiˈoraa o Maria e nehenehe e haapii mai.”

Maria (tuahine o Mareta e Lazaro)

O vai o Maria? E tuahine o ˈna no Lazaro raua Mareta e e hoa piri o ˈna no Iesu.

Eaha ta ˈna i rave? Ua faaite Maria e rave rahi taime e ua papu ia ˈna o Iesu te tamaiti a te Atua. Ua faaite o ˈna i to ˈna faaroo a parau ai ia Iesu e ua nehenehe o ˈna e ohipa ia ore Lazaro ia pohe. Ua ite mata atoa o ˈna i te taime i faatia ai Iesu ia Lazaro mai te pohe mai. Ua amuamu Mareta ia Maria no te mea aita o ˈna i tauturu aˈe no te ohipa i te fare a maiti atu ai i te parahi no te faaroo ia Iesu. Tera râ, ua haapopou Iesu ia Maria no to ˈna haafaufaaraa rahi i te mau haapiiraa a te Atua.—Luka 10:38-42.

I te tahi atu taime, ua faaite Maria i te farii maitai ia Iesu ma te ninii i te hoê “monoˈi noˈanoˈa moni rahi” i nia i to ˈna upoo e to ˈna na avae. (Mataio 26:6, 7) Ua parau te tahi atu mau manihini e te haamâuˈa ra Maria i te reira. Ua paturu râ Iesu ia ˈna ma te parau: “I te mau vahi atoa e porohia ˈi te parau apî oaoa [o te Faatereraa arii a te Atua] e ati aˈe te ao nei, e faatia-atoa-hia ta teie vahine i rave ei manaˈoraa ia ˈna.”—Mataio 24:14; 26:8-13.

Eaha ta tatou e haapii ra i te hiˈoraa o Maria? Ua faatupu Maria i te faaroo puai. Ua haafaufaa aˈe o ˈna i ta ˈna haamoriraa i te Atua. Ma te haehaa, ua faahanahana o ˈna ia Iesu, noa ˈtu ua titauhia ia ˈna e rave rahi moni no te na reira.

Maria Magadala

O vai o Maria Magadala? E pǐpǐ taiva ore o ˈna na Iesu.

Eaha ta ˈna i rave? Ua apee o Maria Magadala e te tahi atu mau vahine ia Iesu e ta ˈna mau pǐpǐ i roto i to ratou mau tere. Ma te aau horoa noa, ua faaohipa o ˈna i ta ˈna mau taoˈa no te aupuru ia ratou. (Luka 8:1-3) Ua apee o ˈna ia Iesu tae roa ˈtu i te hopea o ta ˈna taviniraa e tei reira atoa o ˈna i te taime i haapohehia ˈi Iesu. E fanaˈoraa taa ê tei horoahia ia ˈna: Tei roto o ˈna i te mau taata matamua tei ite ia Iesu i muri aˈe i to ˈna tia-faahou-raa.—Ioane 20:11-18.

Eaha ta tatou e haapii ra i te hiˈoraa o Maria Magadala? Ma te aau horoa noa, ua turu o Maria Magadala ia Iesu i roto i ta ˈna taviniraa e ua pee o ˈna ia ˈna ma to ˈna aau atoa e ma te taiva ore.

Miriama

O vai o Miriama? E tuahine o ˈna na Mose e Aarona. O ˈna te vahine matamua tei piihia ei peropheta vahine i roto i te Bibilia.

Eaha ta ˈna i rave? Ei peropheta vahine, ua faaite o ˈna i te mau poroi a te Atua. E tiaraa faufaa to ˈna i Iseraela e ua apiti o ˈna i te mau tane tei himene i te hoê himene upootiaraa i muri aˈe i to te Atua haamouraa i te nuu Aiphiti i te miti Uteute.—Exodo 15:1, 20, 21.

