E te mau matahiapo, a tamau i te pee i te haerea o te aposetolo Paulo

1-2. E nafea te haerea o te aposetolo Paulo e tauturu ai i te mau matahiapo i teie mahana?

MEA here na te aposetolo Paulo i to ˈna mau taeae e ua haa rahi o ˈna no ratou. (Ohi. 20:31) Mea here rahi atoa to ˈna mau hoa Kerisetiano ia ˈna. I te hoê taime, a taa ˈi i te mau matahiapo i Ephesia aita ratou e ite faahou ia Paulo, “taˈi roa ˈtura ratou pauroa.” (Ohi. 20:37) Mea here atoa na te mau matahiapo itoito i to ratou mau taeae e tuahine e e rave ratou i te mau faanahoraa atoa no te tauturu atu. (Phil. 2:16, 17) I te tahi râ mau taime, e ite te mau matahiapo i te tahi mau fifi. Eaha ïa te nehenehe e tauturu ia ratou?

² E nehenehe te mau matahiapo itoito e hiˈopoa i te haerea o Paulo. (Kor. 1, 11:1) E ere o ˈna i te hoê aito taa ê, e taata tia ore râ tei tutava noa i te rave i te mea tia. (Roma 7:18-20) E rave rahi fifi atoa ta ˈna i faaruru. Aita râ Paulo i tuu aore ra i ere i to ˈna oaoa. Ma te pee i te hiˈoraa o Paulo, e nehenehe te mau matahiapo e tamau i te tavini ia Iehova ma te oaoa, noa ˈtu te mau fifi. E hiˈopoa anaˈe eaha te tauturu ia ratou.

3. Eaha ta tatou e hiˈopoa i roto i teie tumu parau haapiiraa e eaha ˈtu â ta tatou e haapii mai?

³ I roto i teie tumu parau haapiiraa, e hiˈopoa tatou e maha fifi ta te mau matahiapo e ite ra: (1) a faataa ˈi i te taime no te poro e no te tahi atu mau hopoia, (2) a rave ai i te taime no te faaitoito i te mau taeae e tuahine, (3) a faaite ai i te hoê manaˈo tano no nia i to ratou iho mau paruparu e (4) a faaruru ai i te mau paruparu o vetahi ê. E haapii tatou eaha tei tauturu ia Paulo i mua i taua mau tupuraa fifi ra e e nafea te mau matahiapo e pee ai i to ˈna haerea.

FAATAA I TE TAIME NO TE PORO E NO TE TAHI ATU MAU HOPOIA

4. No te aha paha e ere i te mea ohie no te mau matahiapo ia horoa i te hiˈoraa maitai i roto i te ohipa pororaa?

⁴ Te fifi. E rave rahi hopoia ta te mau matahiapo e amo ra, oia atoa te aratairaa i te ohipa pororaa. Ei hiˈoraa, e rave rahi o ratou o te peretiteni nei i te putuputuraa o te hebedoma aore ra o te faatere nei i te haapiiraa Bibilia a te amuiraa. E horoa atoa ratou i te mau oreroraa parau. Mea rahi atoa ta ratou e rave nei no te faaineine i te mau tavini tauturu e e oaoa ratou i te faaitoito i te mau taeae e tuahine. (Pet. 1, 5:2) Te apiti ra vetahi mau matahiapo i roto i te ohipa paturaa e atuaturaa i te mau Piha a te Basileia e te tahi atu mau vahi haamoriraa. Na mua roa râ, e feia poro te mau matahiapo, mai te mau mero atoa o te amuiraa.—Mat. 28:19, 20.

