Ehia Ite no Iehova na te ao nei?

Mea nafea outou ia taio i to outou mau mero?

E taiohia ei Ite no Iehova, te feia anaˈe o tei poro ra i te parau apî oaoa o te Faatereraa arii a te Atua i te mau avaˈe atoa. (Mataio 24:14) Tei roto atoa i tera numera te mau taata, bapetizohia ei Ite no Iehova aore ra aita, o tei faaî i te mau titauraa no te poro.

E titauhia anei ia horoa i te moni no te riro ei Ite no Iehova?

Aita. Eita atoa e na reirahia no te fanaˈo i te tahi noa ˈˈe hopoia i roto i ta matou faanahonahoraa. (Ohipa 8:18-20) No te rahiraa o te mau ô, eita e itehia te iˈoa o te feia i horoa i te reira. Ia au i ta ratou i faaoti e to ratou tupuraa, e horoa te mau Ite no Iehova atoa i to ratou taime, puai e ta ratou faufaa no ta matou ohipa na te ao nei.—Korinetia 2, 9:7.

Mea nafea outou ia ite ehia tei poro?

I te mau avaˈe atoa, e faaite te mau Ite no Iehova i ta ratou tapura ohipa i ta ratou amuiraa. Na te taata taitahi e faaite i ta ˈna iho.

E patapatahia te mau tapura ohipa atoa a te amuiraa i roto i te matini roro uira, e haponohia te mau numera i te piha ohipa o to matou fenua. Na reira ˈtu te mau numera i te faataehia i ta matou pu rahi.

I te mau hopea matahiti taviniraaa atoa, e itehia te numera rahi roa ˈˈe o te mau Ite no Iehova i tera e tera fenua. E amuihia tera mau numera atoa no te ite ehia Ite no Iehova na te ao nei. E piahia te mau numera o te mau fenua atoa i nia i ta matou reni natirara i te tuhaa “Ati aˈe te ao.” Mai no te mau Kerisetiano matamua, e faaitoito tera mau numera ia matou.—Ohipa 2:41; 4:4; 15:3.

Ua taiohia anei te feia o te ore e poro ra, ua putuputu râ e outou?

Noa ˈtu eita matou e taio ia ratou i roto i te mau numera o te mau Ite no Iehova, te oaoa nei matou i te farii i tera mau taata i te mau putuputuraa. E haere mai te rahiraa o ratou i te Oroa haamanaˈoraa i te pohe o te Mesia o te tupu hoê taime i te matahiti. E itehia ehia o ratou tei tae i tera oroa ia tatarahia te numera o te mau Ite no Iehova. I 2025, 20 635 015 taata tei tae i te Oroa haamanaˈoraa.

E rave rahi o te ore e haere i ta matou mau putuputuraa, o te fanaˈo ra râ i te tahi haapiiraa Bibilia tamoni ore. I 2025, ua faaterehia 7 603 182 i te mau avaˈe atoa. I te tahi taime, e rave rau taata o te fanaˈo i te haapiiraa Bibilia i te hoê â taime.

No te aha ua rahi aˈe te numera a te hau no nia i te mau Ite no Iehova i ta outou e faaite?

E pinepine te mau pu hiˈopoaraa numera a te hau i te horoa i te numera o te mau mero o te tahi haapaoraa ia au i ta te taata i pahono atu. Te faaite ra te pu hiˈopoaraa o te mau numera a to Marite, ua tamata ratou i “te ite ua niuhia anei te numera o te mau taata o te tahi haapaoraa i nia i te tupuraa mau, eiaha râ ia au i ta te taata e manaˈo ra.” Area matou, e taio ïa ei Ite no Iehova, te mau taata anaˈe o te poro ia vetahi ê e te faaite i ta ratou tapura ohipa, eiaha râ i nia i te rahiraa o te taata o tei parau e Ite no Iehova ratou.