Tau taime i muri aˈe, ua faaino Miriama raua Aarona ia Mose. Ua na reira raua no to raua teoteo e pohehae. Ua “faaroo” noa râ Iehova e ua aˈo etaeta o ˈna ia raua. (Numera 12:1-9) I muri iho, ua faatupu Iehova i te maˈi lepera i nia ia Miriama, no te mea paha o ˈna tei haamata i te faaino ia Mose. I to Mose taparuparuraa i te Atua ia faaorahia Miriama, ua farii Iehova i ta ˈna aniraa. Ua vai atea o Miriama i te puhapa e hitu mahana i te maoro e i muri iho, ua fariihia ia hoˈi o ˈna i te puhapa o Iseraela.—Numera 12:10-15.

Te faaite mai ra te Bibilia e ua farii Miriama i to ˈna aˈoraahia. Tau senekele i muri aˈe, ua faahiti te Atua i ta Miriama fanaˈoraa taa ê a haamanaˈo ai oia i te mau Iseraela: “Ua tono vau ia Mose, Aarona e Miriama i mua ia oe.”—Mika 6:4.

Eaha ta tatou e haapii ra i te hiˈoraa o Miriama? Te faaite ra te aamu o Miriama e te tâuˈa ra te Atua ia paraparau ta ˈna mau tavini te tahi i te tahi. Ua haapii atoa tatou e no te faaoaoa i te Atua, mea titauhia ia patoi i te teoteo e te pohehae. Ia ore anaˈe, e parau paha tatou i te tahi mea o te nehenehe e tuino i te roo o vetahi ê.

Rahaba

O vai o Rahaba? E vahine taiata o ˈna tei ora i te oire Kanaana o Ieriko. Ua riro oia ei tavini a te Atua ra o Iehova.

Eaha ta ˈna i rave? Ua faatapuni Rahaba i na mata huna Iseraela e piti. Ua na reira o ˈna no te mea ua faaroo o ˈna e nafea Iehova, te Atua o Iseraela, i faaora ˈi i to ˈna nunaa mai Aiphiti mai e i muri aˈe, i mua i te ati Amori.

Ua tauturu Rahaba i te mau mata huna e ua taparuparu ia raua ia faaora ia ˈna e i to ˈna utuafare i te taime e haamou ai to Iseraela ia Ieriko. Ua farii raua i ta ˈna aniraa, teie râ te mau titauraa: Ia ore e faaite atu i tei tupu e ia vai noa o ˈna e to ˈna utuafare i roto i to ˈna fare i te taime e aro ai to Iseraela ia Ieriko. E titau-atoa-hia ia ˈna ia taamu i te hoê taura uteute i te haamaramarama o to ˈna fare. Ua pee Rahaba i te mau aratairaa atoa e ua ora o ˈna e to ˈna utuafare a haru ai to Iseraela ia Ieriko.

I muri aˈe, ua faaipoipo Rahaba i te hoê taata Iseraela a riro atu ai ei tupuna o te arii Davida e o Iesu Mesia.—Iosua 2:1-24; 6:25; Mataio 1:5, 6, 16.

Eaha ta tatou e haapii ra i te hiˈoraa o Rahaba? Te faahiti ra te Bibilia i te hiˈoraa o Rahaba mai te hoê vahine tei faatupu i te faaroo puai. (Hebera 11:30, 31; Iakobo 2:25) Te faaite ra to ˈna aamu e e faaore te Atua i te mau hapa, aita roa ˈtu o ˈna e maitiiti i te taata, e haamaitai atoa o ˈna i te feia e tiaturi ra ia ˈna, noa ˈtu to ratou tupuraa.

▸ No te ite atu â no nia ia Rahaba, a hiˈo i te tumu parau “Elle a été ‘déclarée juste par des œuvres.’”

Rahela

O vai o Rahela? E tamahine o ˈna a Labana e o ˈna te vahine ta te patereareha Iakoba i here aˈe.

Eaha ta ˈna i rave? Ua faaipoipo Rahela ia Iakoba e ua fanau o ˈna e piti tamaroa. E upoo utuafare atoa na tamaroa o na opu 12 o Iseraela i tahito ra. I te taime matamua i farerei ai Rahela ia Iakoba, te haapao ra o ˈna i te mau mamoe o to ˈna metua tane. (Genese 29:9, 10) E “vahine nehenehe roa e te haviti” o ˈna, ia faaauhia i to ˈna tuahine paari aˈe o Lea.—Genese 29:17.