5. Eaha te hiˈoraa ta Paulo i horoa ei taata poro?

⁵ Te hiˈoraa o Paulo. I roto i te Philipi 1:10, te faaite ra Paulo eaha tei tauturu ia ˈna: “Ia taa maitai ia outou eaha te mea faufaa roa ˈˈe.” Ua pee Paulo i ta ˈna iho aˈoraa inaha, ua haafaufaa noa o ˈna i ta ˈna taviniraa a mairi ai te tau. Ua poro o ˈna “i mua i te taata e na tera e tera fare.” (Ohi. 20:20) Aita o ˈna i poro i te tahi noa taime o te mahana aore ra i te hoê noa mahana i te hebedoma. Ua poro râ o ˈna i te mau taime atoa e i te mau vahi atoa ta ˈna i haere. Ei hiˈoraa, a tiai ai i to ˈna mau hoa i Ateno, ua faaite Paulo i te parau apî oaoa i te tahi mau taata rahi e ua farii vetahi o ratou. (Ohi. 17:16, 17, 34) Noa ˈtu ua tapeahia o ˈna, ua poro Paulo i te feia atoa ta ˈna i farerei.—Phil. 1:13, 14; Ohi. 28:16-24.

6. Eaha ta Paulo i rave no te faaineine ia vetahi ê?

⁶ Ua faaohipa maitai Paulo i to ˈna taime. Pinepine o ˈna i te titau manihini ia vetahi ê ia apiti ia ˈna i roto i te taviniraa. Ei hiˈoraa, i to ˈna tere pororaa matamua, ua rave o ˈna ia Ioane, pii-atoa-hia Mareko, e i te piti o te tere, ua rave o ˈna ia Timoteo. (Ohi. 12:25; 16:1-4) Papu maitai, ua rave Paulo i tei maraa ia ˈna no te haapii ia raua e nafea ia faanaho i te amuiraa, ia amo maite i te hopoia ei tiai mamoe e ia riro ei taeae haapii aravihi.—Kor. 1, 4:17.

7. E nafea te mau matahiapo e rave ai i ta Paulo i parau i roto i te Ephesia 6:14, 15?

⁷ Te haapiiraa. E nehenehe te mau matahiapo e pee i to Paulo haerea ma te poro i te mau vahi atoa, eiaha noa râ i tera e tera fare. (A taio i te Ephesia 6:14, 15.) Ei hiˈoraa, e nehenehe ratou e poro a haere ai i te fare toa aore ra i ta ratou vahi ohipa. Ia apiti ratou i te hoê paturaa a te faanahonahoraa, e nehenehe te mau matahiapo e poro i te feia tapiri e i te feia hoohoo. Mai ia Paulo, e nehenehe te mau matahiapo e faaohipa i to ratou taime i roto i te taviniraa no te faaineine ia vetahi ê, oia atoa te mau tavini tauturu.

8. Eaha te titauhia i te mau matahiapo ia rave i te tahi taime?

⁸ Eiaha roa ˈtu te mau matahiapo e mairi i te pororaa no te mea mea rahi ta ratou ohipa i roto i te amuiraa aore ra te tuhaa haaati. No te vai aifaito, na roto i te pure e faaoti ratou e ore e farii i te tahi mau hopoia. E hinaaro ratou e rave i te taime no te mau tuhaa faufaa roa o te taviniraa, mai te haamoriraa utuafare, te pororaa aore ra te faaineineraa i ta ratou iho mau tamarii no te poro. No vetahi, mea fifi ia ore e farii rahi atu â hopoia. Ua papu râ ia ratou e te taa ra Iehova i to ratou hinaaro ia vai aifaito noa i roto i to ratou oraraa.

RAVE I TE TAIME NO TE FAAITOITO I TE MAU TAEAE E TUAHINE

9. Eaha te tahi mau fifi ta te mau matahiapo e nehenehe e faaruru?

⁹ Te fifi. E rave rahi fifi ta te nunaa o Iehova e faaruru ra. I te tau hopea, e hinaaro tatou paatoa i te mau faaitoitoraa, te tauturu e te tamahanahanaraa. I te tahi mau taime, e hinaaro vetahi i te tauturu no te tapea noa i te hoê haerea afaro. (Tes. 1, 5:14) Papu, eita te mau matahiapo e nehenehe e tatara i te mau tamataraa atoa ta te nunaa o Iehova e ite ra. Noa ˈtu râ, te hinaaro ra Iehova ia rave te mau matahiapo i te maraa ia ratou no te faaitoito e no te paruru i to ˈna nunaa. E nafea te mau matahiapo e rave ai i te taime no te tauturu ia vetahi ê, noa ˈtu mea rahi ta ratou hopoia?

