Hoê poroi no roto mai i te Parau a te Atua: Tiaturiraa no te feia tei faarue i to ratou nohoraa!

I te mau matahiti atoa, no to ratou maitai, e mirioni taata tei faarue i to ratou nohoraa. Te farerei ra anei outou i tera huru tupuraa fifi mau? Mai te peu e e, e nehenehe te Atua e tauturu ia outou ma te horoa i te hoê tiaturiraa o te hoê oraraa maitai aˈe, ta outou e nehenehe e haapii mai i roto i te Bibilia.

“Te feia tei faarue i to ratou nohoraa e te feia tei taui i te fenua,”a te parau ïa a Christos Stylianides mero no te Hau Amui no Europa,b “eita noa ratou e hinaaro oioi i te tauturu, oia atoa râ . . . te tiaturiraa papu no a muri aˈe.” Maoti te hoê tiaturiraa e nehenehe ai te taata e tapea i te feruriraa maitai no nia i to ratou ananahi. E hinaaro atoa râ ratou i te tamahanahanaraa no te tamǎrû i to ratou aau horuhoru.

“I to ˈu faarueraa i to ˈu fenua e to ˈu fetii, ua mauiui roa vau. Ua riaria, ua peapea e ua hepohepo roa vau.”—Emmanuel no Haïti.

Tera atoa anei to outou huru aau? Mai te peu e ua faarue outou i to outou nohoraa, e hinaaro ïa outou i te tamahanahanaraa e te tiaturiraa. E nehenehe te Parau a te Atua, te Bibilia, e tauturu ia outou. E nafea ïa?

Tamahanahanaraa no roto mai i te Parau a te Atua

Te parau ra te Bibilia: “Iehovac . . . te here ra oia i te taata ê e noho ra i rotopu ia outou.”—Deuteronomi 10:17, 18.

Te parau ra te Bibilia: “Tei pihai iho Iehova i te feia e tiaoro ra ia ˈna.”—Salamo 145:18.

Te parau ra te Bibilia: “E ore roa e tia i te Atua mau ia haa ma te ino . . . Eita te Manahope e faahuru ê i te parau-tia.”—Ioba 34:10, 12.

Te auraa ïa, e ere o te Atua te tumu o to outou mau mauiui. Aita o ˈna e faautua ra ia outou, aita atoa o ˈna e tamata ra ia outou ma te haafifi i to outou oraraa.

Tiaturiraa no roto mai i te Parau a te Atua

Te faataa ra te Bibilia eaha ta te Atua e rave no tatou i mua. Te tauturu nei teie tiaturiraa i te feia tei faarue i to ratou nohoraa.

Te parau ra te Bibilia: “E tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui.”—Apokalupo 21:4.

Te auraa ïa, eita tatou e mauiui faahou. Te fafau nei te Atua e faaore o ˈna i te mau fifi atoa o te haapeapea ra ia outou i teie nei mahana.

“Fatata roa te Atua i te faaore i te parau-tia ore e te mau mea iino atoa e haaati ra ia tatou. Maoti teie tiaturiraa e tiatonu ai to ˈu feruriraa i te mahana e ore roa ˈi pauroa te mauiui.”—Karla no Salvador.

Te auraa ïa, eita tatou e haamanaˈo faahou i te mau mea tei haamauiui ia tatou. Te haapapu ra te Atua eita outou e horuhoru faahou no te mau manaˈo hepohepo e puta mai.

“Te fafau ra te Bibilia e eita tatou e haamanaˈo faahou i te mauiui e te mau mea ta tatou i ere. Te tauturu nei teie tiaturiraa ia ˈu ia faaruru i to matou mau tupuraa fifi, no te mea ua ite au e fatata roa te reira i te ore.”—Natalia no Ukraine.

Te parau ra te Bibilia: “E haamau te Atua o te raˈi i te hoê faatereraa arii o te . . . faahuˈahuˈa e e haamou . . . i tera mau faatereraa arii atoa.”—Daniela 2:44.

Te auraa ïa, na te hoê faatereraa tia roa i te raˈi e faatere i te fenua. Fatata roa te Atua i te mono pauroa te faatereraa a te taata na roto i ta ˈna noa faatereraa i nia i te raˈi. E hopoi mai teie faatereraa i te hau mau, te oraraa papu, te parau-tia e te ruperuperaa no te taata atoa.—Mika 4:3, 4.