Ua here roa Iakoba ia Rahela e ua farii o ˈna ia ohipa e hitu matahiti i te maoro no te faaipoipo ia ˈna. (Genese 29:18) Tera râ, ua taviri Labana ia Iakoba ma te horoa na mua roa ia Lea. I muri iho noa to Labana fariiraa ia faaipoipo Iakoba ia Rahela.—Genese 29:25-27.

Ua rahi aˈe to Iakoba here no Rahela e ta ˈna na tamaroa ia faaauhia i to ˈna here no Lea e ta ˈna mau tamarii. (Genese 37:3; 44:20, 27-29) No reira i fifihia ˈi te mau taairaa i rotopu i na vahine.—Genese 29:30; 30:1, 15.

Eaha ta tatou e haapii ra i te hiˈoraa o Rahela? Ua faaruru Rahela i te hoê tupuraa fifi mau i roto i to ˈna utuafare. Ua tiaturi noa râ o ˈna e e faaroo te Atua i ta ˈna mau pure. (Genese 30:22-24) Te faaite ra to ˈna aamu i te mau fifi ta te faaipoiporaa i e rave rau vahine e faatupu i roto i te mau utuafare. Te faaite atoa ra te hiˈoraa o Rahela e mea î i te paari te faanahoraa a te Atua, oia hoi te faaipoiporaa i rotopu i te hoê tane e te hoê noa vahine.—Mataio 19:4-6.

▸ No te ite atu â no nia ia Rahela, a hiˈo i te tumu parau “Deux sœurs tourmentées qui ont ‘bâti la maison d’Israël.’”
▸ No te ite no te aha te Atua i vaiiho ai ia faaipoipo hoê tane i e rave rahi vahine i te tau o Iseraela i tahito, a hiˈo i te tumu parau “Te faaipoiporaa i te vahine rau, e farii anei te Atua?”

Rebeka

O vai o Rebeka? Ua faaipoipo o ˈna ia Isaaka e ua fanau o ˈna e piti tamaroa maehaa, o Iakoba e o Esau.

Eaha ta ˈna i rave? Ua rave o ˈna i te hinaaro o te Atua noa ˈtu e ere i te mea ohie. Tei te apoo pape o ˈna no te faaî i te farii. Ani atura te hoê taata maa pape no te inu. Oioi Rebeka i te horoaraa i te pape i tera taata e i ta ˈna mau kamela. (Genese 24:15-20) E tavini tera taata na Aberahama e ua tere atea o ˈna no te imi i te hoê vahine na Isaaka, te tamaiti a Aberahama. (Genese 24:2-4) Ua ani o ˈna ia Iehova i ta ˈna aratairaa. I to ˈna iteraa e vahine itoito e te farii maitai o Rebeka, ua papu ia ˈna e tera te pahonoraa a te Atua. O Rebeka iho â ta Iehova i maiti ei vahine na Isaaka.—Genese 24:10-14, 21, 27.

I to Rebeka iteraa i te tumu i haere mai ai tera tavini, ua farii oia i te apee ia ˈna e i te riro ei vahine na Isaaka. (Genese 24:57-59) Ua fanau mai o Rebeka e piti tamaroa maehaa. Ua faaite te Atua ia ˈna e e tavini te tuaana, Esau, ia Iakoba, te teina. (Genese 25:23) I to Isaaka faaotiraa e horoa i te tufaa matahiapo ia Esau, ua haa oioi o Rebeka ia fanaˈo Iakoba i tera haamaitairaa. Ua papu hoi ia Rebeka e tera mau iho â te hinaaro o te Atua.—Genese 27:1-17.

Eaha ta tatou e haapii ra i te hiˈoraa o Rebeka? E vahine aau haihai o Rebeka. Mea itoito e mea farii o ˈna. E mau huru maitatai teie o tei tauturu ia ˈna ei vahine faaipoipo, ei metua vahine e ei tavini i te Atua mau.

