Eaha te Basileia o te Atua?
Te pahonoraa a te Bibilia
Te Basileia o te Atua, o te hoê ïa faatereraa haamauhia e te Atua ra o Iehova. Ia au i te Bibilia, e parau-atoa-hia “te Faatereraa arii a te Atua” aore ra “te Faatereraa arii o te raˈi,” no te mea te faatere ra oia mai te raˈi mai. (Mareko 1:14, 15; Mataio 4:17) E nehenehe e faaauhia i te mau faatereraa taata, mea hau aˈe râ te Faatereraa arii a te Atua i roto i te mau tuhaa atoa.
Te mau faatere. Ua maiti te Atua ia Iesu Mesia ei Arii o te Faatereraa arii e ua horoahia ia ˈna i te mana rahi aˈe i te tahi atu mau taata faatere i nia i te fenua. (Mataio 28:18) E faaohipa ra Iesu i to ˈna mana no te maitai o te taata. A ora ˈi oia i nia i te fenua, ua faaite o ˈna i te aumihi e e taata tiaturihia o ˈna. (Mataio 4:23; Mareko 1:40, 41; 6:31-34; Luka 7:11-17) I raro aˈe i te aratairaa a te Atua, ua maiti Iesu i te mau taata no te mau nunaa atoa “ia faatere mai ratou ei arii i te fenua” e o ˈna mai te raˈi mai.—Apokalupo 5:9, 10.
Te maororaa. E taui hanoa te mau faatereraa taata, area râ te Faatereraa arii a te Atua e “ore roa e haamouhia.”—Daniela 2:44.
Te huiraatira. I raro aˈe i te Faatereraa arii a te Atua, e farii te Atua i te mau taata atoa o te haapao i ta ˈna mau faaueraa. E ore hoi te Atua e maitiiti i te taata.—Ohipa 10:34, 35.
Te mau ture. Aita te mau ture aore ra faaueraa a te Faatereraa arii a te Atua e opani noa i te taata ia rave i te ohipa ino. E faaitoito-atoa-hia râ ratou ia riro ei taata maitai. Ei hiˈoraa, te na ô ra te Bibilia: “‘Ia here oe ia Iehova to oe Atua ma to oe aau atoa e ma to oe ora atoa e ma to oe manaˈo atoa.’ O te faaueraa rahi roa ˈˈe teie e te matamua. Mai tera atoa te piti, o te na ô ra: ‘Ia here oe i to oe taata tupu mai ia oe iho.’” (Mataio 22:37-39) I raro aˈe i te Faatereraa arii, na te here i te Atua e i to taata tupu e turai i te taata ia haa no te maitai o vetahi ê.
Te haapiiraa. E haamau te Faatereraa arii a te Atua i te mau ture aveia no nia i te maitai e te ino e e arataihia te taata ia haapao i te reira.—Isaia 48:17, 18.
Te fa. Ia tupu te hinaaro o te Atua. Te fafau ra te Atua e e ora te taata o te here ra ia ˈna i roto i te paradaiso i nia i te fenua e a muri noa ˈtu. (Isaia 35:1, 5, 6; Mataio 6:10; Apokalupo 21:1-4) Area râ te mau faatereraa taata, e haapao noa ratou ia ratou iho e aita ratou e imi ra i te maitai o vetahi ê.