Uiraa a te feia taio
I te po i haamau ai Iesu i te Amuraa maa a te Fatu, teihea roa na 70 pǐpǐ ta ˈna i tono e poro? Ua faarue anei ratou ia ˈna?
E ere no te mea aita na 70 i pihai iho ia Iesu i taua po ra, aita ïa o ˈna i hinaaro faahou ia ratou aore ra ua faarue ratou ia ˈna. O ta ˈna noa mau aposetolo ta Iesu i hinaaro i taua Amuraa maa ra.
Na 12 e na 70, e pǐpǐ ratou pauroa na Iesu. Ua maiti râ Iesu na mua i rotopu i ta ˈna mau pǐpǐ atoa 12 tane ei aposetolo na ˈna. (Luka 6:12-16) Tei Galilea o ˈna i to ˈna titauraa e tonoraa i na 12 e poro i te Faatereraa arii a te Atua e e faaora i te maˈi. (Luka 9:1-6) I muri aˈe i Iudea, “maiti ihora te Fatu e 70 pǐpǐ ê atu, e tono tataipiti atura ia ratou.” (Luka 9:51; 10:1) Tapao faaite ïa e pǐpǐ ta Iesu i te mau vahi atoa i porohia ˈi ta ˈna poroi.
Ua tamau noa te ati Iuda tei riro mai ei pǐpǐ i te faatupu i te oroa Pasa pauroa te matahiti, eita e ore e to ratou atoa mau utuafare. (Exo. 12:6-11, 17-20) A piri mai ai te taime e haapohehia ˈi Iesu, ua haere o ˈna e ta ˈna mau aposetolo i Ierusalema. Aita râ o ˈna i titau pauroa ta ˈna mau pǐpǐ no Iudea, Galilea e Perea no te hoê oroa Pasa rahi. O ta ˈna noa mau aposetolo ta ˈna i hinaaro. Ua parau o ˈna ia ratou: “Ua hinaaro roa vau e amu i teie Pasa e outou hou vau e mauiui ai.”—Luka 22:15.
E tumu ïa Iesu i na reira ˈi. Te piri mai ra hoi te taime e pohe ai o ˈna ei “Arenio a te Atua o te faaore roa i te hara a to te ao nei.” (Ioa. 1:29) I Ierusalema o ˈna e pohe ai, i reira hoi te pûpû-noa-raahia te mau tusia i te Atua. Ua haamanaˈo te fanauˈa mamoe amuhia i te oroa Pasa i te ati Iseraela, i to Iehova faaoraraa ia ratou mai Aiphiti mai. Maoti râ te tusia o Iesu, o te huitaata taatoa te faatiamâhia i te hara e te pohe. (Kor. 1, 5:7, 8) Maoti atoa te tusia o Iesu e riro mai ai na 12 aposetolo ei niu no te amuiraa Kerisetiano. (Eph. 2:20-22) Te parau atoa ra te Bibilia “12 ofai niu” to te oire moˈa ra o Ierusalema, e “i nia iho i te reira na iˈoa 12 ïa o na aposetolo 12 a te Arenio.” (Apo. 21:10-14) E ohipa faufaa roa ïa ta te mau aposetolo taiva ore i roto i te opuaraa a te Atua. Te taa ra ïa ia tatou no te aha Iesu i hinaaro ai ia ratou i te oroa Pasa hopea e i te Amuraa maa a te Fatu.
Aita iho â na 70 e te tahi atu mau pǐpǐ i taua po ra i pihai iho ia Iesu. Noa ˈtu râ, o te taatoaraa o te mau pǐpǐ taiva ore te faufaahia i taua Amuraa maa a te Fatu ra. Te mau pǐpǐ atoa o te riro mai ei Kerisetiano faatavaihia, e ô ratou i roto i te faufaa no te hoê faatereraa arii ta Iesu i faahiti i taua po ra.—Luka 22:29, 30.