▸ No te ite atu â no nia ia Rebeka, a hiˈo i te tumu parau “E haere ïa vau.”

Ruta

O vai o Ruta? E vahine Moabi o ˈna tei faarue i to ˈna mau atua e to ˈna fenua no te riro ei tavini na Iehova i Iseraela.

Eaha ta ˈna i rave? Ua faaite o Ruta i te here taiva ore i to ˈna metua vahine hoovai o Naomi. Ua haere Naomi, ta ˈna tane e ta raua na tamaiti e faaea i Moabi, no te horo ê i te oˈe i Iseraela. Faaipoipo aˈera na tamaiti i te vahine Moabi, o Ruta e Oraphe. Tau taime i muri iho, ua pohe ta Naomi tane e ta ˈna na tamaiti. Toe noa mai na toru vahine ivi.

Ua faaoti o Naomi e hoˈi i Iseraela, ua ore hoi te oˈe i reira. Ua hinaaro atoa Ruta e Oraphe e haere na muri ia Naomi. Tera râ, ua parau Naomi ia raua ia hoˈi i to raua fetii. O ta Oraphe ïa i rave. (Ruta 1:1-6, 15) Area o Ruta, ua faaea noa i pihai iho i to ˈna metua vahine hoovai. Ua here o ˈna ia Naomi e ua hinaaro e haamori i to ˈna Atua, Iehova.—Ruta 1:16, 17; 2:11.

No to Ruta faaiteraa i te haapao maitai i to ˈna metua hoovai e no to ˈna itoito rahi, e roo maitai to ˈna i Betelehema, te oire o Naomi. Ua maere roa o Boaza, te hoê taata faaapu taoˈa rahi, i te huru o Ruta e ua horoa o ˈna e rave rahi maa na ˈna e na Naomi. (Ruta 2:5-7, 20) I muri iho, ua faaipoipo o Ruta ia Boaza a riro atu ai ei tupuna no te arii Davida e no Iesu Mesia.—Mataio 1:5, 6, 16.

Eaha ta tatou e haapii ra i te hiˈoraa o Ruta? No to ˈna here ia Naomi e ia Iehova, ua ineine o Ruta i te faarue i to ˈna fenua e fetii. Noa ˈtu ua faaruru o ˈna e rave rahi fifi, ua tamau o ˈna i te faaite i te itoito e te taiva ore.

▸ No te ite atu â no nia ia Ruta, a hiˈo i te tumu parau “Te vahi ta oe e haere ra, e haere atoa ïa vau” e “Vahine haapao maitai.”

Sara

O vai o Sara? E vahine o ˈna a Aberahama e e metua vahine o ˈna o Isaaka.

Eaha ta ˈna i rave? Ua faarue Sara i te hoê oraraa fanaˈo i te oire o Ura, hoê oire paruru-maitai-hia e te naho. Ua tiaturi papu hoi o ˈna i te mau parau fafau ta te Atua i faaite i ta ˈna tane o Aberahama. Ua parau Iehova ia Aberahama ia faarue ia Ura e ia haere i Kanaana. Ua fafau te Atua ia Aberahama e e haamaitai o ˈna ia ˈna e e faariro o ˈna ia ˈna ei nunaa rahi. (Genese 12:1-5) E ono ahuru matahiti paha to Sara i tera taime. Mai tera mahana, ua ora Sara raua Aberahama i roto i te fare ie a taui noa ˈi i te vahi puhaparaa.

Ua faaruru Sara i te mau tupuraa atâta a ora ˈi i roto i te fare ie e a taui noa ˈi i te vahi nohoraa. Noa tu râ, ua turu noa o ˈna ia Aberahama no te mea ua pee ta ˈna tane i te aratairaa a te Atua. (Genese 12:10, 15) E rave rahi matahiti i te maoro, ua oto rahi o Sara no te mea aita o ˈna i fanau i te tamarii. Tera râ, ua fafau te Atua e e haamaitai o ˈna i to Aberahama huaai. (Genese 12:7; 13:15; 15:18; 16:1, 2, 15) I te hoê mahana, ua haapapu te Atua ia Sara e e fanau o ˈna i te hoê tamarii.Tera iho â tei tupu: Ua fanau o ˈna i te hoê tamarii noa ˈtu e 90 matahiti to ˈna e 100 matahiti to Aberahama. (Genese 17:17; 21:2-5) O Isaaka te iˈoa ta raua i maiti no ta raua tamaiti.

