Ua ite anei oe?

No te aha Iesu i faahapa ˈi i te faahitiraa i te parau tǎpǔ?

I FAATIA na te ture a Mose ia tǎpǔ te taata ma te parau i te tahi mea mai teie “Te horeo nei au i mua i te Atua,” aore ra “Te horeo nei au i te iˈoa o Iehova.” I to Iesu râ tau, ua rahi roa te tǎpǔraa. I tǎpǔ na te ati Iuda fatata no te mau mea atoa ta ratou e parau. E na reira ratou ia tiaturihia ˈtu â ta ratou e parau. Ua faahapa râ Iesu i teie peu faufaa ore e piti taime. Ua haapii oia: “Ia riro . . . ta outou ‘E’ ei e, ta outou ‘Eita’ ei eita.”—Mat. 5:33-37; 23:16-22.

Ia au i te hoê buka (Theological Dictionary of the New Testament), te tauturu mai ra te Talmud ia ite e mea pinepine te ati Iuda i te tǎpǔ, aore ra i te horeo e mea mau ta ratou parau, inaha te faataa maitai ra te Talmud eaha te mau tǎpǔ e tia ia tapea e te mau tǎpǔ e nehenehe e ofati.

E ere o Iesu anaˈe tei faahapa i teie huru raveraa tano ore. Ei hiˈoraa, ua papai Flavius Josèphe, taata tuatapapa ati Iuda, no nia i te hoê pǔpǔ iti faaroo ati Iuda o tei ape roa i te peu horeo. I tiaturi na te mau mero o tera pǔpǔ e mea ino aˈe te tǎpǔraa i te haavare. No ratou, ia tǎpǔ te hoê taata ia tiaturihia mai oia, e taata haavare ïa oia. Teie ta te buka ati Iuda ra piihia Siracide, aore ra l’Ecclésiastique, (23:11) e parau ra: “E taata ofati ture te taata o te horeo noa.” Ua faahapa Iesu i te tǎpǔraa no nia i te mau mea faufaa ore. Mai te peu e faaite noa tatou i te parau mau, eita ïa e titauhia ia horeo tatou ia tiaturihia ˈtu â ta tatou mau parau.