Na Iehova e tamahanahana ia oe

1. A faataa na i te tupuraa o te ati Iuda tei hopoi-ê-hia i Babulonia.

A FERURI na i te huru aau o te ati Iuda tei hopoi-ê-hia i Babulonia. No to ratou faaroo-ore-raa ia Iehova ehia rahiraa matahiti, vaiiho atura Iehova ia haamouhia Ierusalema e ia hopoi-ê-hia ratou i Babulonia. (Par. 2, 36:15, 16, 20, 21) Parau mau, ua nehenehe ratou e hamani i to ratou fare, e faaapu e e faaipoipo. (Ier. 29:4-7) Noa ˈtu râ, e ere mea ohie e aita roa ˈtu ratou i hinaaro e ora i ǒ. Teie ta te hoê o ratou i parau: “I pihai iho i te mau anavai o Babulonia matou i te parahiraa. Ua taˈi matou a haamanaˈo ai ia Ziona.” (Sal. 137:1) Ua hinaaro mau â ratou i te tamahanahanaraa. Na vai râ e tamahanahana ia ratou?

2-3. (1) Eaha ta Iehova i rave no te ati Iuda tei hopoi-ê-hia? (2) Eaha ta tatou e hiˈo mai i roto i teie haapiiraa?

² O Iehova “te Atua o te tamahanahana i roto i te mau tupuraa atoa.” (Kor. 2, 1:3) Mea here roa na ˈna i ta ˈna mau tavini. E hinaaro iho â oia e tamahanahana ia ratou. Ua ite o ˈna e farii vetahi o tei hopoi-ê-hia i ta ˈna aˈo, a tavini faahou atu ai ia ˈna. (Isa. 59:20) No reira oia i haapapai ai ia Isaia i te hoê poroi no ratou hau atu 100 matahiti hou to ratou hopoi-ê-raahia. O te buka ïa a Isaia. Eaha te tumu? Te na ô ra Isaia: “ ‘A tamahanahana, a tamahanahana i to ˈu nunaa,’ te parau ra to outou Atua.” (Isa. 40:1) I roto i teie buka, ua horoa Iehova i te tamahanahanaraa ta ratou i hinaaro mau â.

³ Mai taua ati Iuda ra, e hinaaro atoa tatou i te tamahanahanaraa. E hiˈo mai tatou e toru ravea i tamahanahana ˈi Iehova ia ratou: (1) Ua fafau Iehova e faaore oia i te hara a tei tatarahapa, (2) ua horoa oia i te tiaturiraa i to ˈna nunaa, e (3) ua tamǎrû oia ia ratou. E hiˈo atoa mai tatou e nafea Iehova e tamahanahana ˈi ia tatou na roto i taua mau ravea ra.

E FAAORE NOA IEHOVA I TE HARA

4. Mea nafea Iehova i te faaiteraa e Atua aroha hamani maitai o ˈna? (Isaia 55:7)

⁴ O Iehova “te Metua o te aroha hamani maitai î i te here.” (Kor. 2, 1:3) Ua faaite oia i taua huru maitai ra i to ˈna fafauraa e faaore i te hara a tei tatarahapa. (A taio i te Isaia 55:7.) Ua parau oia: “I te here taiva ore mure ore . . . e aroha hamani maitai au ia oe.” (Isa. 54:8) Mea nafea Iehova i te faaiteraa i to ˈna aroha hamani maitai? Noa ˈtu e faaruru â to ˈna nunaa i te utua o to ratou faaroo ore, ua fafau oia eita ratou e vai noa i Babulonia e a muri noa ˈtu. (Isa. 40:2) Eita e ore ua tamahanahana teie parau i te ati Iuda tei tatarahapa!

5. No te aha i papu maitai ai ia tatou e faaore Iehova i te hara?

⁵ Eaha te haapiiraa? Ua ineine Iehova i te faaore i te hara a ta ˈna mau tavini. Ua papu maitai ia tatou te reira. No te aha? Ua ite hoi tatou eaha ta Iehova i rave. E hanere matahiti i muri aˈe i ta Isaia i tohu, ua tono mai Iehova i ta ˈna Tamaiti here i te fenua no te pûpû i to ˈna ora ei hoo no te taatoaraa o te taata hara. Maoti taua tusia ra e tumâhia ˈi, e faaore-roa-hia ˈi ta tatou mau hara. (Ohi. 3:19; Isa. 1:18; Eph. 1:7) E Atua aroha hamani maitai mau â Iehova.