Eaha ta tatou e haapii ra i te hiˈoraa o Sara? Te haapii mai ra te hiˈoraa o Sara e e faatupu iho â te Atua pauroa ta ˈna i fafau, noa ˈtu e ohipa maere mau te reira no tatou. (Hebera 11:11) Te faaite atoa ra to ˈna hiˈoraa ei vahine e mea faufaa ia faatura i te hoa faaipoipo.—Petero 1, 3:5, 6.

▸ No te ite atu â no nia ia Sara, a hiˈo i te tumu parau “Tu es une femme belle d’apparence” e “Na te Atua i pii ia ˈna tamahine hui arii!”

Vahine a Lota

O vai te vahine a Lota? Eita te Bibilia e faaite o vai to ˈna iˈoa. Te faaite nei râ te Bibilia e e piti tamahine ta ˈna e ua faaea ratou i te oire o Sodoma.—Genese 19:1, 15.

Eaha ta te vahine a Lota i rave? Aita o ˈna i pee i te faaueraa a te Atua. Ua faaoti te Atua i te haamou ia Sodoma e i te mau oire i pihai iho no te mea ua rave te mau taata i te mau peu taotoraa tia ore e te hairiiri. No to ˈna here no Lota e to ˈna utuafare tei ora i Sodoma, ua tono te Atua i e piti melahi no te faaora ia ratou.—Genese 18:20; 19:1, 12, 13.

Ua faaite te mau melahi ia Lota e to ˈna utuafare ia horo ê e ia ore e hiˈo i muri. Aita anaˈe, e pohe ratou. (Genese 19:17) Ua hiˈo râ te vahine a Lota i muri, “e riro maira ei pou miti papaa.”—Genese 19:26.

Eaha ta tatou e haapii ra i te hiˈoraa o te vahine a Lota? Te haapapu ra to ˈna hiˈoraa e ua tae roa o ˈna i te faaroo ore ia Iehova no to ˈna haafaufaaraa i te mau taoˈa materia. E faahopearaa ino te tupu ia faaite tatou hoê â huru feruriraa. Ua faahiti Iesu i te hiˈoraa o te vahine a Lota ei faaararaa no tatou. Ua na ô oia: “A haamanaˈo i te vahine a Lota.”—Luka 17:32.

Vahine Sulami

O vai te vahine Sulami? E potii haviti mau o ˈna e ua papaihia te buka Bibilia Sire a Solomona no nia ia ˈna. Aita te Bibilia e faaite ra o vai to ˈna iˈoa.

Eaha ta te vahine Sulami i rave? Ua vai taiva ore te vahine Sulami i te tiai mamoe ta ˈna i here mau na. (Sire a Solomona 2:16) Tera râ, ua ite te arii taoˈa rahi o Solomona i tera potii nehenehe mau e ua tamata i te faahinaaro ia ˈna. (Sire a Solomona 7:6) Noa ˈtu ua turai te tahi mau taata i te vahine Sulami ia maiti i te arii Solomona, aita o ˈna i farii. Ua here rahi o ˈna i te tiai mamoe riirii e ua vai taiva ore o ˈna ia ˈna.—Sire a Solomona 3:5; 7:10; 8:6.

Eaha ta tatou e haapii ra i te hiˈoraa o te vahine Sulami? Ua faaite noa o ˈna i te haehaa noa ˈtu mea haviti o ˈna e mea haapao roa te taata ia ˈna. Aita roa ˈtu o ˈna i vaiiho i te mau faaheporaa e te mau taoˈa rahi a te arii Solomona ia faaiti i to ˈna here no to ˈna tiai mamoe. Ua haavî o ˈna i to ˈna mau huru aau e ua vai viivii ore o ˈna.