No te aha mea rahi te haapaoraa te parau ra e Kerisetiano ratou?
Te pahonoraa a te Bibilia
Ua faaohipa te taata i te mau haapiiraa a Iesu Mesia no te haamau e rave rahi haapaoraa parauhia “Kerisetiano.” Tera râ, te faaite ra te Bibilia e hoê anaˈe haapaoraa mau. E hiˈopoa anaˈe e toru tumu no te haapapu i te reira.
Ua parau Iesu o “te parau mau” ta ˈna i haapii. Ua faahiti te mau Kerisetiano matamua o “te parau mau” ta ratou haapaoraa. (Ioane 8:32; Petero 2, 2:2; Ioane 2, 4; Ioane 3, 3) No reira, te mau taata o te haaparare ra i te mau haapiiraa aita e tuati ra i ta Iesu i haapii, e ere ratou i te Kerisetiano mau.
Te parau ra te Bibilia no te mau Kerisetiano: “Ia tu ta outou mau parau.” (Korinetia 1, 1:10) Tera râ, mea rahi te mau haapaoraa aita e tu ra to ratou mau manaˈo no nia i te auraa o te parau “Kerisetiano.” Aita ïa ta ratou haapiiraa e tano ra.—Petero 1, 2:21.
Ua tohu Iesu e mea rahi tei parau e Kerisetiano ratou aita râ e haapao i ta ˈna mau faaueraa. Aita ïa Iesu e farii ia ratou. (Mataio 7:21-23; Luka 6:46) Ua haavarehia e rave rahi taata e te mau aratai haapaoraa. Ua faaino hoi ratou i te parau mau no to ratou iho mau hinaaro. (Mataio 7:15) Tera râ, mea au na vetahi teie huru haapaoraa “Kerisetiano,” no te mea tera ta ratou e hinaaro e faaroo eiaha râ te parau mau no roto mai i te Bibilia.—Timoteo 2, 4:3, 4.
I roto i ta ˈna faahohoˈaraa o te sitona e te zizania, ua tohu Iesu e tupu te ohipa apotata o te haafifi ra i te Kerisetianoraa mau. (Mataio 13:24-30, 36-43) I roto i te hoê area taime roa, aita e itehia te taa-ê-raa i rotopu i te mau Kerisetiano mau e te mau Kerisetiano haavare. Mai ta Iesu i tohu, e uˈana te ohipa apotata i muri aˈe i te poheraa o te mau aposetolo. (Ohipa 20:29, 30) Noa ˈtu e taui te mau haapiiraa a te mau apotata, e rave rahi haapaoraa e parau ra e Kerisetiano ratou tei “hahi ê . . . i te parau mau.”—Timoteo 2, 2:18.
Ua tohu atoa Iesu e ite-maitai-hia o vai te Kerisetiano mau e te Kerisetiano haavare. Tera te itehia ra i teie mahana, i “te anotau hopea . . . o te hoê ao.”—Mataio 13:30, 39.