Ua pahonohia te mau pure a te hoê vahine matapo

Ua tauturu Yanmei, te hoê vahine Ite no Iehova i Asia, i te hoê vahine matapo o Mingjie te iˈoa ia haere i te tahi atu pae o te purumu.a Ua parau Mingjie ia ˈna: “Mauruuru. Ia haamaitaihia oe e te Atua!” I muri iho, ua ani Yanmei ia Mingjie ia nehenehe anei o ˈna e hoˈi e farerei ia ˈna no te tauaparau no nia i te Bibilia. Ua pure noa Mingjie i te mau mahana atoa ia arataihia o ˈna e te Atua i roto i ta ˈna amuiraa. No te aha hoi o ˈna i pure ai no te reira?

Ua faataa Mingjie e i 2008, ua titau-manihini-hia o ˈna e te hoê hoa matapo no te haere i te fare pure no te mau huma. I muri iho i to ˈna faarooraa i te oreroraa parau a te perepitero, ua ani atu eaha te buka ta ˈna i taio. Ua pahono oia e o te Bibilia, te Parau a te Atua. Ua hinaaro rahi Mingjie e taio i te reira. Ua noaa ïa ia ˈna i te Bibilia papairaa Tinito na te matapo e ua taio oia o na 32 buka i roto e ono avaˈe. I to Mingjie tamauraa i te taio i te Bibilia, ua papu ia ˈna e ua hape te haapiiraa o te Toru tahi tei haapiihia i roto i taua fare pure ra e e iˈoa to te Atua, o Iehova.

Haamata ˈtura Mingjie i te huru ê a ite ai i te haerea o te mau mero o taua fare pure ra. Ua taa ia ˈna aita ratou e ora ra ia au i ta ˈna e taio ra i roto i te Bibilia. Ei hiˈoraa, ua horoa ratou i te maa maitai na te feia e ite ra e te maa tahito na te feia matapo. Ua mauiui roa Mingjie i teie tupuraa tano ore e ua haamata oia i te imi i te tahi atu mau fare pure i pihai iho i to ˈna nohoraa. Tera ïa te tumu i pure ai Mingjie no te ite teihea roa te amuiraa Kerisetiano mau.

Ua putapû Mingjie i te hamani maitai o Yanmei e ua farii oia i te haapii i te Bibilia e o ˈna. I muri iho, ua haere Mingjie i ta ˈna putuputuraa matamua a te mau Ite no Iehova. Te faatia ra o ˈna: “Eita e moe ia ˈu i te putuputuraa matamua ta ˈu i haere. Ua farii popou maitai te mau taeae e tuahine ia ˈu. Ua putapû roa vau. Noa ˈtu e taata matapo vau, ua taa ia ˈu ua here ratou i te mau taata atoa.”

Ua haere Mingjie i mua i te pae varua e ua haamata o ˈna i te apiti tamau i te putuputuraa. Ua au roa o ˈna ia himene i te Piha a te Basileia, e ere râ i te mea ohie no ˈna no te mea aita ta ˈna e buka himene na roto i te papairaa na te matapo. No reira ïa maoti te tauturu a te amuiraa, ua hamani Mingjie i ta ˈna iho buka himene. Ua titauhia ia ˈna e 22 hora no te papai i na 151 himene! I Eperera 2018, ua haamata Mingjie i te poro e i muri iho ua poro o ˈna 30 hora i te mau avaˈe atoa.

No te faaineine ia Mingjie no te bapetizoraa, ua haruharu Yanmei i te mau uiraa e te mau irava Bibilia no roto mai i te buka Faanahohia no te rave i te hinaaro o Iehova (Farani). I Tiurai 2018, ua bapetizohia Mingjie. Te parau ra o ˈna: “Ua putapû vau i te here faaitehia e te mau taeae e tuahine i tera tairururaa. No to ˈu oaoa, ua taˈi roa vau no te mea ua riro vau ei mero o te amuiraa mau a te Atua.” (Ioane 13:34, 35) No to ˈna mauruuru i te here ta ˈna i fanaˈo e no te faaite atoa ia vetahi ê i taua here ra, ua riro Mingjie ei pionie tamau.