Eaha te tupu ia pohe tatou?

Te pahonoraa a te Bibilia

Te parau ra te Bibilia: “Ua ite hoi te feia ora e pohe ratou, aita râ te feia pohe i ite i te tahi mea.” (Koheleta 9:5; Salamo 146:4) No reira, ia pohe te tahi taata e faaea ïa o ˈna i te ora. Aita te feia pohe e nehenehe e feruri, e rave i te ohipa, e oaoa aore ra e mauiui.

“I te repo e hoˈi ai oe”

Ua faataa te Atua i te taata matamua o Adamu eaha te tupu ia pohe te taata. No te mea aita Adamu i auraro ia ˈna, ua parau te Atua: “E repo hoi oe, e i te repo e hoˈi ai oe.” (Genese 3:19) Na mua te Atua i hamani ai ia Adamu i “te repo fenua,” aita Adamu. (Genese 2:7) No reira, i to Adamu poheraa ua hoˈi oia i te repo e ua faaea i te ora.

Tera atoa te tupu ia pohe anaˈe te taata e te animara. Te parau ra hoi te Bibilia: “No te repo mai ratou pauroa, e e hoˈi ratou pauroa i te repo.”—Koheleta 3:19, 20.

E tiaturiraa anei to te feia pohe?

Pinepine te Bibilia e faaau ai te pohe i te taoto. (Salamo 13:3; Ioane 11:11-14; Ohipa 7:60) Ia taoto maitai te hoê taata aita o ˈna e ite eaha te ohipa e tupu ra. Oia atoa no te feia pohe, aita ratou e ite i te hoê noa aˈe mea. Tera râ, te parau ra te Bibilia e nehenehe te Atua e faaara i tei pohe e e faahoˈi ïa ia ratou i te ora. (Ioba 14:13-15) Oia mau, e nehenehe tatou e tiaturi e faatia faahou mai te Atua i te feia pohe.