Ta tatou e haapii mai i te mau parau hopea a Iakoba (Tuhaa 1)

1-2. Eaha ta Iakoba i rave hou o ˈna a pohe ai, e no te aha? (A hiˈo atoa i te hohoˈa .)

UA PAARI roa Iakoba i to ˈna haereraa e to ˈna utuafare, mai Kanaana tae roa ˈtu i Aiphiti. (Gen. 47:28) Tera râ, ua vai taiva ore o ˈna ia Iehova i reira 17 matahiti te maoro. I tera roaraa matahiti, ua oaoa roa o ˈna i te farerei-faahou-raa i ta ˈna tamaiti here ra o Iosepha e te iteraa ua tahoê to ˈna utuafare. Tera râ, ua ite Iakoba fatata o ˈna i te pohe. No reira, ua amui o ˈna pauroa ta ˈna mau tamaiti no te mea e ohipa faufaa ta ˈna i hinaaro e parau ia ratou.—Gen. 49:28.

² E peu matauhia i tera ra tau, ia amui te upoo utuafare i te taatoaraa o to ˈna utuafare no te faaite ia ratou to ˈna mau hinaaro e no te horoa i te aratairaa hou o ˈna a pohe ai. (Isa. 38:1) I tera atoa taime o ˈna e faaite ai o vai te mono ia ˈna ei upoo o te utuafare.

3. Eaha ta tatou e haapii mai i te Genese 49:1, 2?

³ A taio i te Genese 49:1, 2. Mea taa ê mau â te amuiraa mai te utuafare o Iakoba no te mea ua faahiti o ˈna eaha te tupu no ratou a muri aˈe. I te roaraa o teie aparauraa, ua aratai Iehova ia Iakoba ia faaite i ta ˈna mau tamaiti eaha te tupu no ratou e to ratou huaai. No reira, e pii-atoa-hia te mau parau hopea a Iakoba, te parau tohu a Iakoba.

4. Eaha ta Iakoba i tohu, e eaha te haapiiraa ta tatou e huti mai? (A hiˈo atoa i te tumu parau tarenihia “Te utuafare o Iakoba.”)

⁴ I roto i teie tumu parau, e hiˈopoa mai tatou i ta Iakoba i parau i ta ˈna na tamaiti e maha, o Reubena, Simeo⁠na, Levi e Iuda. I to muri nei tumu parau, e ite mai tatou eaha ta ˈna i parau i te toea o ta ˈna mau tamaiti. Mai ta tatou e ite mai, e ere noa teie mau parau a Iakoba no ta ˈna mau tamaiti, no to ratou atoa râ huaai o te riro ei nunaa o Iseraela. E ite mai tatou te tahi o te mau tupuraa no nia i teie nunaa o te faaite ra e ua tupu mau â te parau tohu a Iakoba. E huti atoa mai tatou i te tahi mau haapiiraa o te tauturu ia tatou ia faaoaoa ia Iehova, to tatou Metua i te raˈi.

REUBENA

5. Eaha te mau haamaitairaa ta Reubena i manaˈo e fanaˈo?

⁵ Ua paraparau na mua Iakoba ia Reubena. Ua parau hoi o ˈna: “Reubena, o oe ta ˈu matahiapo.” (Gen. 49:3) Ei matahiapo, ua manaˈo paha Reubena e fanaˈo o ˈna e piti tuhaa o te mau faufaa a to ˈna metua tane. Ua manaˈo atoa paha o ˈna e na ˈna e mono ia Iakoba ei upoo utuafare a fanaˈo atu ai to ˈna huaai i teie haamaitairaa.

6. No te aha Reubena i ere ai i to ˈna tiaraa matahiapo? (Genese 49:3, 4)

⁶ Tera râ, ua ere Reubena i to ˈna tiaraa matahiapo. (Par. 1, 5:1) No te aha? No te mea tau matahiti na mua ˈtu, ua taoto o ˈna ia Bila, hoê o te vahine faaipoipo tavini a Iakoba. I tavini na Bila ia Rahela, te vahine herehia e Iakoba. (Gen. 35:19, 22) O Reubena râ, e tamaiti o ˈna na Lea, te tahi atu vahine faaipoipo a Iakoba. Peneiaˈe ua mafera Reubena ia Bila no to ˈna noa hinaaro e taoto i te hoê vahine. Aore ra ia au ore to ˈna papa i teie vahine tavini a here roa ˈtu ai i to ˈna mama ra o Lea. Noa ˈtu eaha te tumu, ua au ore roa Iehova e Iakoba i ta Reubena i rave.—A taio i te Genese 49:3, 4.

