O vai “te Alepha e te Omega”?

Te pahonoraa a te Bibilia

O Iehova te Atua Manahope “te Alepha e te Omega.” Ua faahitihia teie na parau e toru taime i roto i te Bibilia.—Apokalupo 1:8; 21:6; 22:13.a

No te aha te Atua e parau ai o ˈna “te Alepha e te Omega”?

Ua papaihia te piti o te tuhaa o te Bibilia na roto i te reo Heleni, parau-atoa-hia te reira, te Faufaa Apî. Tei roto atoa hoi te buka hopea o te Bibilia, oia hoi Apokalupo. I roto i te piapa Heleni, Alepha, o te reta matamua ïa, e Omega, o te reta hopea ïa. No reira, ia parau Iehova o ˈna “te Alepha e te Omega,” te parau ra ïa oia o ˈna te haamataraa e te hopea. (Apokalupo 21:6) O ˈna te Atua Manahope “mai tahito mai â e a muri noa ˈtu.”—Salamo 90:2.

O vai “te matamua” e “te hopea”?

E faaohipahia na parau i te tahi taime no Iehova, e i te tahi atu taime, no ta ˈna Tamaiti ra o Iesu. Mea taa ê râ te auraa, teie e piti hiˈoraa:

• I roto i te Isaia 44:6, te parau ra Iehova: “O vau te matamua e o vau te hopea. Aita ˈtu e Atua, o vau anaˈe.” I ǒ nei, te faaite ra Iehova o ˈna te Atua mau mai tahito mai â e a muri noa ˈtu, e aita ˈtu, o ˈna anaˈe râ. (Deuteronomi 4:35, 39) Ia parau Iehova, “O vau te matamua e o vau te hopea,” hoê â ïa auraa ia parau o ˈna, “O vau te Alepha e te Omega.”

• I roto i te Apokalupo 1:17, 18 e te 2:8, te taˈo Heleni faaohipahia no te parau “te matamua,” o peroto, e ere alepha. E no te parau “te hopea,” o esahato, e ere omega. I roto i teie mau irava, te faahitihia ra te parau o te tahi o te pohe e o te faatiahia mai i te ora. Ua ite tatou eita te Atua e pohe, e ere ïa no ˈna te parau i roto i teie mau irava. (Habakuka 1:12) E tano râ no Iesu no te mea ua pohe e ua faatiahia mai o ˈna. (Ohipa 3:13-15) O Iesu te matamua i rotopu i te mau taata o te faatiahia mai ei varua pohe ore i te raˈi, e i reira o ˈna e ora ˈi e a muri noa ˈtu. (Apokalupo 1:18; Kolosa 1:18) Mea na roto ia Iesu e faatiahia mai ai te feia atoa i muri mai. (Ioane 6:40, 44) No reira o ˈna te hopea o ta Iehova iho i faatia mai i te ora. (Ohipa 10:40) Tera ïa te auraa ia parau-anaˈe-hia o Iesu “te Matamua e te Hopea.”

O Iesu anei “te Alepha e te Omega” i roto i te Apokalupo 22:13?

E ere. I roto i tera pene, ua rau te paraparau ra e aita ïa i papu maitai o vai te paraparau ra i roto i te Apokalupo 22:13. Teie ta te aivanaa Bibilia o William Barclay i papai no nia i tera tuhaa o te Apokalupo: “Ua rau te paraparau ra i roto i tera pene . . . mea fifi roa ïa ia papu maitai o vai te faahiti ra i tera parau e tera parau.” (The Revelation of John, buka 2, piaraa apî i te api 223) Tera râ, mai i roto i te toea o te buka Apokalupo, ua papu roa ia tatou o te Atua ra o Iehova te faahiti ra, “O vau te Alepha e te Omega” i roto i te Apokalupo 22:13.