6. No te aha e tamahanahanaraa ia feruri i te faaoreraa Iehova i te hara? (A hiˈo atoa i te hohoˈa.)

⁶ E nehenehe ta Iehova poroi i te ati Iuda i roto i te Isaia 55:7 e tamahanahana atoa ia tatou. Mai te peu iho â râ te faahapa noa ra tatou ia tatou no te tahi hara noa ˈtu ua tatarahapa ê na tatou. Te faaruru noa ra paha tatou i te mau faahopearaa o taua hara ra. Teie râ, mai te peu ua faˈi tatou i te reira e ua faaafaro i to tatou haerea, mea papu ua faaore Iehova i ta tatou hara. E ia faaore anaˈe oia, eita o ˈna e haamanaˈo faahou i te reira. (A hiˈo atoa i te Ieremia 31:34.) No reira, mai te peu paˈi eita Iehova e manaˈo noa i ta tatou mau hara ta ˈna i faaore, eiaha atoa ïa tatou e na reira. Te mea faufaa no ˈna, o ta tatou ïa e rave nei, eiaha râ ta tatou mau hara tahito. (Ezk. 33:14-16) Fatata roa to tatou Metua aroha hamani maitai î i te here i te faaore roa i roto i te ao apî i te mauiui atoa e tupu nei no te hara.

7. Na te aha e turai ia tatou ia ani i te tauturu ua huna anaˈe tatou i ta tatou hara?

⁷ Eaha te rave mai te peu te hauti noa ra to tatou manaˈo haava no te tahi hara ta tatou i huna? Te faaitoito mai ra te Bibilia ia ani i te tauturu a te mau matahiapo. (Iak. 5:14, 15) E ere mea ohie ia faaara ˈtu ia ratou. E turaihia râ tatou ia na reira ia haamanaˈo tatou e aroha hamani maitai mai Iehova e taua mau taeae taiva ore ra, no te mea ua tatarahapa tatou. Ua faaohipa Iehova i te mau matahiapo no te tamahanahana ia taeae Arthur,a tei horuhoru roa no ta ˈna i rave. Teie ta ˈna i parau: “Hoê matahiti te maoro to ˈu mataitairaa i te hohoˈa faufau. Ia ˈu râ i faaroo i te hoê oreroraa parau no nia i te manaˈo haava, faˈi atura vau i ta ˈu hara i ta ˈu vahine e te mau matahiapo. Auaˈe au i na reira, ua topa te hau. Noa ˈtu râ, ua faahapa noa vau ia ˈu. Ua haamanaˈo mai te mau matahiapo e aita Iehova i faarue mai ia ˈu. E aˈo o ˈna ia tatou no te mea mea here na ˈna ia tatou. Ua putapû roa vau i teie parau mahanahana, e ua faatitiaifaro vau i to ˈu huru feruriraa.” I teie mahana, e pionie tamau e e tavini tauturu o Arthur. Mea mahanahana mau â te iteraa e aroha hamani maitai mai Iehova ia tatarahapa tatou!

E HOROA MAI IEHOVA I TE TIATURIRAA

8. (1) Eaha te tiaturiraa ta Iehova i horoa i to ˈna nunaa? (2) Ia au i te Isaia 40:29-31, eaha ta taua tiaturiraa ra i horoa ˈtu i te ati Iuda tei tatarahapa?

⁸ Ua manaˈo paha te ati Iuda tei hopoi-ê-hia eita roa ˈtu ratou e hoˈi i to ratou fenua. Inaha, eita to Babulonia e tuu hanoa i te feia ta ratou i haru. (Isa. 14:17) Ua horoa râ Iehova i to ˈna nunaa i te tiaturiraa. Ua fafau oia e faaora ia ratou, e aita hoê aˈe mea e tapea ia ˈna. (Isa. 44:26; 55:12) No Iehova, mai te huˈa repo ra o Babulonia. (Isa. 40:15) Hoê noa puhiraa mataˈi ua pee taua huˈa repo ra. Aita ïa e fifi no Iehova ia faaora i to ˈna nunaa. Eaha ta teie tiaturiraa i horoa ˈtu? Te tamahanahanaraa. E ere râ tera anaˈe. Ua papai Isaia: “E puai-faahou-hia . . . te feia e tiaturi ra ia Iehova.” (A taio i te Isaia 40:29-31.) Tera iho â, “e pee ratou mai te huru ra e pererau to ratou mai te aeto.”

