A faaite i te mauruuru no to Iehova aau horoa noa

E ATUA aau horoa noa o Iehova. (Iak. 1:17) E nehenehe tatou e ite i to ˈna aau horoa noa na roto i te mau mea ta ˈna i poiete. Ua faaî oia i te ao nui i te mau fetia e ua tapoi oia i te fenua i te mau raau hotu nehenehe mau.—Sal. 65:12, 13; 147:7, 8; 148:3, 4.

Ua mauruuru roa te taata papai o te Salamo 104 no te mau mea atoa ta Iehova i poiete, no reira oia i papai ai i te hoê himene no nia ia ˈNa. A taio ai oe i teie salamo, te mauruuru atoa anei oe mai te fatu salamo? Ua parau oia: “Te ora nei au ra, e himene â vau ia Iehova; te vai nei au ra, e himene au ei haamaitai i tau Atua.” (Sal. 104:33) E hinaaro anei oe e na reira atoa?

TE HIˈORAA RAHI ROA ˈˈE O TE AAU HOROA NOA

Te hinaaro ra Iehova ia pee tatou i to ˈna hiˈoraa o to ˈna aau horoa noa. E te horoa nei oia i te mau tumu maitai e faaite ai tatou i te aau horoa noa. Ua faaurua oia i te aposetolo Paulo no te papai: “E aˈo atu i te feia taoˈa rahi i teie nei ao, eiaha ei aau teitei, eiaha hoi e tiaturi i te taoˈa rahi itea ore, ei te Atua ora râ o tei horoa hua mai i te mau mea atoa nei ei raveraa na tatou; ia hamani maitai, e te taoˈa ra i te ohipa maitatai ra, ia rahi atu ïa ia ratou, ia horoa haere, ia au i te aufau. I te haapue-maite-raa i te maitai tumu no ratou iho a muri atu, ia rave ratou i te ora mure ore.”—Tim. 1, 6:17-19.

I roto i te piti o ta ˈna rata i to Korinetia, ua faataa Paulo eaha te huru ia horoa anaˈe tatou na te tahi atu taata. Ua parau oia: “E horoa te taata atoa i ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” (Kor. 2, 9:7) O vai ta tatou e tauturu ia faaite tatou i te aau horoa noa? Ua parau Paulo e e tauturu tatou ia vetahi ê ma te horoa i ta ratou e hinaaro mau ra, e tauturu atoa râ tatou ia tatou iho no te mea e haamaitai mai Iehova.—Kor. 2, 9:11-14.

Ua faataa faahou Paulo i te haapapuraa rahi o te aau horoa noa o te Atua a parau ai oia e ‘ia haamaitaihia te Atua i te ô horoa noa eita e tia ia parau.’ (Kor. 2, 9:15) Ua taaihia te ô horoa noa a Iehova i te mau ohipa maitatai o ta ˈna i horoa mai maoti Iesu Mesia. Aita e parau e nehenehe e faataa ˈtu no nia i te faufaaraa o teie ô.

E nafea tatou e faaite ai i te mauruuru no te mau mea atoa ta Iehova e Iesu i rave no tatou? Ma te faaite atoa ïa i te aau horoa noa ma te horoa i to tatou taime, i to tatou puai e ta tatou mau taoˈa no te haamori ia Iehova e ma te tauturu ia vetahi ê ia ite o vai o ˈNa. E nehenehe ta tatou e na reira, mai te peu e mea rahi anei aore ra mea iti anei.—Par. 1, 22:14; 29:3-5; Luka 21:1-4.

Ô no te turu i te ohipa haapiiraa

Mea rahi te faataa nei i te tahi tino moni no te tuu i roto i te afata ô faanahohia no te turu i te ohipa haapiiraa.

E nehenehe atoa e horoa tia ˈtu i te tahi parau moni i te Association Les Témoins de Jéhovah e te hoê rata poto o te faaite e e ô te reira.

PARAU FAAAU NO TE HOROA TARAHU I TE MONI

E nehenehe e horoa tarahu i te moni aita e apî i nia iho na te hoê taatiraa o te ore e imi ra i te moni.

RAVEA Ê NO TE TURU I TE HAAMORIRAA

Te vai ra ˈtu â te ravea no te turu i te ohipa a te Basileia.

Parau faaau parururaa i te ora: E nehenehe e faataa e na te hoê taatiraa o te ore e imi ra i te moni e fanaˈo i te moni o te parau parururaa. I Porinetia Farani e i Taratoni, e nehenehe e na reira no te Association Les Témoins de Jéhovah.

Faanaho ia tatarahia te tahi tino moni i roto i te vairaa moni: E nehenehe te taata o te horoa i te tahi ô e faanaho ia tatarahia te tahi tino moni nainai i roto i ta ˈna vairaa moni no te horoa na te hoê taatiraa faaroo.

Ô: I te tahi mau fenua, e nehenehe e haere i mua i te hoê notera no te horoa ei ô na te hoê taatiraa faatiahia e te ture te hoê tâpû fenua, te hoê fare aore ra te hoê tino moni. Tera ïa te nehenehe e rave i Farani, i te mau tuhaa fenua i raro aˈe i te faatereraa Farani, i Porinetia Farani e i Taratoni. A taniuniu i te amaa hou a horoa ˈi ei ô te tahi tâpû fenua aore ra fare.

Parau tutuu: E nehenehe e faaite i nia i te hoê parau tutuu o te hiˈopoa-tamau-hia e na te hoê taatiraa o te ore e imi ra i te moni e fanaˈo i te tahi tuhaa aore ra te taatoaraa o te faufaa.

E nehenehe e horoa i te ô i te Association Les Témoins de Jéhovah aore ra e tuu i teie taatiraa i nia i te parau tutuu. Hou a papai ai i te hoê parau tutuu, e mea tia ia hiˈo maitai te taata tutuu i te tuhaa o ta ˈna mau faufaa ta ˈna e nehenehe e faaohipa mai ta ˈna e hinaaro. Mea titauhia ia afai te taata i ta ˈna parau tutuu i te hoê notera, na ˈna anaˈe iho â râ i papai i te reira.

Ia feruri te taata horoa i te mau ravea rau e turu ai oia i te ohipa a te Basileia. I te mea e mea taa ê te huru tupuraa, e titauhia paha ia ani i te mau haamaramaramaraa i te hoê notera aore ra te hoê taata aˈo aravihi. E nehenehe atoa e papai aore ra e taniuniu i te amaa i te 40 54 70 00 (Porinetia Farani) aore ra i te 43 75 00 (Taratoni). E nehenehe te mau piha o te amaa e horoa i te mau haamaramaramaraa faufaa no nia i te tutuu e te mau ô.