A faaohipa i te Bibilia mai te hoê hiˈo

Ua faaau te pǐpǐ o Iakobo i te Bibilia i te hoê hiˈo o te tauturu ia tatou ia ite i te rotoraa o to tatou aau. (Iak. 1:22-25) E nafea tatou e faaohipa ˈi i te Bibilia mai te hoê hiˈo?

A taio ma te haapao maitai. Mai te peu e hiˈo vitiviti tatou ia tatou i roto i te hiˈo, eita paha tatou e ite te vai ra te tahi mea tano ore i nia ia tatou. Oia atoa, ia taio vitiviti tatou i te Bibilia, eita paha tatou e ite eaha te titauhia ia faatano. No reira, mea faufaa ia taio tatou i te Bibilia ma te haapao maitai.

A hiˈo ia oe, eiaha râ ia vetahi ê. I te tahi taime, ia hiˈo tatou ia tatou i roto i te hiˈo, e ite atoa tatou ia vetahi ê. E haapao ïa tatou i te tahi mea tano ore i nia ia ratou. Hoê â huru, e nehenehe tatou e faaohipa i te Bibilia no te hiˈopoa i te mau hapa a vetahi ê. Tera râ, eita te reira e tauturu ia tatou ia faaafaro i ta tatou iho mau hapa.

Ia aifaito noa tatou. Mai te peu e hiˈo tatou i roto i te hiˈo, e haapao noa tatou i te mau mea ta tatou e au ore, e toaruaru ïa tatou. No reira, e titauhia ia vai aifaito noa tatou a taio ai i te Bibilia ma te ore e titau rahi aˈe i ta Iehova e ani mai ra.—Iak. 3:17.