9. Eaha te haapapuraa ta Iehova i horoa i te ati Iuda e tapea iho â o ˈna i ta ˈna parau?

⁹ Ua horoa atoa Iehova i tei hopoi-ê-hia i te haapapuraa e tapea iho â o ˈna i ta ˈna parau. Te mau parau tohu ïa tei tupu aˈena, mai te haruraa e te hopoi-ê-raa to Asura i na opu ahuru o Iseraela. (Isa. 8:4) Te haamouraa to Babulonia ia Ierusalema e hopoi-ê-raa i to reira mau taata. (Isa. 39:5-7) Te haamataporaahia te arii Zedekia e to ˈna afairaahia i Babulonia. (Ier. 39:7; Ezk. 12:12, 13) Ua tupu pauroa ta Iehova i tohu. (Isa. 42:9; 46:10) Papu roa, ua puai atu â to ratou tiaturi e faaora iho â Iehova ia ratou mai ta ˈna i fafau.

10. E nafea e papu noa ˈi to tatou tiaturiraa i teie mau mahana hopea?

¹⁰ Eaha te haapiiraa? Ia horuhoru tatou, e horoa mai te tiaturiraa i te tamahanahanaraa e te puai. E tau fifi ta tatou e ora nei, e mea puai to tatou mau enemi. Eiaha râ tatou e toaruaru. E tiaturiraa faahiahia mau ta Iehova i horoa mai, e ora e a muri noa ˈtu ma te hau e te taiâ ore. Mea faufaa ia papu noa tera tiaturiraa i roto i to tatou feruriraa e aau. Aita anaˈe, e mohimohi te reira, mai te hoê vahi nehenehe mau eita e ite-maitai-hia no te mea te hiˈo ra tatou i te reira na roto i te hoê haamaramarama mea repo te hiˈo. E nehenehe tatou e “horoi i tera hiˈo” ei auraa parau, oia hoi ia papu noa to tatou tiaturiraa. E nafea? Ma te feruri i te oraraa hope te au i roto i te ao apî. Ma te taio i te mau tumu parau, ma te mataitai i te mau video, e ma te faaroo i te mau himene no nia i to tatou tiaturiraa. E ma te faaite ia Iehova na roto i te pure i te mau mea atoa ta tatou e tiai ru nei.

11. Na te aha i faaitoito i te hoê tuahine mea ino roa to ˈna maˈi?

¹¹ A hiˈo na mea nafea te tiaturiraa i te tamahanahanaraa e te faaitoitoraa i te hoê tuahine o Joy te iˈoa. Mea ino roa to ˈna maˈi. Te na ô ra o ˈna: “Ia toaruaru roa anaˈe au, e faaite au i to ˈu mau huru aau atoa ia Iehova, ua ite hoi au e taa mai o ˈna ia ˈu. I reira ïa Iehova e horoa mai ai i ‘te puai o te hau ê i to te taata nei.’ ” (Kor. 2, 4:7) E feruri atoa Joy ia ˈna i roto i te ao apî, i reira “aita e taata e parau: ‘E maˈi to ˈu.’ ” (Isa. 33:24) E itoitohia tatou ma te haamahora i to tatou aau ia Iehova e ma te tiatonu i to tatou tiaturiraa.

12. Eaha te haapapuraa e tapea iho â Iehova i ta ˈna parau? (A hiˈo atoa i te hohoˈa.)

¹² Mai ta ˈna i rave no tei hopoi-ê-hia, ua horoa atoa mai Iehova i te haapapuraa e tapea iho â o ˈna i ta ˈna parau. Te mau parau tohu ïa e tupu nei, mai te tiaraa mai te hau rahi Beretane Marite mea ‘puai, mea paruparu atoa râ.’ (Dan. 2:42, 43) “Te aueueraa fenua i tera e tera vahi” e te ohipa pororaa i “te mau nunaa atoa.” (Mat. 24:7, 14) Maoti teie mau parau tohu e te vai ra ˈtu â, e puaihia to tatou tiaturi i ta Iehova i fafau no a muri aˈe.

E TAMǍRÛ MAI IEHOVA

13. (1) Eaha te fifi ta te ati Iuda i faaruru a piri mai ai te taime e tuuhia ˈi ratou? (2) Ia au i te Isaia 41:10-13, mea nafea Iehova i te tamahanahanaraa i tei hopoi-ê-hia?

