Eaha ta te Bibilia e nehenehe e haapii mai?​—Nafea ia faaohipa?

Hoê â te buka Bibilia haapii i te buka Haapii mai (aita â na roto i te reo Tahiti). E mauhaa teie nau buka o te faaite ra i te pueraa parau mau i roto i te hoê â anairaa. Mea ohie aˈe râ te faataaraa a teie buka e te mau taˈo e faaohipahia. Ua ferurihia te reira no te feia e mea fifi no ratou ia taa i te buka Bibilia haapii. Aita e tuhaa hau i roto, te vai ra râ te tahi mau nota o te faataa i te tahi mau taˈo e haapiiraa ma te ohie. Aita atoa e uiraa no te omua i te hoê pene, e aita e tuhaa no te haamanaˈo i te mau manaˈo faufaa. I te hopea râ o te pene, e haapotohia ïa te pueraa parau mau i faataahia mai. Mai te Bibilia haapii, e nehenehe e pûpû i te buka Haapii mai i te mau taime atoa o te matahiti, eiaha noa râ i te mau avaˈe e tera te papai e pûpû atu. Nafea ïa ia faaohipa i teie buka taa ê mau a faatere ai tatou i te hoê haapiiraa Bibilia?

HAAPOTORAA: No te rahiraa, mea ohie ta tatou huru raveraa no te haapiiraa, oia hoi ia taio i te paratarafa i roto i te buka Bibilia haapii, a pahono atu ai i te uiraa. A feruri na râ, hoê piahi aita e papu ra i te parau i tera reo aore ra i te taio. E faaoti paha ïa oe ia faaohipa i te buka Haapii mai, a rave atu ai i te haapotoraa o te mau pene ei niu no te haapiiraa. E nehenehe te piahi e faaitoitohia ia taio i te pene o ˈna anaˈe. Ua navai noa piri i te 15 minuti no te tatara i te hoê parau mau Bibilia. I te mea e aita pauroa te mau haamaramaramaraa i roto i te mau haapotoraa, ia faaineine maitai ïa te taata e faatere i te haapiiraa, a haamanaˈo noa ˈi i te mau hinaaro o te piahi. Mai te peu râ o te pene taatoa te hiˈohia mai, e riro ïa te haapotoraa ei haamanaˈoraa noa i te mau haapiiraa faufaa o te pene.

NOTA: Mea anaihia te mau taˈo e haapiiraa faataahia i roto i te mau nota mai tei anaihia i roto i te pene. Na te taata e faatere i te haapiiraa e faaoti e e hiˈo mai anei i te mau nota o te buka Haapii mai aore ra eita.