10. Ia au i te Tesalonia 1, 2:7, mea nafea to Paulo aupururaa i te nunaa o Iehova?

¹⁰ Te hiˈoraa o Paulo. Ua imi Paulo i te mau ravea atoa no te haapopou e no te faaitoito i to ˈna mau taeae. E titau-atoa-hia i te mau matahiapo ia pee i te hiˈoraa o Paulo ma te faaite i to ratou here e hamani maitai i te mau taeae e tuahine. (A taio i te Tesalonia 1, 2:7.) Ua haapapu atoa Paulo i to ˈna here e i to Iehova here ia ratou. (Kor. 2, 2:4; Eph. 2:4, 5) Ua faariro o ˈna i te mau mero o te amuiraa ei hoa no ˈna e ua rave i te taime e o ratou. Ua faaite o ˈna i to ˈna tiaturi ia ratou ma te ore e huna i ta ˈna mau haapeapearaa e to ˈna mau paruparu. (Kor. 2, 7:5; Tim. 1, 1:15) Aita Paulo i tiatonu i nia i to ˈna mau fifi, ua tamau râ o ˈna i te tauturu i to ˈna mau taeae.

11. No te aha Paulo i horoa ˈi i te aˈoraa i to ˈna mau taeae e tuahine?

¹¹ I te tahi taime, ua titauhia ia Paulo ia horoa i te aˈoraa i to ˈna mau taeae e tuahine. Ua na reira o ˈna eiaha no to ˈna riri, no to ˈna râ here e hinaaro e paruru ia ratou. Ua horoa atoa o ˈna i te aˈoraa ohie ia taa. Ua hinaaro o ˈna ia farii-maitai-hia te reira. Ei hiˈoraa, i roto i te hoê o ta ˈna rata i to Korinetia, ua horoa Paulo i te aˈoraa faufaa mau. I muri aˈe i to ˈna papairaa i tera rata, ua tono atu o ˈna ia Tito. Aita Paulo i ite e farii anei ratou i tei parauhia i roto i te rata. Ua oaoa roa râ o ˈna a ite ai ua farii maitai e ua faaohipa ratou i te aˈoraa.—Kor. 2, 7:6, 7.

12. E nafea te mau matahiapo e tauturu ai i te mau hoa Kerisetiano ia haapuai i to ratou faaroo?

¹² Te haapiiraa. E pee te mau matahiapo i te hiˈoraa o Paulo ma te rave i te taime no to ratou mau taeae e tuahine. Ei hiˈoraa, e tae oioi mai ratou i te mau putuputuraa no te tauaparau e te tahi atu mau mero o te amuiraa. Maa taime iti noa te titauhia no te faaitoito i te hoê taeae aore ra tuahine. (Roma 1:12; Eph. 5:16) E pee te hoê matahiapo i te haerea o Paulo ma te faaohipa i te Bibilia no te tauturu i te mau taeae e tuahine ia haapuai i to ratou faaroo. Oia atoa no te haapapu atu i to ˈna here e i to Iehova here ia ratou. E tauaparau pinepine e e haapopou o ˈna ia ratou. Ia horoa te hoê matahiapo i te aˈoraa, e niu o ˈna i te reira i nia i te Parau a te Atua. Ma te mǎrû, e horoa o ˈna i te aˈoraa ohie ia taa ia farii-maitai-hia te reira.—Gal. 6:1.

