E faufaahia anei oe i te buka iti E hiˈopoa anaˈe i te mau Papai i te mahana hoê?

I te mau mahana atoa, te rave ra anei oe i te mau ohipa ia piri atu â oe ia Iehova, mai te hiˈopoaraa i te irava Bibilia e to ˈna tatararaa no roto mai i te buka iti E hiˈopoa anaˈe i te mau Papai i te mahana hoê? Mai te peu e aita, e nehenehe anei oe e rave i te reira? E rave rahi taata o te hiˈopoa ra i te irava mahana i te poipoi roa ia nehenehe ratou e feruriruri i nia i taua mau irava ra i te roaraa o te mahana. (Ios 1:8; Sal 119:97) Nafea oe e faufaa-roa-hia ˈtu â ˈi i te irava mahana? A taio i te mau irava tapiri no te ite eaha te tupuraa. I roto i te tatararaa o te irava mahana, te faahitihia ra hoê aratairaa. A feruri i te hoê hiˈoraa Bibilia o te faaite ra i te reira. I muri iho, a faaohipa i taua aratairaa ra i roto i to oe oraraa. Ia vaiiho oe i te Parau a te Atua ia aratai i ta oe mau faaotiraa, e maitai mai ïa to oe oraraa e e faufaa-roa-hia oe.—Sal 119:105.

Na te ao nei, te hiˈopoa ra te mau utuafare o te Betela i te buka iti E hiˈopoa anaˈe i te mau Papai i te mahana hoê i te poipoi. Aita i maoro aˈenei, ua tuuhia te tahi o taua mau oreroraa parau ra i nia JW Haapurororaa teata i raro aˈe i te tuhaa TUPURAA E ORERORAA PARAU. Afea vau i mataitai ai hoê aore ra hau atu â oreroraa parau? Peneiaˈe ua tano roa taua mau tumu parau no to oe tupuraa. Ei hiˈoraa, nafea te aamu o Lota e tauturu ai ia oe a rave ai oe i te hoê faaotiraa?

A MATAITAI NA I TE VIDEO EIAHA E NOUNOU I TEIE NEI AO (IO1 2:15), E A PAHONO NA I TO MURI NEI MAU UIRAA:

• Eaha te aratairaa Bibilia faaohipahia i roto i te oreroraa parau o te haamoriraa poipoi?

• Nafea te aamu o Lota e faaite ai e mea atâta ia nounou i teie nei ao e te mau mea a teie nei ao?—Ge 13:12; 14:12; 19:3, 12, 13, 24-26

• Nafea tatou e faaite ai e te here ra tatou ia Iehova, eiaha râ i teie nei ao aore ra i te mau mea a teie nei ao?