¹³ Ua horoa Iehova i te ati Iuda e ora ra i Babulonia i te tiaturiraa faahiahia e tuuhia ratou. Ua ite atoa râ oia e faaruru ratou i te fifi a piri mai ai taua taime ra. I tohu na hoi oia e aro mai te hoê arii puai no te haru ia Babulonia e te mau nunaa e haaati ra i te oire. (Isa. 41:2-5) Ia mǎtaˈu anei ïa te ati Iuda? Eiaha, ua tamahanahana ê na Iehova ia ratou, a na ô ai: “Eiaha e mǎtaˈu, tei pihai iho hoi au ia oe. Eiaha e haapeapea, o vau hoi to oe Atua.” (A taio i te Isaia 41:10-13.) No te aha Iehova i parau ai “o vau hoi to oe Atua”? E ere no te haamanaˈo ia ratou i te faufaaraa ia haamori ia ˈna, ua ite ê na ratou i te reira. No te haamanaˈo atu râ tei pihai iho noa o ˈna ia ratou.—Sal. 118:6.

14. Mea nafea atoa to Iehova tamǎrûraa i tei hopoi-ê-hia?

¹⁴ Ua tamǎrû atoa Iehova i te ati Iuda tei hopoi-ê-hia ma te haamanaˈo ia ratou aita e otia to to ˈna ite e puai. Ua parau oia ia ratou ia hiˈo i te mau fetia. Na ˈna i poiete i te reira e ua ite oia i te iˈoa o tera e tera fetia. (Isa. 40:25-28) Ua ite atoa ïa oia i te iˈoa o ta ˈna mau tavini tataitahi. I te mea na ˈna i hamani i te mau fetia maoti to ˈna mana, e mana atoa ïa to ˈna no te paruru i to ˈna nunaa. Eiaha ïa tei hopoi-ê-hia ia haapeapea aore ra ia mǎtaˈu.

15. Eaha ta Iehova i faaue i te ati Iuda tei hopoi-ê-hia?

¹⁵ Ua faaite atoa Iehova i to ˈna nunaa eaha te rave a piri mai ai te taime e tuuhia ˈi ratou. Teie ta ˈna i faaue: “A tomo i roto i to outou mau piha i roto, a tapiri i te opani. A tapuni maa taime e ia ore roa te riri rahi tahoo.” (Isa. 26:20) Ua tupu teie irava i to te arii Kuro haruraa ia Babulonia. Ia au i te hoê taata tuatapapa Heleni i tahito ra, ua faaue Kuro i ta ˈna mau faehau ia haapohe pauroa te taata ta ratou e ite atu na te mau aroâ o taua oire ra. Eaha paha to Babulonia i te riaria! Area te ati Iuda tei hopoi-ê-hia, ua ora mai ïa no te mea ua faaroo ratou i ta Iehova faaueraa.

16. No te aha eiaha tatou e mǎtaˈu ia tupu anaˈe te ati rahi? (A hiˈo atoa i te hohoˈa.)

¹⁶ Eaha te haapiiraa? E ati rahi aita i tupu aˈenei te piri mai ra. Ia tupu te reira, e painu e e riaria te taata. Ta Iehova râ mau tavini, eita ïa. Ua ite tatou o Iehova to tatou Atua e “ua fatata to [ta]tou faaoraraa.” (Luka 21:28) Eita atoa tatou e aueue ia aro mai te mau nunaa enemi tei amui. E faaohipa Iehova i ta ˈna mau melahi no te paruru ia tatou. E horoa atoa mai oia i te mau aratairaa. Eita e ore e tae mai te reira na roto i te amuiraa. Tera paha to tatou “mau piha i roto,” i reira tatou e paruruhia ˈi. E nahea ïa tatou? Mea faufaa roa ia vai piri noa tatou i te mau taeae e tuahine, ia ineine i te faaroo i te aratairaa a Iehova, e ia papu maitai ia tatou e na Iehova e aratai ra i ta ˈna faanahonahoraa.—Heb. 10:24, 25; 13:17.

17. E nafea ia fariu noa ia Iehova ra o te tamahanahana mai?

¹⁷ Ua horoa Iehova i te ati Iuda tei hopoi-ê-hia i te tamahanahanaraa no ta ratou e faaruru i te taime e tuuhia ˈi ratou. E tamahanahana atoa o ˈna ia tatou. No reira, noa ˈtu eaha te tupu ananahi, a fariu noa ia Iehova ra, na ˈna e tamahanahana mai. A tiaturi noa ia ˈna, e aroha hamani maitai rahi mai oia. Ia papu noa to tatou tiaturiraa. E a haamanaˈo o Iehova to oe Atua, eiaha ïa e mǎtaˈu.