FAAITE I TE HOÊ MANAˈO TANO NO NIA I TO RATOU IHO MAU PARUPARU

13. Eaha te huru o te hoê matahiapo i mua i to ˈna mau paruparu?

¹³ Te fifi. E taata tia ore te mau matahiapo, e hapa atoa ïa ratou mai ia tatou. (Roma 3:23) I te tahi taime, mea fifi no ratou ia faaite i te hoê manaˈo tano no nia i to ratou iho mau paruparu. E tiatonu rahi paha vetahi i nia i to ratou mau paruparu a toaruaru roa ˈi. Area te tahi atu, e imi ratou i te mau otoheraa a manaˈo atu ai e aita e titauhia ia rave ratou i te tahi mau tauiraa.

14. Ia au i te Philipi 4:13, mea nafea te haehaa i te tautururaa ia Paulo ia faaite noa i te hoê manaˈo tano no nia i to ˈna iho mau paruparu?

¹⁴ Te hiˈoraa o Paulo. No te mea e taata haehaa o Paulo, ua farii o ˈna eita e haere ia ˈna ia faaite noa i te hoê manaˈo tano no nia i to ˈna iho mau paruparu. Ua titauhia ia ˈna ia ani i te puai no ǒ mai i te Atua. Na mua ˈˈe, ua hamani ino Paulo i te mau Kerisetiano. I muri aˈe râ, ua taa ia ˈna e ere i te mea tano ta ˈna i rave e ua hinaaro o ˈna e taui i to ˈna huru e haerea. (Tim. 1, 1:12-16) Maoti te tauturu a Iehova, ua riro mai Paulo ei matahiapo î i te aumihi e te haehaa. Ua ite o ˈna e e rave rahi paruparu to ˈna, aita râ o ˈna i tiatonu i nia i te reira. Ua tiaturi o ˈna e nehenehe Iehova e faaore i ta ˈna mau hapa. (Roma 7:21-25) Ua farii o ˈna i to ˈna tiaraa taata hara. Ua haa rahi o ˈna ia maitai atu â to ˈna huru e ma te haehaa, ua ani o ˈna i te tauturu a Iehova no te rave i ta ˈna ohipa.—Kor. 1, 9:27; a taio i te Philipi 4:13.

15. E nafea te hoê matahiapo e faaite ai i te manaˈo tano no nia i to ˈna iho mau paruparu?

¹⁵ Te haapiiraa. Aita te mau matahiapo i faatoroahia no te mea e taata tia roa ratou. Tera râ, te titau ra Iehova ia farii ratou i ta ratou mau hape e ia maitai atu â to ratou huru Kerisetiano. (Eph. 4:23, 24) E titauhia i te hoê matahiapo ia hiˈopoa ia ˈna iho maoti te Parau a te Atua e ia rave i te mau tauiraa hinaarohia. A na reira ˈi, e tauturu Iehova ia ˈna ia oaoa e ia riro ei matahiapo maitai.—Iak. 1:25.

TE MAU PARUPARU O VETAHI Ê

16. Eaha te nehenehe e tupu ia tiatonu te hoê matahiapo i nia i te mau paruparu o vetahi ê?

¹⁶ Te fifi. E ite oioi paha te mau matahiapo i te mau paruparu o te mau taeae e tuahine a ohipa ˈi e o ratou. E ara râ te mau matahiapo ia ore e huru ê, e haava etaeta aore ra e faaino ia ratou. Ua faaara Paulo i te mau Kerisetiano tera ta Satani e hinaaro ra ia rave ratou.—Kor. 2, 2:10, 11.

17. Eaha te manaˈo ta Paulo i tapea no nia i to ˈna mau taeae e tuahine?

¹⁷ Te hiˈoraa o Paulo. Ua tapea Paulo i te hoê manaˈo tano no nia i to ˈna mau taeae e tuahine. Ua ite o ˈna e hape atoa ratou, inaha, i te tahi taime, ua mauiui o ˈna no ta ratou i rave. Ua taa râ ia Paulo e ere no te mea ua hape te hoê taata e taata ino ïa o ˈna. Mea here roa na ˈna i to ˈna mau taeae. Ua tiatonu o ˈna i nia i to ratou mau huru maitatai. Ua hape anaˈe ratou, ua ite Paulo i ta ratou mau tutavaraa no te rave i te mea maitai e ua tauturu atu.

