Mea faufaa iho â anei te parau mau?

Te manaˈo ra anei oe e ere roa ˈtu i te mea ohie ia ite eaha te mea mau e te mea haavare? I teie mahana, e au ra e te haafaufaa aˈe ra te mau taata i to ratou mau huru aau e manaˈo, eiaha râ i te parau mau e te mau haapapuraa. Na te ao nei, e rave rahi taata o te tiaturi ra aita e parau mau.

E ere tera huru feruriraa i te mea apî. A 2 000 matahiti i teie nei, ua ani te tavana Roma Ponotio Pilato ia Iesu ma te faaooo: “Eaha te parau mau?” (Ioane 18:38) Noa ˈtu aita Pilato i imi i te hoê pahonoraa, mea faufaa ta ˈna uiraa. Te horoa mai ra te Bibilia i te hoê pahonoraa tano e e nehenehe te reira e tauturu ia oe ia ite eaha te mea mau e te mea haavare i roto i teie nei ao papu ore.

Te vai ra anei te parau mau?

E. Te faaohipa ra te Bibilia i te taˈo “parau mau” no te mau manaˈo niuhia i nia i te mau haapapuraa, oia atoa no te mau aratairaa e faaite ra eaha te mea maitai e eaha te mea ino. Te haapii ra te Bibilia e o te Atua ra o Iehovaa te tumu o te parau mau e ua piihia o ˈna “te Atua parau mau.” (Salamo 31:5) Te faaite ra te reira i te parau mau no ǒ mai i te Atua. E faaauhia te parau mau i te hoê maramarama o te aratai nei ia tatou i roto i teie nei ao arepurepu roa.—Salamo 43:3; Ioane 17:17.

Nafea oe e ite ai i te parau mau?

Aita te Atua e hinaaro ra ia farii hanoa tatou i te parau mau no ǒ mai i te Bibilia. Te faaitoito nei râ o ˈna ia tatou ia hiˈopoa maite i te Bibilia ma te faaohipa i to tatou feruriraa atoa, eiaha râ ma te pee i to tatou mau huru aau. (Roma 12:1) Te hinaaro ra te Atua ia faafatata e ia here tatou ia ˈna ma to tatou “manaˈo atoa.” Te faaitoito mai ra o ˈna ia haapapu ia tatou iho e mea mau ta tatou e haapii ra i roto i te Bibilia.—Mataio 22:37, 38; Ohipa 17:11.

Nohea mai te parau haavare?

Te parau ra te Bibilia e na te enemi o te Atua, oia hoi o Satani te Diabolo, i faahiti i te parau haavare matamua. No reira te Bibilia e pii ai ia ˈna, “te metua no te haavare.” (Ioane 8:44) Ua haavare o ˈna no nia i te Atua i na hoa faaipoipo matamua. (Genese 3:1-6, 13, 17-19; 5:5) Mai reira mai, te tamau ra Satani i te haaparare i te mau parau haavare e i te huna i te parau mau no nia i te Atua.—Apokalupo 12:9.

No te aha e mea parare roa ˈi te parau haavare i teie mahana?

Te parau ra te Bibilia e te ora nei tatou i te “mau mahana hopea.” Te ohipa ˈtu â ra Satani ia tiaturi te taata i ta ˈna mau parau haavare. Te haavare pinepine ra te taata ia vetahi ê no te punu atu. (Timoteo 2, 3:1, 13) I teie mahana, ua î atoa te rahiraa o te mau haapaoraa i te haapiiraa hape. Mai ta te Bibilia i tohu no to tatou nei tau, te “imi [ra te taata] i te tahi mau orometua na ratou no te faanavenave i to ratou tariˈa” e “e fariu ê ratou i to ratou tariˈa i te parau mau.”—Timoteo 2, 4:3, 4.

No te aha e mea faufaa roa ˈi te parau mau?

Maoti te parau mau, e nehenehe te taata e tiaturi te tahi i te tahi. Aita anaˈe e tiaturi i rotopu i te taata, aita atoa ïa e auhoaraa piri e e nehenehe te reira e haafifi i te hoê nunaa taatoa. Te parau ra te Bibilia e te hinaaro ra te Atua ia niuhia ta tatou haamoriraa i nia i te parau mau, a na ô ai: “Te feia e haamori i [te Atua], ia haamori ïa ma te varua e te parau mau.” (Ioane 4:24) E nehenehe te parau mau no ǒ mai i te Bibilia e tauturu ia oe ia ite eaha te mau haapiiraa hape a te mau haapaoraa e ia faatiamâ ia oe i te reira. E nafea ïa? No te ite i te pahonoraa, a taio i te anairaa tumu parau “Parau haavare no nia i te Atua.”

No te aha te Atua e hinaaro ai ia ite au i te parau mau?

Te hinaaro ra te Atua ia ora oe. No te na reira, e titauhia ia oe ia haapii i te parau mau no nia ia ˈna. (Timoteo 1, 2:4) Ia haapii e ia pee oe i ta te Atua mau ture aveia no nia i te mea maitai e te mea ino, e riro oe ei hoa piri no ˈna. (Salamo 15:1, 2) No te tauturu i te taata ia haapii i te parau mau, ua tono te Atua ia Iesu i nia i te fenua. Te hinaaro ra te Atua ia pee tatou i te mau haapiiraa a Iesu.—Mataio 17:5; Ioane 18:37.

E faaore roa anei te Atua i te parau haavare?

E. Mea au ore roa na te Atua ia punu e ia haavare te taata ia vetahi ê. Ua fafau o ˈna e haamou o ˈna i te feia o te faaoti i te haavare ia vetahi ê. (Salamo 5:6) I te taime e na reira ˈi te Atua, e faatupu atoa o ˈna i teie parau fafau: “E vai noa te vaha o te parau i te parau mau e a muri noa ˈtu.”—Maseli 12:19.