ORARAA KERISETIANO

Te hoê mea apî i roto i te putuputuraa i ropu i te hebedoma

I te omuaraa o Tenuare 2018, no te putuputuraa i ropu i te hebedoma, e faaohipahia te mau nota haapiiraa, hohoˈa e video no roto mai i te neneiraa o te Huriraa o te ao apî o te mau Papai Moˈa no te haapiiraa i nia i te Internet, noa ˈtu aita â te reira i matara ˈtura na roto i to oe reo. Mea papu, e rahi atu â ta oe e haapii mai i roto i ta oe faaineineraa i te putuputuraa. Te mea faufaa ˈtu â, e piri atu â oe i to oe Metua î i te here ra o Iehova!

NOTA HAAPIIRAA

E horoa mai te mau nota haapiiraa i te tahi mau haamaramaramaraa no nia i te taˈere, te fenua e te reo i roto e rave rahi irava Bibilia.

Mataio 12:20

Uiti e ama rii noa ra: E farii araea huˈa titohia i te hinu olive te mori faaohipahia na mua ˈˈe i roto i te mau fare. E puru te uiti lino i te hinu e maoti te reira e ama ˈi o ˈna. Te parau Heleni “uiti e ama rii noa ra,” no te hoê ïa uiti e au auahi ra no te mea te ama noa ra o roto, aita râ e ura faahou ra. Ua tohuhia i roto i te Isaia 42:3 i te aumihi o Iesu, e ore roa oia e tupohe i te tiaturiraa e haere pohe ra o te feia haehaa e te aau teimaha.

Mataio 26:13

Oia mau: No ǒ mai te taˈo Heleni amini i te taˈo Hebera ra amene. “Na reira ïa” aore ra “oia mau” to ˈna auraa. Mea pinepine Iesu i te faaohipa i te parau “oia mau” no te omua i te hoê parau, te hoê parau fafau, aore ra te hoê parau tohu. E haapapu ïa te reira e mea mau ta ˈna parau aore ra e nehenehe iho â e tiaturihia. Te parauhia ra e mea otahi ta Iesu huru faaohiparaa i te taˈo “oia mau,” aore ra amene, i roto i te mau papai moˈa. Ia tataipitihia te faahitiraa (amini amini), mai i roto i ta Ioane parau apî oaoa, e hurihia ïa ta Iesu parau mai teie: “E parau mau.”—Ioa 1:51.

HOHOˈA E VIDEO

E faaite te mau hohoˈa patahia, te mau hohoˈa penihia e te mau video e rave rau mea rii faahitihia i roto i te Bibilia.

Betephage, te mouˈa Oliveta e Ierusalema

Te faaite ra teie video ia Ierusalema mai te pae hitia o te râ, mai te oire iti o At-Tur (te manaˈohia ra e o te oire o te Bibilia tera o Betephage), tae atu i hoê o na vahi teitei roa ˈˈe o te mouˈa Oliveta. Tei te pae hitia o te râ ia Betephage te oire o Betania, i te pae hitia o te râ o te mouˈa Oliveta. I Ierusalema, i taoto noa na Iesu e ta ˈna mau pǐpǐ i Betania. E piihia teie vahi i teie mahana te oire o El Azaryé, “te vahi o Lazaro” te auraa na roto i te reo Arabia. Eita e ore e ua faaea Iesu i te fare o Mareta, Maria e o Lazaro. (Mt 21:17; Mk 11:11; Lu 21:37; Ioa 11:1) Ia faarue oia i to ratou fare no te haere i Ierusalema, eita e ore e e rave Iesu i te hoê eˈa mai teie faaitehia i roto i te video. I te 9 no Nisana 33, i to Iesu paiumaraa na nia i te hoê asini na te mouˈa Oliveta no te haere i Ierusalema, ua haere paha oia na Betephage, ma te rave i te eˈa e tapae atu ai i Ierusalema.

Eˈa mai Betania e tae atu i Betephage
Betephage
Mouˈa Oliveta
Peho o Kederona
Mouˈa o te hiero

Naero i roto i te hoê ivi poro avae

Teie te hohoˈa o te ivi poro avae o te hoê taata e te hoê naero auri 11,5 tenetimetera te roa. Ua itehia teie ivi poro avae i 1968, i roto i te hoê heruraa i te pae apatoerau i Ierusalema. No te tau Roma teie ivi poro avae. Te haapapu ra teie mau maimiraa e ua faaohipahia iho â te naero no te patiti i te hoê taata i nia i te pou raau. Hoê â paha huru naero tei faaohipahia e te mau faehau Roma no te patiti ia Iesu Mesia i nia i te pou. Ua itehia mai teie poro avae i roto i te hoê afata hamanihia i te puˈa. I vaiihohia na te mau ivi mǎrô o te hoê taata pohe i roto i te afata, ua pe roa anaˈe te tino. Te haapapu ra te reira e ia haapohehia te hoê taata i nia i te hoê pou, e nehenehe oia e tanuhia.—Mt 27:35.