E nafea te mau pure e nehenehe ai e tauturu ia oe?

I mua i te hoê maˈi teimaha mau, ua imi o Pamela i te tauturu a te mau taote aravihi. Ua ani atoa râ oia na roto i te pure i te puai o te Atua, ia nehenehe oia e faaoromai i to ˈna tupuraa fifi mau. Ua tauturu anei te pure ia ˈna?

Te na ô ra o Pamela: “I te roaraa o te taime a rapaauhia ˈi au no to ˈu mariri ai taata, ua mǎtaˈu noa vau. Ia pure râ vau ia Iehova ua ite au i te hau e te mǎrû i nia ia ˈu e maoti te reira i nehenehe ai au e faatauma i to ˈu tupuraa ma te taiâ ore. Te faaruru noa ra vau i te maˈi tamau, tera râ, e tauturu noa mai te pure ia ˈu ia tapea i te hoê feruriraa maitai. Ia ani mai te taata eaha to ˈu huru, e parau vau: ‘Te mauiui noa ra vau, noa ˈtu râ, te oaoa ra vau!’”

Papu maitai, eita tatou e tiai roa ia tupu mai te fifi no te haamata i te pure. Tei mua tatou pauroa i te mau fifi, mea iti aore ra mea rahi, pinepine e hinaaro tatou i te tauturu no te faaruru atu i te reira. E nehenehe anei te pure e tauturu mai?

Te parau ra te Bibilia: “E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.” (Salamo 55:22) Auê ïa parau mahanahana mau! Nafea ïa te pure e tauturu ai ia oe? Ia pure oe i te Atua mai ta ˈna e titau ra, e horoa mai oia i tei hinaarohia ia faaruru oe i te mau fifi. A hiˈo i te tumu parau “Ta te pure e nehenehe e horoa mai.”

Ta te pure e nehenehe e horoa mai

Te hau o te feruriraa

“A faaite i ta outou mau aniraa i te Atua. E na te hau o te Atua, tei hau ê i te mau manaˈo atoa, e tiai i to outou aau e feruriraa na roto i te Mesia ra o Iesu.” (Philipi 4:6, 7) Ia faaite atu oe i to oe mau tapitapiraa i te Atua, e tauturu oia ia oe ia vai hau noa e ia haa ma te paari noa ˈtu to oe mau ahoaho.

Te paari no ǒ mai i te Atua

“Ia ere noa ˈtu hoê o outou i te paari, ia tamau noa ïa oia i te ani atu i te Atua, e horoa noa mai hoi oia i te taata atoa ma te ore e faahapa, e e horoahia mai ta ˈna.” (Iakobo 1:5) Ia faaruru tatou i te mau faateimaharaa e rave rau, eita paha tatou e rave i te mau faaotiraa maitai i te mau taime atoa. Mai te peu e te pure ra oe no te fanaˈo i te paari, e nehenehe te Atua e tauturu mai ia haamanaˈo oe i te mau faaueraa tumu i roto i te Bibilia.

Te puai e te mahanahana

“E puai to ˈu ia faaruru i te mau mea atoa maoti tei horoa mai i te puai.” (Philipi 4:13) Ei Atua Mana hope, e nehenehe Iehova e horoa i te puai e hinaarohia e oe no te faaruru i te mau fifi aore ra no te tauturu ia oe i roto i te mau tamataraa atoa. (Isaia 40:29) Te parau atoa ra te Bibilia no nia ia Iehova, e “Atua no ˈna anaˈe te mahanahana.” E tamahanahana oia ia tatou “i roto i te tamataraa e rave rau.”—Korinetia 2, 1:3, 4.

E FAUFAAHIA ANEI OE IA PURE?

Oia mau, aita Iehova e faahepo ia oe ia pure ia ˈna. Tera râ, te titau-manihini ra oia ma te here ia na reira atoa oe. (Ieremia 29:11, 12) I mutaa iho, ua manaˈo anei oe e aita ta oe mau pure i pahonohia mai e te Atua? Eiaha e haaparuparu. Eita te mau metua î i te here e tauturu i ta ratou mau tamarii i te mau taime atoa mai ta ratou e hinaaro. Peneiaˈe ua ite te mau metua i te ravea maitai aˈe. Te mea papu, e hinaaro iho â te mau metua î i te here e tauturu i ta ratou mau tamarii.

Te hinaaro atoa ra te Atua ra o Iehova, te metua here rahi roa ˈˈe, e tauturu ia oe. Mai te peu e hiˈopoa maite oe i te mau aratairaa Bibilia ta tatou i tauaparau mai nei, e e faaohipa oe i te reira, e pahono mai te Atua i ta oe mau pure ma te rave i te mea maitai aˈe no oe!—Salamo 34:15; Mataio 7:7-11.