TA TE FEIA APÎ E UIUI NEI
E taatiraa pae tino mau anei te taatiraa na roto i te vaha?
Ia au i te Pu arairaa maˈi no te Hau amui no Marite, ua hau atu i te afa te feia uiuihia e 15 tae atu i te 19 matahiti tei rave aˈena te taatiraa na roto i te vaha. Te parau Sharlene Azam, te papai parau o te buka Les relations buccogénitales: la nouvelle façon de se dire bonne nuit (reo Beretane): “Ia paraparau oe i te mau taurearea [no nia i te taatiraa na roto i te vaha] e parau mai ratou e ere i te fifi rahi, oia mau no ratou e ere te reira i te taatiraa i te pae tino.”
Eaha to oe manaˈo?
A pahono e aore ra aita i te mau uiraa i muri nei.
E hapû anei te hoê tamahine ia rave oia i te taatiraa na roto i te vaha?
E
Aita
E fifi anei to oe ea ia rave oe i te taatiraa na roto i te vaha?
E
Aita
E taatiraa pae tino mau anei te taatiraa na roto i te vaha?
E
Aita
Eaha te ohipa e itehia ra?
A faaau i ta oe mau pahonoraa i to muri nei.
E hapû anei te hoê tamahine ia rave oia i te taatiraa na roto i te vaha?
Pahonoraa: Aita. Teie hoê o te tumu e faaoti ai e rave rahi taata, ma te hape, e ere te taatiraa na roto i te vaha i te mea ino.
E fifi anei to oe ea ia rave oe i te taatiraa na roto i te vaha?
Pahonoraa: E. E nehenehe te hoê taata o te rave ra i te taatiraa na roto i te vaha e roohia i te hépatite (A aore ra B), te maˈi purumu, te maˈi puupuu pê, te maˈi heˈa mate e te syphilis.
E taatiraa pae tino mau anei te taatiraa na roto i te vaha?
Pahonoraa: E. O te mau taatiraa o te faaohipa ra i te mero atiraa o te tahi atu taata, o te mau peu taotoraa tia ore mai te taatiraa na roto i te vaha, te taatiraa na roto i te tiho e te mirimiriraa i te mero atiraa o te tahi atu taata, o te taatiraa i te pae tino ïa teie.
No te aha mea faufaa?
A hiˈo i te mau irava e rave rahi i roto i te Bibilia o te faaite ra no nia i te taatiraa na roto i te vaha.
Te parau ra te Bibilia: “Teie . . . te hinaaro o te Atua, . . . ia haapae i te mau peu taotoraa tia ore e tia ˈi.”—Tesalonia 1, 4:3.
Te faaauhia ra te taˈo “peu taotoraa tia ore” hurihia na roto i te reo tumu, i te mau huru peu taotoraa atoa i rapaeau i te faaipoiporaa, mai te peu taotoraa tia ore, te taatiraa na roto i te vaha, te taatiraa na roto i te tiho e te mirimiriraa i te mero atiraa o te tahi atu taata. Ia rave te hoê taata i te peu taotoraa tia ore, e faahopearaa ino mau i muri iho, te mea ino roa ˈtu â o to ˈna ïa auhoaraa e te Atua.—Petero 1, 3:12.
Te parau ra te Bibilia: “O te rave i te mau peu taotoraa tia ore, te hara ra ïa i to ˈna iho tino.”—Korinetia 1, 6:18.
E nehenehe te taatiraa na roto i te vaha e haamauiui i te pae tino, i te pae varua e i te pae feruriraa atoa. Te faaite ra te buka Comment parler de sexualité avec vos enfants (reo Beretane): “E ere te tatarahaparaa, te paruparuraa aore ra te manaˈoraa e ua haavarehia oe i te huru aau ta oe e nehenehe e ite noa i muri iho i te tahi taatiraa i te pae tino. E nehenehe te huru aau ino tei tupu mai i roto i te aau o te hoê taata i muri aˈe i te tahi taatiraa i te pae tino mauiui mau e tupu atoa i roto i te tahi atu mau taatiraa i te pae tino mauiui mau. Te taatiraa i te pae tino e taatiraa i te pae tino ïa.”
Te parau ra te Bibilia: “O vau, o Iehova to oe Atua, Tei haapii ia oe ia faufaahia oe.”—Isaia 48:17.
Te tiaturi mau ra anei oe e mea faufaa te mau ture a te Atua no nia i te taatiraa i te pae tino no oe? Aore ra te manaˈo ra oe e mea etaeta te reira no oe? No te tauturu ia oe ia pahono i teie mau uiraa, a feruri na e ua tuuhia i nia i te purumu mea taata roa i te mau tapao no te taotia i te vitiviti, te mau tapao o na mori e toru e te mau tapao no te faaea. I to oe manaˈo, teie mau tapao mai te hoê taotiaraa anei aore ra mai te hoê parururaa? Eaha te tupu mai te peu eita oe e te tahi atu mau taata faahoro e faatura i te reira?
E taotia te mau ture no te tereraa pereoo i to oe tiamâraa, e paruru râ te reira ia oe. Hoê â huru no te mau ture a te Atua, e taotia te reira ia oe, e paruru râ te reira ia oe.
Hoê â huru no te mau ture aveia a te Atua. Mai te peu eita oe e faatura i te reira, mea papu e ooti oe i ta oe i ueue. (Galatia 6:7) Te parau ra te buka La sexualité intelligente (reo Beretane): “Hau atu â oe i te vaiiho i ta oe mau tiaturiraa e ta oe mau faufaa tumu no te rave i te mau ohipa ta oe e ore au, e iti mai to oe faatura ia oe iho.” Ia ora râ oe ia au i te mau ture aveia a te Atua, e faaite oe e mea puai to oe feruriraa. Hau atu â i te reira, e tapea oe i te hoê manaˈo haava mâ.—Petero 1, 3:16.