Te maitai e te ino: Eaha ta oe e faaoti?

Ua ite te Atua ra o Iehova e ohipa te mau ture aveia ta tatou e faaoti e pee i roto i to tatou oraraa. No reira oia e hinaaro ai ia pee tatou i ta ˈna mau ture aveia.

Te hinaaro ra Iehova ia fanaˈo tatou i te oraraa oaoa e te hau.

“O vau, o Iehova to oe Atua, tei haapii ia oe ia faufaahia oe, tei aratai ia oe i te eˈa ia haere oe. Ahani iho â oe i haapao i ta ˈu mau faaueraa! E riro ïa to oe hau mai te hoê anavai e ta oe parau-tia mai te are o te miti.”—Isaia 48:17, 18.

Ei Atua poiete, ua ite o ˈna eaha te mea maitai roa ˈˈe no tatou. Te hinaaro ra oia ia pee tatou i ta ˈna aratairaa no to tatou maitai. Ia na reira tatou, eita tatou e uiui e maitaihia anei tatou. Inaha, e rave iho â tatou i te mau faaotiraa maitai, a fanaˈo atu ai i te hau e te oaoa mau.

Eita Iehova e ani mai hau aˈe i ta tatou e nehenehe e rave.

“E ere hoi teie faaueraa ta ˈu e faaue nei ia oe i teie mahana i te mea fifi roa no oe, e ere atoa mea atea ia oe.”—Deuteronomi 30:11.

Parau mau, no te ora ia au i te mau ture aveia a te Atua e titauhia ia taui i to tatou huru feruriraa e haerea. Noa ˈtu râ, eita Iehova e ani mai hau aˈe i tei maraa ia tatou. O ˈna hoi to tatou Atua poiete. Rahi atu â tatou i te haapii no nia ia Iehova, e papu atu â ia tatou “e ere ta ˈna mau faaueraa i te mea teimaha.”—Ioane 1, 5:3.

E piti Ite no Iehova e faatere ra i te haapiiraa Bibilia a te hoê vahine ma te faaohipa i te buka “Ia ora oe e a muri noa ˈtu!”

Te fafau ra Iehova e tauturu i te feia e maiti i te ora ia au i ta ˈna mau ture aveia.

“Te haru nei hoi au, o Iehova to oe Atua, i to oe rima atau. O vau te parau nei ia oe: ‘Eiaha e mǎtaˈu. E tauturu vau ia oe.’ ”—Isaia 41:13.

E haere ia tatou ia pee i te mau ture aveia a te Atua, no te mea e tauturu mai o ˈna Maoti ta ˈna Parau, te Bibilia, e fanaˈo ai tatou i te faaitoitoraa e te tiaturiraa.

Ua maitai mai te oraraa o e mirioni taata na te ao nei no te mea ua pee ratou i te mau aratairaa Bibilia. Hinaaro anei oe e ite atu â i te mau aˈoraa î i te paari ta te Bibilia e horoa ra? E nehenehe oe e hiˈopoa i te buka rairai Ia ora oe e a muri noa ˈtu! i nia i te jw.org. Mea tamoni ore te reira. E toru haapiiraa to roto:

E nafea te Bibilia e haamaitai ai i to oe oraraa?
E horoa te Bibilia i te hoê tiaturiraa
E tiaturi anei oe i te Bibilia?

A tuatapapa ˈi i te Bibilia, e taa ia oe noa ˈtu mea tahito teie buka, “e nehenehe iho â e tiaturihia, i teie nei e a muri noa ˈtu.” (Salamo 111:8) Aita ˈtu ravea maitai aˈe maori râ te peeraa i te mau aratairaa Bibilia i roto i to tatou oraraa. Eita râ te Atua e faahepo ia tatou. (Deuteronomi 30:19, 20; Iosua 24:15) Na tatou tataitahi e faaoti.