ORARAA KERISETIANO
E faaite tatou i te here ma te turu i te aˈo a Iehova
E paruru te tiavaruraa i te amuiraa e e aˈo râ i te feia o tei rave i te hara e aita i tatarahapa. (Ko1 5:6, 11) Ia turu tatou i ta Iehova mau faaotiraa, te faaite ra ïa tatou i to tatou here. E nafea? Inaha, e faatupu hoi te tiavaruraa i te mauiui i te pae o te huru aau, eiaha noa i te fetii piri i te tomite haava atoa râ.
Hau atu â, e faaite tatou i te here no to Iehova roo e ta ˈna mau ture aveia moˈa. (Pe1 1:14-16) E faaite atoa tatou i te here i te taata tei tiavaruhia. Nafea? Te hoê aˈo etaeta mea mauiui mau, i muri aˈe râ “e faatupu te aˈo i te parau-tia o te horoa i te hau.” (Heb 12:5, 6, 11) Ia amui tatou i te hoê Kerisetiano o tei tiavaruhia aore ra o tei faaoti e iriti ia ˈna iho i te amuiraa, te patoi ra ïa tatou ta Iehova haavaraa. A haamanaˈo, e aˈo Iehova i to ˈna nunaa ma te tano. (Ier 30:11) Te tiaturi nei tatou e hoˈi mai te mero i tiavaruhia i to tatou Metua î i te aroha hamani maitai. E tamau noa râ tatou i te turu i ta Iehova mau ture aveia e e rave tatou i te mau mea atoa e hinaarohia ia puai atu â to tatou auhoaraa e o Iehova.—Isa 1:16-18; 55:7.
A MATAITAI I TE VIDEO A TAPEA I TO TAIVA ORE MA TE AAU HOÊ, E A PAHONO I TO MURI NEI MAU UIRAA:
Eaha te huru o te mau metua Kerisetiano ia faarue ta ratou tamarii ia Iehova?
Nafea te amuiraa e nehenehe ai e tauturu i te mau mero utuafare taiva ore?
Eaha te aamu Bibilia o te faaite ra i te faufaaraa ia puai aˈe to tatou taiva ore ia Iehova i to tatou fetii?
Nafea tatou e faaite ai mea hau aˈe to tatou taiva ore ia Iehova i to tatou fetii?