Eaha te auraa o te mau papai i roto i te buka Apokalupo?
Te pahonoraa a te Bibilia
O te “heheuraa,” te auraa o te iˈoa Heleni o te buka Bibilia Apokalupo. Te faaite ra tera iˈoa i te auraa o te Apokalupo, oia hoi e heheu te reira i te mau mea i hunahia e te mau tupuraa o te tupu i muri aˈe roa i to ratou papairaahia. Mea rahi te parau tohu o tera buka tei ore i tupu atura.
Haapotoraa o te buka Apokalupo
Omuaraa parau.—Apokalupo 1:1-9.
Poroi a Iesu i na amuiraa e hitu.—Apokalupo 1:10–3:22.
Orama o te Atua i nia i to ˈna terono i te raˈi.—Apokalupo 4:1-11.
Anairaa orama o te tupu te tahi i muri i te tahi:
Hitu tapao taati.—Apokalupo 5:1–8:6.
Hitu pu, e na toru pu hopea te faaite ra e toru ati.—Apokalupo 8:7–14:20.
Hitu auˈa, e e ati to roto i te auˈa taitahi o te faahohoˈa ra i te hoê haavaraa a te Atua maniihia i nia i te fenua.—Apokalupo 15:1–16:21.
Orama o te haamouraa o te mau enemi o te Atua.—Apokalupo 17:1–20:10.
Orama o te mau haamaitairaa a te Atua no te raˈi e te fenua.—Apokalupo 20:11–22:5.
Parau hopea.—Apokalupo 22:6-21.
No te taa maitai i te buka Apokalupo
No te feia e tavini i te Atua, mea anaanatae te poroi a te buka Apokalupo e ere roa ˈtu i te mea riaria. E rave rahi o te faatuati ra i te taˈo “apocalypse” i te hoê ati rahi. Tera râ, te faaite ra te buka Apokalupo mai te omuaraa tae roa ˈtu i te hopea e e oaoa te feia e taio, e taa e e faaohipa i ta ˈna poroi.—Apokalupo 1:3; 22:7.
Te faaohipa nei te buka Apokalupo e rave rahi mau parau “taipe.”—Apokalupo 1:1.
Ua faahiti aˈena te tahi atu mau buka Bibilia i te taata e te taipe e rave rahi itehia i roto i te buka Apokalupo:
Iehova: “Te Atua mau i te raˈi” e te Atua i poiete i te mau mea atoa.—Deuteronomi 4:39; Salamo 103:19; Apokalupo 4:11; 15:3.
Iesu Mesia: “Te Arenio a te Atua.”—Ioane 1:29; Apokalupo 5:6; 14:1.
Satani te Diabolo: To te Atua enemi.—Genese 3:14, 15; Ioane 8:44; Apokalupo 12:9.
Babulonia rahi: Mai ia Babulonia i tahito (Babela), e enemi no te Atua ra o Iehova e to ˈna nunaa. No ǒ mai ia ˈna ra te mau haavare i te pae faaroo.—Genese 11:2-9; Isaia 13:1, 11; Apokalupo 17:4-6; 18:4, 20.
“Te miti”: O te feia ino o te patoi i te Atua.—Isaia 57:20; Apokalupo 13:1; 21:1.
Te mau tuhaa o te sekene faaohipahia no te haamori i te Atua, oia atoa te afata o te faufaa, te miti e au i te hiˈo (tura no te horoiraa), te mori, te pûpûraa i te mea noˈanoˈa e te fata o te tusia.—Exodo 25:10, 17, 18; 40:24-32; Apokalupo 4:5, 6; 5:8; 8:3; 11:19.
Te mau puaa taehae: Te faahohoˈa ra i te mau faatereraa taata.—Daniela 7:1-8, 17-26; Apokalupo 13:2, 11; 17:3.
Te mau numera faaohipahia ei taipe.—Apokalupo 1:20; 8:13; 13:18; 21:16.
Te tupu ra te mau orama i “te mahana o te Fatu” o te haamata a haamauhia ˈi te Faatereraa arii a te Atua i 1914 e a faatere ai Iesu ei Arii. (Apokalupo 1:10) E tupu ïa te mau parau o te Apokalupo i to tatou nei tau.
No te taa i te buka Apokalupo, e hinaaro tatou i te hoê â mau mea tei tauturu mai ia taa i te toea o te Bibilia: Te paari no ǒ mai i te Atua e te tauturu a te feia tei taa aˈena i te reira.—Ohipa 8:26-39; Iakobo 1:5.