Te Atua: E puai noa anei o ˈna?

Te pahonoraa a te Bibilia

Te faaohipa ra te Atua i to ˈna puai faito ore na te ao nui. Ua poiete o ˈna e miria fetia e te parau ra te Bibilia no nia i te reira: “A fariu i to outou mata i te raˈi e a hiˈo. Na vai i poiete i teie mau mea? Na Tei aratai ra ia ratou mai te hoê nuu. E pii oia [te Atua] ia ratou pauroa i to ratou iˈoa. No to ˈna mana rahi mau e to ˈna puai faahiahia, aita hoê o ratou i moˈe.”—Isaia 40:25, 26.

Tera râ, e ere te Atua i te hoê noa puai. Te parau ra te Bibilia e nehenehe te Atua e faaite i te here e te hae. (Salamo 11:5; Ioane 3:16) E ia au i te Bibilia e nehenehe te ohipa ta te taata e rave ra e haamauiui i to te Atua aau.—Salamo 78:40, 41.