7. Eaha tei tupu no Reubena e to ˈna huaai? (A hiˈo atoa i te tumu parau tarenihia “Te mau parau hopea a Iakoba.”)

⁷ Ua parau Iakoba ia Reubena: “Eiaha oe ia hau ê.” Ua tupu mau â teie parau. I roto i te Bibilia, aita i faahitihia e ua riro mai hoê o to Reubena huaai ei arii, tahuˈa aore ra peropheta. Tera râ, ua horoa Iakoba i te tahi tuhaa o ta ˈna mau faufaa ia Reubena, e ua riro mai to ˈna huaai ei opu o te nunaa Iseraela. (Ios. 12:6) I roto i te tahi mau tupuraa, ua faaite Reubena i te mau huru maitatai e e au ra aita faahou o ˈna i rave i te peu taotoraa tia ore.—Gen. 37:20-22; 42:37.

8. Eaha ta tatou i haapii mai i te aamu o Reubena?

⁸ Eaha te haapiiraa no tatou? Mea faufaa ia haavî tatou i to tatou mau hinaaro tia ore e ia haapae roa i te peu taotoraa tia ore. Ia tamatahia tatou ia rave i te hara, e feruri anaˈe e haamauiui te reira ia Iehova, i to tatou utuafare e ia vetahi ê. E haamanaˈo atoa i teie parau: “Ta te taata hoi e ueue ra, o ta ˈna atoa ïa e ooti.” (Gal. 6:7) I te tahi atu pae, ia feruri tatou i tei tupu no Reubena, e haamanaˈo tatou e Atua aroha hamani maitai Iehova. No reira, noa ˈtu eita o ˈna e paruru ia tatou i te mau faahopearaa ino o ta tatou mau hara, e haamaitai mai o ˈna ia tutava tatou i te rave i te mea maitai.

SIMEONA RAUA LEVI

9. No te aha Iakoba i mauruuru ore ai ia Simeona raua Levi? (Genese 49:5-7)

⁹ A taio i te Genese 49:5-7. I muri iho, ua paraparau Iakoba ia Simeona raua Levi. Ua faaite roa ˈtu o ˈna i to ˈna mauruuru ore ia raua. Tau matahiti na mua ˈtu, ua maferahia Dina na te hoê taata no Kanaana, o Sekema te iˈoa. Ua riri roa te mau tamaiti atoa a Iakoba, no tei ravehia i nia i to ratou tuahine. Aita râ Simeona raua Levi i haavî i tena riri rahi. Ua haavare raua ia Sekema e no te faatupu i te hau i rotopu ia ratou e titauhia ia peritomehia o ˈna e te mau tane atoa o te oire. Farii ihora to reira mau tane. I te toru râ o te mahana, a mauiui noa ˈi ratou ua rave Simeona raua Levi “i ta raua iho ˈoˈe e tomo aˈera [raua] i roto i te oire ma te ore hoê i ite noa ˈˈe i ta raua opuaraa, e haapohe atura pauroa te tane.”—Gen. 34:25-29.

10. Mea nafea te parau a Iakoba no Simeona raua Levi i te tupuraa? (A hiˈo atoa i te tumu parau tarenihia “Te mau parau hopea a Iakoba.”)

¹⁰ Ua riri roa Iakoba i ta ˈna na tamaiti no to raua haapoheraa tera rahiraa taata. No reira, ua tohu o ˈna e haapurarahia raua i Iseraela. Ua tupu te reira 200 matahiti i muri aˈe, i to te mau Iseraela tomoraa i te Fenua tǎpǔhia. Ua fanaˈo te opu o Simeona i te tahi mau fenua i roto i te tuhaa fenua o te opu o Iuda. (Ios. 19:1) E no te opu o Levi, ua horoahia na ratou 48 oire na Iseraela taatoa.—Ios. 21:41.