18. Eaha te haapii mai i te huru o Paulo i mua i te peapea i rotopu ia Euodia e Sunetuhe? (Philipi 4:1-3)

¹⁸ E hiˈopoa anaˈe mea nafea Paulo i te tautururaa e piti tuahine o te amuiraa no Philipi. (A taio i te Philipi 4:1-3.) E au ra e ua tupu te peapea i rotopu ia Euodia e Sunetuhe a fifi atu ai to raua auhoaraa. Aita roa ˈtu Paulo i haava etaeta aore ra i faaino ia raua. Ua tiatonu râ o ˈna i nia i to raua mau huru maitatai. E rave rahi hoi matahiti to raua taviniraa ia Iehova ma te taiva ore. Ua ite Paulo e mea here na Iehova ia raua. No to ˈna faatupuraa i te hoê manaˈo tano no nia i teie na tuahine, ua faaitoito atu o ˈna ia faatupu i te hau. A tiatonu ai i nia i te mau huru maitatai o vetahi ê, ua oaoa noa Paulo e ua puai noa to ˈna auhoaraa e te mau taeae e tuahine o tera amuiraa.

19. (1) E nafea te mau matahiapo e tapea ˈi i te hoê manaˈo tano no nia i to ratou mau taeae e tuahine? (2) Eaha te haapii mai i te hohoˈa e faaite ra i te hoê matahiapo e tamâ ra i te Piha a te Basileia?

¹⁹ Te haapiiraa. Te ite ra te mau matahiapo i te mau huru maitatai ta te mau taeae e tuahine e faatupu ra. E taata tia ore te mau taeae e tuahine taitahi, e huru maitatai râ to ratou. (Phil. 2:3) Papu, i te tahi taime, e titauhia i te mau matahiapo ia faatano i te huru feruriraa o te hoê taeae aore ra tuahine. Mai ia Paulo râ, e tutava te mau matahiapo i te ore e tiatonu i nia i te mau parau aore ra ohipa tano ore a te hoê Kerisetiano. Mea maitai ia tiatonu ratou i nia i to ˈna here no Iehova, to ˈna faaoromai i roto i te taviniraa e ta ˈna mau tutavaraa no te rave i te mea maitai. E tauturu ïa te mau matahiapo i te mau taeae e tuahine ia ite e mero herehia ratou i roto i te amuiraa.

TAMAU I TE PEE I TE HAEREA O PAULO

20. E nafea te mau matahiapo e tamau ai i te haapii no nia i te haerea o Paulo?

²⁰ E te mau matahiapo, mea faufaa ia tamau outou i te haapii no nia i te haerea o Paulo. Ei hiˈoraa, i roto i te buka Index des publications des Témoins de Jéhovah, e nehenehe outou e imi i te upoo parau iti “exemple pour les anciens” i te tumu parau “Paul.” A taio ai i te tahi mau tumu parau horoahia, a ui ia outou iho, ‘E nafea te haerea o Paulo e tauturu mai ai ia oaoa noa a amo ai i ta ˈu mau hopoia ei matahiapo?’

21. Eaha ta te mau matahiapo e papu?

²¹ E te mau matahiapo, a haamanaˈo e aita Iehova e titau ra ia riro outou ei taata tia roa, ia vai taiva ore râ outou ia ˈna. (Kor. 1, 4:2) Ua mauruuru Iehova i ta Paulo taviniraa e i to ˈna taiva ore. Ia papu ia outou e te haafaufaa ra Iehova i te mau ohipa atoa ta outou e rave ra no ˈna. Eita hoi e “moˈe . . . ia ˈna ta outou ohipa e to outou hinaaro rahi i to ˈna iˈoa ma te tavini e ma te tamau i te tavini i te feia moˈa.”—Heb. 6:10.