E nehenehe iho â anei te Heiva tuaro nui e tahoê i te taata? Eaha ta te Bibilia e parau ra?

E miria taata paha o te mataitai i te Heiva tuaro nui 2024. No ǒ mai te mau maona e 206 fenua. Te na ô ra Thomas Bach, te peretiteni o te tomite Heiva tuaro nui: “Te apiti nei tatou i teie Heiva o te tahoê i te mau fenua atoa i roto i te hau. E turu anaˈe ïa i teie faanahoraa, inaha maoti teie ravea e ora hau noa ˈi tatou pauroa, noa ˈtu mea taa ê tatou te tahi i te tahi.”

E nehenehe iho â anei te Heiva tuaro nui e faatupu i te hau e e tahoê i te huitaata? E nehenehe anei tatou e tiaturi e tupu iho â te hau ati aˈe te ao nei?

Te ravea no te hau e te auhoêraa?

E ere te Heiva tuaro nui o teie matahiti i te tuaro noa. Ua ite-atoa-hia te tahi mau haafifiraa i te pae poritita e totiare e amahamaha ˈi te taata. Te parau ïa o te tiaraa o te taata, te au-ore-raa i te nunaa ê, te maitiitiraa i te taata ia au i ta ˈna haapaoraa e te aifaito-ore-raa o te oraraa.

Ua riro te Heiva tuaro nui ei faaanaanataeraa na te taata. Tera râ, e faatupu te reira i te haerea e te huru feruriraa e amahamaha ˈi te taata. Aita ˈtura ïa e hau e te auhoêraa.

Ua tohu te Bibilia mai te aha te huru o te taata i teie mahana. (Timoteo 2, 3:1-5) No te ite atu â no nia i teie parau tohu Bibilia, a taio i te tumu parau “Ua tohu anei te Bibilia i nia i te huru feruriraa e haaraa o te mau taata i teie mahana?”

Te hoê tiaturiraa papu no te hau e te auhoêraa

Te faahiti ra te Bibilia i te tiaturiraa papu e tahoê ai te huitaata i roto i te hau. Te parau atoa ra te Bibilia e tahoê te mau nunaa atoa i raro aˈe i te aratairaa a “te Faatereraa arii a te Atua.”—Luka 4:43; Mataio 6:10.

E faatupu Iesu Mesia, te Arii o teie Faatereraa arii, i te hau ati aˈe te ao nei. Te na ô ra te Bibilia:

• E rahi roa te hau.”—Salamo 72:7.

• E faaora oia ia ratou i te haavîraa e te hamani-ino-raa.”—Salamo 72:12, 14.

I teie mahana, ua tahoê te mau haapiiraa a Iesu e mirioni taata e ora ra i e 239 fenua. Ei Ite no Iehova, ua haapiihia matou ia faatupu i te hau. No te ite atu â, a taio i Te Pare Tiairaa “A haapae roa i te riri.”