11. Eaha te mau ohipa maitatai ta te ati Levi e te ati Simeona i rave?

¹¹ Aita te huaai o Simeona raua Levi i pee i to raua hiˈoraa. Inaha, ua paturu noa te ati Levi i te haamoriraa viivii ore. I to Mose fanaˈoraa i te Ture a Iehova i te mouˈa Sinai, e rave rahi Iseraela tei haamori i te tii fanauˈa puaatoro. Ua turu noa râ te ati Levi ia Mose e ua tauturu ratou ia ˈna ia haapohe i te mau orure hau. (Exo. 32:26-29) Ua faaoti ïa Iehova e horoa na te ati Levi te haamaitairaa, oia hoi o ratou te riro mai ei tahuˈa no te nunaa. (Exo. 40:12-15; Num. 3:11, 12) I muri aˈe, ua tauturu te ati Simeona i te ati Iuda ia aro i te ati Kanaana no to ratou tuhaa fenua i te Fenua tǎpǔhia ia au i te opuaraa a Iehova.—Tav. 1:3, 17.

12. Eaha ta tatou i haapii mai i te aamu o Simeona raua Levi?

¹² Eaha te haapiiraa no tatou? Mea faufaa ia haavî tatou i to tatou riri. Mai te peu ua haamauiuihia oe aore ra te hoê o to oe fetii, e riri iho â oe. (Sal. 4:4) Tera râ, a haamanaˈo eita Iehova e mauruuru i ta oe mau parau aore ra ohipa mai te peu na te inoino i turai ia oe ia na reira. (Iak. 1:20) Te auraa, noa ˈtu e hoa Kerisetiano tei haamauiui mai aore ra hoê taata o teie nei ao, ia itoito oe i te pee noa i te mau aratairaa Bibilia. Ia na reira oe, eita ïa oe e haamauiui ia vetahi ê e ia oe iho. (Roma 12:17, 19; Pet. 1, 3:9) Hau atu, noa ˈtu aita to oe na metua e rave ra i ta Iehova e au, tei ia oe noa te faaotiraa e faaoaoa ia Iehova ma te rave i te mea maitai. Eiaha roa ˈtu oe ia manaˈo e mea faufaa ore oe, aore ra eita Iehova e haamaitai ia oe. E tauturu noa hoi Iehova ia tutava oe i te rave i te mea tia a fanaˈo atu ai i ta ˈna haamaitairaa.

IUDA

13. Ia ˈna i faaroo i ta to ˈna papa i parau i to ˈna mau tuaana, no te aha Iuda i haapeapea ˈi?

¹³ I teie nei, ua paraparau Iakoba ia Iuda. Ia ˈna i faaroo i ta to ˈna papa i parau i to ˈna mau tuaana, ua haapeapea atoa paha o ˈna. Inaha, ua rave atoa o ˈna i te tahi mau ohipa tano ore. Ua tomo hoi o ˈna i te oire o Sekema no te rave pauroa ta ratou mau faufaa. (Gen. 34:27) Ua apiti o ˈna i to ˈna mau taeae no te hoo ia Iosepha ei tîtî e ua haavare atu ia Iakoba ma te parau ua pohe Iosepha. (Gen. 37:31-33) I muri aˈe, i te poheraa ta ˈna tamaiti, ua taoto Iuda i to ˈna hunoa o Tamara. Ua manaˈo hoi o ˈna e vahine taiata teie.—Gen. 38:15-18.

14. Eaha te mau ohipa maitatai ta Iuda i rave? (Genese 49:8, 9)

¹⁴ Tera râ, i raro aˈe i te aratairaa a Iehova, ua haapopou Iakoba ia Iuda e ua parau atu e fanaˈo o ˈna e to ˈna huaai i te tahi mau haamaitairaa. (A taio i te Genese 49:8, 9.) I haapeapea noa na Iuda no to ˈna papa tei paari roa. E ua faaite o ˈna i te aumihi i to ratou hopea ra o Beniamina.—Gen. 44:18, 30-34.

