Eaha ta te Bibilia e parau ra no nia i te ava? E hara anei ia inu i te ava?
Te pahonoraa a te Bibilia
E ere i te hara ia inu i te ava, tera râ ma te au noa. Te parau ra te Bibilia, e ô te uaina no ô mai i te Atua no te faaoaoa i te oraraa a te taata nei. (Salamo 104:14, 15; Koheleta 3:13; 9:7) Te faahiti atoa ra te Bibilia e nehenehe te uaina e rapaau i te tino.—Timoteo 1, 5:23.
Ua inu Iesu i te uaina a ora ˈi oia i nia i te fenua. (Mataio 26:29; Luka 7:34) I te hoê oroa faaipoiporaa, ua taui semeio Iesu i te pape ei uaina.—Ioane 2:1-10.
Te mau fifi ia inu rahi i te ava
Noa ˈtu te faahiti ra te Bibilia e mea maitai te uaina, te opani etaeta ra o ˈna i te inu-hua-raa e te taero ava. Tera râ, ia hinaaro te hoê Kerisetiano ia inu i te ava, ia reira o ˈna ma te au noa. (Timoteo 1, 3:8; Tito 2:2, 3) E rave rahi tumu ta te Bibilia e horoa ra ia haapae tatou i te inu-hua-raa i te ava.
E haafifi te reira i te feruriraa e te mau faaotiraa. (Maseli 23:29-35) Aita te hoê taata taero ava e nehenehe e haapao i te faaueraa Bibilia o te parau ra: “Ia pûpû atu i to outou tino ei tusia ora e te moˈa e te au i te Atua, oia hoi te hoê taviniraa moˈa ma to outou feruriraa atoa.”—Roma 12:1.
Ia inu hua te hoê taata aita o ˈna e “hinaaro e rave i te mea tia.”—Hosea 4:11; Ephesia 5:18.
E nehenehe o ˈna e vevehia e e fifihia i te pae ea.—Maseli 23:21, 31, 32.
Aita te Atua e au i te inu-hua-raa i te ava e te taero ava.—Maseli 23:20; Galatia 5:19-21.
Nafea ia ite e ua inu rahi roa te hoê taata?
Ua inu rahi roa te hoê taata mai te peu e haafifi te reira i to ˈna ora aore ra to vetahi ê. Parau mau, e itehia ua taero te hoê taata ia nuhi anaˈe o ˈna. Tera râ, ia au i te Bibilia e nehenehe atoa o ˈna e peretete, e imi peapea aore ra e fifi ta ˈna huru paraparau. (Ioba 12:25; Salamo 107:27; Maseli 23:29, 30, 33) Noa ˈtu aita te hoê taata e inu ia taero roa e nehenehe ra o ˈna e “teimaha i te rahi . . . i te inu hua” e e roohia i te fifi mau.—Luka 21:34, 35.
A haapae roa i te inu i te ava
Te faaite atoa ra te Bibilia mea tia ia haapae te hoê Kerisetiano i te inu i te ava i roto i teie mau tupuraa:
Mai te peu e faaturori te reira ia vetahi ê.—Roma 14:21.
Mai te peu e opani te ture a te hoê fenua ia inu i te ava.—Roma 13:1.
Mai te peu aita te hoê taata e nehenehe e faaea i ta ˈna inuraa ava. E titauhia ia faaoti etaeta te hoê taata tei inu hua ra i te ava ia haapae roa i te reira.—Mataio 5:29, 30.