“Ua itoitohia vau i te iteraa e fatata roa te Faatereraa arii a te Atua i te faaore i te mau fifi atoa mai te haavîraa, te au-ore-raa e te hiˈo-ino-raa i te taata ê.”—Mustafa no Hitia o te râ no ropu.

Te paari no roto mai i te Parau a te Atua

E tauturu te mau aˈoraa Bibilia î i te paari ia outou i roto i ta outou i faaruru na, i roto atoa i to outou oraraa apî, tae noa ˈtu te ereraa i ta outou mau taoˈa. Teie te tahi mau aratairaa Bibilia o te tauturu i te feia o tei faarue i to ratou nohoraa:

Te parau ra te Bibilia: “Noa ˈtu e mea rahi te taoˈa a te hoê taata, eita oia e ora i te reira.”—Luka 12:15.

E tauturu teie irava ia outou: E nehenehe outou e maemae roa no te mau mea atoa ta outou i vaiiho i muri. A haamanaˈo râ, mea faufaa aˈe to outou ora i ta outou i vaiiho atu. E tauturu teie manaˈo ia outou ia ore e hepohepo roa.

“Mea faufaa aˈe te ora i te mau taoˈa materia. I roto i te tahi mau tupuraa, eita roa teie mau faufaa aore ra te moni e tauturu ia outou.”—Natalia no Ukraine.

Te parau ra te Bibilia: “Eiaha e parau: ‘No te aha mea au aˈe te mau mahana na mua ˈˈe i teie mau mahana nei?’”—Koheleta 7:10.

E tauturu teie irava ia outou: Mea fifi paha to outou oraraa i teie nei, eiaha râ e faaau i te reira i to outou oraraa na mua ˈˈe, no te mea e nehenehe outou e inoino.

“Ia farii au i to ˈu tupuraa, e tapea ïa vau i te hoê feruriraa maitai.”—Eli no Rwanda.

Te parau ra te Bibilia: “Te vai ra ta tatou maa e te ahu, e mauruuru tatou i te reira.”—Timoteo 1, 6:8.

E tauturu teie irava ia outou: A tutava i te mauruuru noa i te mau mea e vai ra ia outou. Eita ïa outou e haapeapea rahi roa.

“Te tauturu nei te Bibilia ia ˈu eiaha ia tiatonu i ta mâua i ere. Oaoa roa vau e ta ˈu vahine, inaha mea maitai mâua.”—Ivan no Ukraine.

Te parau ra te Bibilia: “Te mau mea atoa ïa ta outou e hinaaro ia rave te taata no outou, a rave atoa ïa no ratou.”—Mataio 7:12.

E tauturu teie irava ia outou: Ia faatupu outou i te faaoromai e te maitai i nia ia vetahi ê, e au mai ïa ratou ia outou. Maoti atoa ta outou mau tutavaraa e ore roa ˈi te manaˈo oti noa o te taata.

“Mea au na te rahiraa o te taata ia faaturahia, ia hamani-maitai-hia e ia herehia ratou. E faatupu te reira i te auhoaraa piri i rotopu ia outou e ia ratou.”—Angelo no Sri Lanka.

Te parau ra te Bibilia: “A faaite i ta outou mau aniraa i te Atua. E na te hau o te Atua . . . e tiai i to outou aau e feruriraa.”—Philipi 4:6, 7.

E tauturu teie irava ia outou: A pure i te Atua no nia i to outou mau manaˈo hohonu, hinaaro, tâia e haapeapearaa. E tauturu teie mau pure ia outou ia vai hau noa, e e tamǎrû i to outou hepohepo.

“E pure au i te Atua i te mau taime e fifihia vau, e e pahono mai o ˈna ia ˈu. Maoti ta ˈu i haapii i roto i te Bibilia, ua fanaˈo vau i te hau o te feruriraa.”—Yol no Soudan apatoa.

“Ua tauturu te mau aˈoraa i roto i te Bibilia ia ˈu ia fanaˈo i te hau no te faaoromai i te mau tupuraa fifi.”—Valentina no Ukraine.

“Ua itoitohia vau i te iteraa e te fafau ra Iehova i te hoê oraraa maitai aˈe.”—Emmanuel no Haïti

E hinaaro anei outou e ite atu â no nia i te mau parau fafau Bibilia o te horoa mai i te tamahanahanaraa e te tiaturiraa, e no te aha e nehenehe outou e tiaturi i te reira? A ani i te hoê farereiraa i te mau Ite no Iehova. E oaoa roa ïa ratou.