15. Mea nafea Iuda i te haamaitairaahia?

¹⁵ Ua parau Iakoba na Iuda e aratai i to ˈna mau taeae. Ua titauhia râ e rave rahi matahiti hou a tupu ai teie parau tohu. E 200 matahiti i muri aˈe, ua riro mai te opu o Iuda ei aratai no te nunaa. I to te mau Iseraela faarueraa i Aiphiti e haereraa na roto i te medebara e tae roa ˈtu i te Fenua tǎpǔhia, na te opu o Iuda e faareva na mua e e na muri mai te toea o te nunaa. (Num. 10:14) Tau matahiti i muri aˈe, na te opu o Iuda i aro i te ati Kanaana no te haru i te Fenua tǎpǔhia. (Tav. 1:1, 2) E o Davida, te arii matamua no roto mai i te opu o Iuda tei faatere i te nunaa Iseraela. E ere râ tera anaˈe te haamaitairaa.

16. Mea nafea te Genese 49:10 i te tupuraa? (A hiˈo atoa i te tumu parau tarenihia “Te mau parau hopea a Iakoba.”)

¹⁶ Ua faaite Iakoba e no roto mai te opu o Iuda te Faatere i te huitaata, e e faatere mai o ˈna e a muri noa ˈtu. (A taio i te Genese 49:10 e te nota.) O Iesu Mesia teie Faatere, ta Iakoba atoa ïa e pii Silo. No nia ia Iesu ua parau te hoê melahi: “E horoa te Atua ra o Iehova i te terono o Davida to ˈna metua no ˈna.” (Luka 1:32, 33) E pii-atoa-hia Iesu “te Liona o te opu o Iuda.”—Apo. 5:5.

17. E nafea tatou ia pee i ta Iehova huru hiˈoraa ia vetahi ê?

¹⁷ Eaha te haapiiraa no tatou? Ua haamaitai Iehova ia Iuda noa ˈtu ua rave o ˈna i te tahi mau ohipa tano ore. Ua uiui paha to ˈna mau taeae no te aha Iehova i na reira ˈi? Noa ˈtu aita tatou i ite eaha ta ratou i manaˈo, ua ite râ tatou e ua hiˈo Iehova i te maitai i roto ia Iuda a haamaitai atu ai ia ˈna. E nafea tatou ia pee i to ˈna hiˈoraa? Ia fanaˈo te hoê hoa Kerisetiano i te tahi haamaitairaa aore ra hopoia, e hiˈo paha tatou na mua i to ˈna mau paruparu. Mea faufaa râ ia haamanaˈo e mea here na Iehova i teie hoa Kerisetiano no to ˈna mau huru maitatai. Oia mau, e imi Iehova i te maitai i roto i ta ˈna mau tavini. Ia na reira atoa ïa tatou.

18. No te aha e mea faufaa ia faaoromai tatou?

¹⁸ Eaha te tahi atu haapiiraa ta tatou i huti mai i te aamu o Iuda? Te faufaaraa ïa ia faaoromai. E rave iho â Iehova mai ta ˈna i fafau, eiaha râ i te taime ta tatou i manaˈo na aore ra mai ta tatou i hinaaro. Aita te huaai o Iuda i riro oioi mai ei aratai no te nunaa o te Atua. Noa ˈtu râ, ua turu maite ratou i te feia ta Iehova i maiti, mai ia Mose te ati Levi, Iosua te ati Epheraima, aore ra te arii Saula te ati Beniamina. Mai ia ratou, e turu anaˈe i te mau taeae ta Iehova i maiti no te aratai ia tatou i teie mahana.—Heb. 6:12.

19. Eaha ta tatou i haapii mai i te mau parau hopea a Iakoba?

¹⁹ Eaha ta tatou i haapii mai i te mau parau hopea a Iakoba? Mea papu “e ere . . . te hiˈoraa a te taata mai te hiˈoraa a te Atua.” (Sam. 1, 16:7) Mea faaoromai Iehova e ua ineine noa o ˈna i te faaore i ta tatou mau hara. E ere te auraa e farii o ˈna i te haerea ino, tera râ eita o ˈna e titau ia haa ta ˈna mau tavini ma te tia roa. E nehenehe ta ˈna e haamaitai i te feia tei hara na mua ˈˈe mai te peu e tatarahapa mau â ratou a rave atu ai i te mea maitai. I to muri nei tumu parau, e ite mai tatou eaha ta Iakoba i parau i te toea o ta ˈna mau tamaiti.