Ia roo-taue-hia oe i te maˈi

Mai te peu e e, ua taa paha ia oe e nehenehe oe e rohirohi roa. Hau atu â, e titauhia paha te moni rahi no te rapaau ia oe. Eaha ïa te tauturu atu? Aore ra, e nafea oe ia tauturu i te hoê mero utuafare aore ra te hoê hoa o te roohia i te maˈi? Aita te Bibilia e horoa ra i te ravea rapaauraa, e itehia ra te aoˈraa paari i roto no te tauturu ia oe ia faaoromai noa ˈtu te maˈi.

Aˈoraa o te tauturu ia faaoromai noa ˈtu te maˈi

• A imi i te ravea rapaauraa

  Ta te Bibilia e parau ra: “E ere te taote no te feia oraora maitai, no te feia maˈi râ.”—Mataio 9:12.

  Eaha te auraa? Ia titauhia, a ani te tauturu a te mau taote.

  A tamata: A imi te ravea rapaauraa e tano no oe. I te tahi taime mea maitai atoa ia ani te manaˈo o te tahi atu taote. (Maseli 14:15) A paraparau maitai i te mau taote e tuati maˈi. Ia papu maitai ia oe i ta ratou i parau mai e ua taa maitai anei ia ratou te mau mea atoa ta oe i faataa ˈtu no nia i to oe maˈi. (Maseli 15:22) A imi i te mau haamaramaramaraa no nia i to oe maˈi e eaha te mau ravea rapaauraa e vai ra. Mea ohie aˈe ïa no oe ia faaoromai i to oe maˈi e ia rave i te faaotiraa maitai.

• A rave i te mea maitai no to oe tino

  Ta te Bibilia e parau ra: “Mea au aˈe hoê apu rima î i te faafaaearaa i e piti apu rima î i te ohipa rohirohi.”—Koheleta 4:6.

  Eaha te auraa? Ei hiˈoraa, e maitaihia oe ia faaherehere oe i te taime no te faafaaea.

  A tamata: A tamau i te faaetaeta i to oe tino e i te amu i te maa maitatai e ia taoto maitai. Noa ˈtu e titauhia ia rave i te tahi mau tauiraa, e hoona to oe taime e ta oe mau tutavaraa. Tera râ, a haapao maitai eiaha te reira ia haafifi atu â i to oe tupuraa e te rapaauraa ta te mau taote e horoa ˈtu.

• A imi i te tauturu a vetahi ê

  Ta te Bibilia e parau ra: “E faaite te hoê hoa mau i te here i te mau taime atoa e e taeae oia tei fanauhia no te taime ahoaho.”—Maseli 17:17.

  Eaha te auraa? E nehenehe to oe mau hoa e tauturu ia oe i roto i te taime fifi.

  A tamata: A faaite i to oe huru aau i te hoê hoa papu mau. Ia na reira oe e maitaihia oe i te pae aau e i te pae feruriraa. E hinaaro iho â te hoa e fetii e tauturu atu, aita râ ratou e ite eaha te rave. A faataa maitai ïa eaha ta oe e hinaaro mau ra. Na oe e faaoti te mahana, te taime e te hora e nehenehe ratou e haere mai ai e farerei ia oe, ia ore te reira e faarohirohi roa ia oe. Ia mauruuru noa râ oe no te tauturu horoahia mai.

• A tapea i te hoê feruriraa maitai

  Ta te Bibilia e parau ra: “E raau rapaau maitai te aau oaoa, e ere roa râ te taata i to ˈna puai i te aau hepohepo.”—Maseli 17:22.

  Eaha te auraa? E tauturu te hoê feruriraa maitai ia ore oe e haapeapea rahi roa e ia vai hau noa ia maˈihia oe.

  A tamata: I roto i to oe tupuraa apî, a rave tei maraa ia oe. Eiaha e faaau ia oe ia vetahi ê e eiaha atoa e faahapa ia oe no te mea aita oe e nehenehe faahou e rave mai te matamua ra. (Galatia 6:4) A haamau te tahi fa tano noa no oe, e tauturu te reira ia oe ia faatupu i te hoê feruriraa maitai. (Maseli 24:10) Mai te peu e nehenehe, a tauturu ia vetahi ê. E hopoi mai te reira i te oaoa mau.—Ohipa 20:35.

E tauturu te Atua ia oe ia faaoromai

Te faaite ra te Bibilia e tauturu te Atua ra o Iehovaa i te taata ia faaoromai. Eiaha râ e manaˈo e faatupu Iehova i te semeio, tera râ e tauturu o ˈna i te feia e haamori ra ia ˈna na roto i te mau ravea i muri nei:

Te hau. E horoa Iehova te “hau o te Atua, tei hau ê i te mau manaˈo atoa.” (Philipi 4:6, 7) E tauturu te reira i te hoê taata ia ore ia haapeapea rahi roa. E fanaˈo te mau taata i te hau no ô mai i te Atua ra, ia pure ratou ia ˈna e ia faaite i ta ratou mau haapeapearaa.—Petero 1, 5:7.

Te paari. E horoa Iehova i te paari no te rave i te mau faaotiraa maitai. (Iakobo 1:5) E noaa i te taata i teie huru paari a haapii ai e a faaohipa ˈi oia i te mau aˈoraa itehia i roto i te Bibilia.

Te hoê tiaturiraa no a muri aˈe. Te fafau mai ra Iehova e ia tae i te hoê mahana “aita e taata e parau: ‘E maˈi to ˈu.’” (Isaia 33:24) E tauturu teie tiaturiraa ia faatupu i te hoê huru feruriraa maitai noa ˈtu te mau maˈi ino.—Ieremia 29:11, 12.